समाजवादीले सरकार नछाड्ने, राजपासँग तत्काल एकता नहुने

A+ A A-

सत्तारुढ समाजवादी पार्टीले नेकपा नेतृत्वको सरकार तत्काल नछाड्ने निष्कर्ष निकालेको छ ।

२८–३० कात्तिकमा तीन दिनसम्म राजधानीमा चलेको पार्टी संघीय परिषद् बैठकले तत्काल सरकार नछाड्ने निर्णय गर्दै मधेश केन्द्रित दल राष्ट्रिय जनता पार्टीसँगको पार्टी एकता वार्तालाई निरन्तरता दिने निर्णय गरेको हो ।

राजपासँगको वार्तालाई निरन्तरता दिने परिषद्को निर्णय भने परिणाममुखी नहुने भएको छ । समाजवादीले तत्काल सरकार छाडे मात्र पार्टी एकता सम्भव हुने भन्दै अडान राख्दै आएको राजापाका लागि सरकारमा बसिरहने समाजवादीको निर्णयले एकता तत्काल सम्भव नदेखिएको हो ।

गत २३ जेठमा उपेन्द्र यादव नेतृत्वको संघीय समाजवादी फोरम र डा.बाबुराम भट्टराई नेतृत्वको नयाँ शक्ति नेपालबीच एकीकरणपछि बनेको समाजवादीले संविधान संशोधनलगायतका माग सरकारले सम्बाेधन नगरे सरकार छाड्ने निर्णय गरेको थियो । तर, समय सीमा भने तोकिएको थिएन ।

सरकारले संविधान संशोधन गर्न ढिलाइ गरेको, सरकार सञ्चालनमा साझेदार दलसँग सहकार्य नगरेको, राजनीतिक नियुक्तिमा साझेदार दललाई उपेक्षा गरेको र मन्त्रिपरिषद् बैठकमा एकलौटी निर्णय गरेको भन्दै समाजवादीले सरकारप्रति असन्तुष्टि जनाउँदै आएको थियो ।

समाजवादीका नेताहरूले तत्काल सरकार छाड्न नेतृत्वलाई दबाब दिन थालेपछि शीर्ष नेताहरू पनि सरकारप्रति असन्तुष्ट थिए । सरकार छाड्न दबाब आए पनि उपप्रधानमन्त्री तथा पार्टीका अध्यक्ष उपेन्द्र यादव तत्काल सरकार छाड्न तयार थिएनन् ।

पार्टीका अर्का अध्यक्ष बाबुराम भट्टराईको प्रस्तावमा तत्काल सरकार नछाड्ने भनी परिषद् बैठकमा पेश गरिएको राजनीतिक दस्तावेजलाई स्वीकार गरेपछि समाजवादी तत्काल सरकारबाट नहट्ने भएको हो । तत्काल सरकार नछाड्ने निर्णय गरेको समाजवादीले सरकारलाई चेतावनी दिएर सरकार छाड्ने संकेत दिएको छ ।

संघीय परिषद्मा पेश भएको राजनीतिक प्रस्ताव पारित भएसँगै समाजवादीले सरकारबाट तत्काल नहट्ने, संविधान संशोधन गर्न सरकारलाई दबाब दिने, संशोधन नभए सरकार छाड्न अल्टिमेटम दिने, त्यसपछि पनि माग पूरा नभए सरकार छाड्ने निर्णय गरेको परिषद् सदस्य अर्जुन थापाले जनाए ।

बैठकले राजपासँगको वार्तालाई निरन्तरता दिने निर्णय गरेको छ । तर, राजपाका नेताहरू समाजवादीको यस्तो निर्णयलाई विश्वास गर्ने पक्षमा छैनन् । राजपासँग सांगठनानिक व्यवस्थापनको कुरा नमिलेकाले तत्काल एकता सम्भव नहुने एक नेताले बताए ।

राजपाले समाजवादीसँग पार्टी एकता गर्न कम्तिमा चार जनालाई अध्यक्ष मण्डल वा शीर्ष नेताको हैसियत दिनुपर्ने, १ हजार ८ सयमध्ये ४ सयलाई केन्द्रीय समितिमा राख्न प्रस्ताव गरेको छ । उसले समानता अर्थात ५० प्रतिशत सांगठनिक हिस्सा दिनुपर्ने माग गरेको छ ।

समाजवादीले भने राजपाका दुई जनासम्मलाई पार्टी नेतृत्व वा अध्यक्ष मण्डलमा ल्याउन सकिने, करिब ३ सय ५० जनालाई केन्द्रीय समितिमा समावेश गर्न सकिने र सम्पूर्ण सांगठानिक संरचनामा ४० प्रतिशत हैसियतमा स्थान दिने पक्षमा छ ।

सांगठनिक र नेतृत्वको व्यवस्थापनमा सहझदारी भएमा पार्टी एकता हुने र पार्टी एकता भएपछि वा अघि जुन समयमा पनि सरकार छाड्न समाजवादी तयार रहेको समाजवादीका नेताहरूले अडान राखेका छन् ।

समाजवादीको सरकार छाड्ने निर्णय पर्खिएर बसेको राजपा भने समाजवादीको यो निर्णयबाट निकै निराश भएको छ ।

प्रकाशित मिति: आइतबार, मंसिर १, २०७६ १३:३६