प्राथमिकतामा कर्णालीका उत्तरी नाका, काम भने सुस्त

मुगुको नाक्चेलाग्ना सडक अन्र्तगत थाइल सडकखण्ड

A+ A A-

कर्णाली प्रदेश सरकारले कर्णालीका उत्तरी नाकालाई प्राथमिकतामा राखेको छ । प्राथमिकतामा परे पनि कामको गति भने सुस्त छ । मुगुको नाक्चेलाग्ना, डोल्पाको मोरिल्ला र हुम्लाको हिल्सा नाका खोलन सके कर्णालीको समृद्धिको ढोका खुल्ने भन्दै प्रदेश सरकारले यी नाका खोल्न कसरत गरिरहेको छ । प्रदेश सरकारको बजेटले यति ठूला आयोजना निर्माण गर्न नसकिने र संघीय सरकारले पर्याप्त बजेट नदिँदा अपक्षा अनुरुप यी आयोजनाका काम अघि बढ्न सकेका छैनन् ।

चीन सरकार हिल्सा नाका खोल्न तयार भएको छ । नाक्चेलाग्ना र मोरिल्ला नाका खोल्नेबारे भने आनाकानी गर्दै आएको छ । सरकारले प्राथमिकता राखेका योजना राष्ट्रिय गौरवका आयोजनामा पनि नराख्दा लक्ष्य अनुसार काम हुन सकेको छैन । प्रदेश सरकारको बजेटले ठूलो आयोजना निर्माण गर्न सम्भव नभएको र केन्द्र सरकारले प्राथमिकतामा नराख्दा काम अघि बढ्न नसकेको कर्णाली प्रदेश सरकारको भनाइ छ ।

नाक्चेलाग्नामा बजेट अभाव

छोटाे र सहज नाकाका रूपमा लिइएको नाक्चेलाग्ना नाका खोल्न प्रदेश सरकारले पहल गर्दै आएको छ । मुगुको गमगढीदेखि नाग्चेलाग्नासम्मको ९६ किलोमिटरमध्ये हाल गमगढीदेखि थाइलसम्मको १६ किलोमिटर ट्र्याक खोलिएको छ । १६ किलोमिटर सडक निर्माण भए पनि त्यसयता यस सडकमा बजेट विनियोजन नै भएको छैन । चालु आर्थिक वर्षमा प्रदेश सरकामार्फत १० करोड रुपैयाँ विनियोजन भएको सडक डिभिजन कार्यालय जुम्लाका प्रमुख श्रवणकुमार महताराले बताए ।

‘गत आर्थिक बर्षमा नाग्चेलाग्ना सडक निर्माणका लागि बजेट नै आएन’, उनले भने, ‘यस वर्ष १० करोड रकम आएको छ । डीपीआर तयार भएर ठेक्का खोल्ने तयारीमा छौं ।’ नाक्चेलाग्ना नाका खोल्न सरकारले विनियोजन गरेको बजेटमध्ये थाइलभन्दा अगाडि ठूलो नाङ्लेभीर छ । त्यो भीर फोड्न ब्लास्टिङ गर्नु अनिवार्य रहेको प्रमुख महतारा बताउँछन् । ‘ठूलो भीर छ । बजेट थोरै छ । ब्लास्टिङ गर्नुपर्नेछ’, उनले भने, ‘उत्तरी नाका खोल्न यो बजेट निकै कम हो ।’

सरकारले राष्ट्रिय प्राथमिकतामा राखेको उत्तरी नाकालाई बजेट थोरै दिने गरेको महताराले बताए । नाग्चेलाग्ना नाका खोल्न ०६७ देखि निर्माण सुरु भएको हो । यो सडकमा १० करोड रुपैयाँ खर्च भइसकेको छ । सुर्खेतबाट नाग्मा–गमगढी हुँदै तिब्बतको सीमासम्म तीन सय ९० किलोमिटर दूरी छ ।

यस्तै, भेरी करिडोर हुदैँ डोल्पाको मोरिल्ला नाका खोल्न सरकारले यसवर्ष पनि बजेट विनियोजन गरेको छैन । डोल्पाको दुनैदेखि मोरिल्लासम्म १२७ किलोमिटर सडकमध्ये डोल्पाको धौदेखि चीनको मोरिल्ला जोड्ने ६५ किलोमटिर सडक ट्र्याक खुलिसकेको सडक डिभिजन कार्यालय रुकुम चौरजहारीका प्रमुख नरेन्द्र भट्टले बताए । उनले भने, ‘त्यसबीचको कडा चट्टान भएकाले समस्या भएको छ ।’

दुनैदेखिको धौसम्मको सडक निर्माणका लागि वातावरणीय प्रभाव मूल्यांकनको काम सुरु भएको तर सरकारले बजेट विनियोजन नगर्दा काम रोकिएको प्रमुख भट्टले बताए । ‘भर्खर वातावरणीय प्रभाव मूल्यांकनको काम सुरु भएको छ, यो काम सकेर बजेट आएपछि काम अघि बढ्छ’, उनले भने ।