‘म नाच्दा गाउँलेले उत्ताउली भन्थे’

A+ A A-

विदेशमा नेपालीको दैनिकी भनिरहनुपर्दैन । न दिन भन्न पाइने न रात । काम नगरी माम पाइन्नँ । तथापि, जहाँ भए पनि काम नगरी त बाँच्न सकिन्न नै ।

उनी अहिले पोर्चुगल छन् । दैनिक १६ घण्टासम्म काम गर्छिन् । र पनि मोडलिङका लागि समय अपुग भएको छैन उनलाई ।

नेपालीमा भनाइ छ, ‘खाने मुखलाई जुँगाले छेक्दैन ।’ यही भनाइ जस्तै सारा श्रेष्ठलाई जागिरले कलाकारितामा जम्नबाट रोकेको छैन । थोरै समय निकालेर भए पनि कलाकार साथीहरूसँग भेटघाट तथा नयाँनयाँ कामका लागि सहकार्य गर्ने उनको बानी छ । म्युजिक भिडियो गर्नुपर्दा त केही दिन जागिरबाट बिदा मिलाएरै भए पनि समय व्यवस्थापन गर्दै आएकी छन् साराले ।

वैदेशिक रोजगारीको सिलसिलामा १४ वर्षअघि पोल्याण्ड पुगेकी उनी केही वर्ष त्यहाँ बसेपछि नर्वे हुँदै पोर्चुगलमा ‘सेटल’ भएकी छन् । सानैदेखि नाच्नमा सिपालु साराले सात वर्षअघि एक म्युजिक भिडियोमार्फत् मोडलिङमा डेब्यू गरेकी हुन् । अहिलेसम्म उनले एक दर्जनभन्दा बढी म्युजिक भिडियोमा काम गरिसकेकी छन् ।

सत्यराज र स्वरूपराज आचार्यको ‘हाम्रो नाता’ सूर्य दयालु र मेलिना राईको ‘आऊ गोरी’, सूर्य दयालुकै ‘रहेछौ यात्री’ र ‘दुई किनार’, बाबुराम शीलको ‘परेली फर्काई फर्काई’, दार्जिलिङकी ललिताको ‘कहाँ गयो कता हरायो’लगायत म्युजिक भिडियोमा साराले मोडलिङ गरेकी छन् । उनी अहिले फेरि सूर्य दयालुको स्वरमा रहेको गीतको भिडियोमा मोडलिङ गर्ने तयारीमा छन् ।

यीमध्ये केही म्युजिक भिडियो उनले नर्वेमै गरेकी हुन् भने केही नेपालमा ।

उनी एउटा भिडियोमा अभिनय गर्ने सिलसिलामा केही महिनाका लागि अहिले काठमाडौंमा छन् ।

मोडलिङ र सारा

उदयपुरको ताप्ले रानीपोखरी गाउँपालिकामा जन्मिएकी सारा सानैदेखि नाच्नमा सिपालु थिइन् । ‘त्यतिबेलाको समाज महिलाप्रति अलिक कठोर र निर्दयी नै थियो’, सारा सम्झन्छिन्, ‘म नाच्न जाँदा कतिपयले उत्ताउली भन्थे ।’

आफ्नो प्रतिभा देखाउँदा उत्ताउली भनेको उनलाई पटक्कै मनपर्दैन थियो । तैपनि, उनी गाउँघरमा हुने पूजा, साङ्गे, वैवाहिक समारोहमा नाच्थिन् । कतिपयले उनको नृत्यको प्रशंसा पनि गर्थे ।

गाउँकै भिल्के पोखरी माविमा १० कक्षा पढ्दापढ्दै उनी वैदेशिक रोजगारीका लागि पोल्याण्डतिर लागिन् । उनको घरको आर्थिक अवस्था त्यति राम्रो थिएन । दुई जना दाइ र एक दिदीपछि जन्मिएकी साराका दुई जना भाइ छन् ।

गाउँमा छोरी मान्छेले केही गर्न सक्दैनन्, सर्वेसर्वा छोरा नै हुन्, छोराले नै संसार धानेका हुन्छन् भन्ने खालको मान्यतालाई असत्य सावित गर्न चाहन्थिन् सारा । त्यसैले थप अध्ययन गर्ने, मोडलिङमा जाने इच्छालाई थाँती राखेर २०६४ सालमा उनी विदेसिइन् ।

विदेश न हो, घडीको सुइको इशारामा चल्नुपर्ने दैनिकी । उनले करिब पाँच वर्ष मोडलिङको इच्छालाई दबाएरै राखिन् । तर, उत्कट इच्छा र बेजोड लगाव भयो भने सपना र इच्छाहरू पूरा हुन्छन् । उनले २०६९ सालमा सत्य र स्वरूपको ‘हाम्रो नाता’ बोलको गीतबाट मोडलिङमा डेब्यू गर्ने मौका पाइन् । त्यसपछि उनले थप म्युजिक भिडियोसँगै विज्ञापनहरूमा मोडलिङ गरिन् । ‘नर्वेमा हुँदा मैले मेकअप आर्ट र ड्रेसको विज्ञापनमा मोडलिङ गरेकी छु’, उनले भनिन् ।

फिल्ममा इच्छा

सारालाई म्युजिक भिडियोसँगै अब फिल्ममा पनि अभिनय गर्ने इच्छा छ । उनी भन्छिन्, ‘मनपर्ने कथा र परिवारमा बसेर हेर्न सकिने खालको फिल्मका लागि अफर आएमा गर्ने इच्छा छ ।’

केही चलचित्रमा अभिनय गरी अनुभव बटुल्ने र कालान्तरमा आफैँ चलचित्र बनाउने उनको योजना छ । ‘आफैँ चलचित्र बनाउनुअघि यसका सम्भावना र चुनौतीबारे बुझ्नु छ’, उनी भन्छिन्, ‘त्यसपछि म पनि फिल्म बनाउने सोचमा छु ।’

निर्माता र निर्देशकबारे

धेरै मोडल र हिरोइनहरूले बेलाबेला निर्माता र निर्देशकबाट पीडित हुनुपरेको गुनासो गर्दै आएका छन् । बजारमा हल्ला पनि त्यस्तै छ । तर, साराले करिब एक दर्जन म्युजिक भिडियो गरिसक्दा अहिलेसम्म यस्तो खालको अनुभव बटुल्नुपरेको छैन । ‘मेरो गुड लक भनौँ कि ! अहिलेसम्म मैले निर्माता र निर्देशक निकै फ्रेन्ड्ली पाएकी छु ।’

कसले कस्तो व्यवहार गर्छ भन्ने कुरा धेरैचाहिँ आफूमै भर पर्ने उनी बताउँछिन् । भन्छिन्, ‘मलाई उसले यस्तो भन्यो, त्यसले यस्तो गर्‍यो भन्नुअघि आफू कस्तो छु, मैले के गरेँ भन्ने कुराप्रति सजग हुनुपर्छ, आफू ठीक ठाउँमा भए अरूले जबर्जस्ती गर्छ जस्तो मलाई लाग्दैन ।’

कलाकारलाई हेर्ने नजर

हुन त नेपाली समाजले पहिलो विश्वका धेरै कुरा अनुकरण गरिरहेको छ । यद्यपि, उनीहरू जस्तै मान्यता र स्थितिमा पुग्न अझै धेरै वर्ष लाग्ला । तैपनि, हिजोभन्दा धेरै अगाडि आइसकेको छ नेपाली समाज । महिला कलाकार, अझ ग्ल्यामर फिल्डमा रहेकाहरूलाई समाजले हेर्ने दृष्किोण उनलाई चित्त बुझ्दैन ।

‘अहिले पनि गाउँघरमा मोडलिङ गर्ने युवतीलाई हेयकै दृष्टिले हेरिन्छ । तर, यो त पेसा हो नि, एउटा डाक्टर, इन्जिनियर, बैंकर, पत्रकार भनेजस्तै’, उनले भनिन् । आफ्नो पेसालाई नराम्रो भनेको कसैलाई पनि राम्रो नलाग्ने उनको भनाइ छ ।

‘कुनै मोडलले ब्रा र पेन्टीमा कुनै भिडियोमा अभिनय गर्नु, फिल्ममा सिन दिनु, यो उसको पेसा हो, त्यही भएर गर्ने हो । कुनै नर्स वा डाक्टरले कुनै पुरुषको गोप्य अंगमा भएको समस्या लाज लाग्छ भनेर चेक गर्दिनँ भन्न मिल्छ र ?’, साराको प्रश्न छ ।शहरी क्षेत्रमा भने महिलाप्रति देखिएको सम्मान चित्तबुझ्दो रहेको उनको भनाइ छ । ‘म १४ वर्षअघि नेपाल छाड्दै गर्दा हाम्रो समाज जुन चेतना र धरातलमा थियो, अहिले त्यसबाट धेरै अगाडि आइसकेको पाएँ’, सारा भन्छिन्, ‘हिजो छोरीलाई हेर्ने दृष्टिकोण र आज हेर्ने दृष्टिकोणमा निकै ठूलो अन्तर देखियो । विगतमा मोडलिङ गर्ने कलाकारलाई हेर्ने दृष्टिकोण र आज हेर्ने नजरमा धेरै फरक पाइयो ।’

आगामी दिनमा म्युजिक भिडियोसँगै फिल्ममा करिअर बनाउने साराको योजना छ । यसबाहेक भविष्यमा छोराछोरीबाट बेवास्ता गरिएका ज्येष्ठ नागरिकका लागि सेवागृह सञ्चालन गर्ने उनी बताउँछिन् । कलाकारितासँगै समाजसेवा उनको रुचिको विषय हो ।

कलाकारप्रति राज्य अनुदार

‘कलाकार राष्ट्रको गहना हो’ भनेर मौखिक मान्यताबाहेक राज्य पक्षले कलाकारका लागि खासै केही गर्न नसकेको उनको गुनासो छ । कलालाई जीवित राख्नै गाह्रो भएपछि कलाकार बाँच्न सहज हुने कुरै भएन’, उनी भन्छिन्, ‘त्यसैले कलाको महत्त्वबारे तीनै तहको सरकारले नबुझेसम्म साधारण जनतालाई बुझाउन पनि सजिलो छैन ।’

राज्यले नेपाललाई कलाको क्षेत्रबाट पनि चिनाउनतर्फ जोड दिनुपर्ने उनको सुझाव छ । ‘व्यक्तिको घर होस् वा सार्वजनिक स्थल, त्यहाँ कला राख्ने व्यवस्था राज्यले गर्नुपर्छ’, उनले थपिन्, ‘किनकि कलाले विगतलाई झल्काउँछ ।’

छिमेकी भारतमा कलाकारलाई राज्यले निकै सुविधा र सम्मान दिएको उनको तर्क छ ।

‘सिंगल लाइफ’

२५ वसन्त पार गरिसकेकी सारा अविवाहित हुन् । तत्काल विवाह गर्ने योजना पनि नरहेको उनी बताउँछिन् । विवाह नगरे पनि ब्वाइफ्रेण्ड त होला नि ? भन्ने प्रश्नमा मुस्कुराउँदै सारा जवाफ दिन्छिन्, ‘तपाईंलाई पत्यार नलाग्ला, अहिलेसम्म मैले ब्वाइफ्रेण्ड बनाएकी छैन । म काम र आफ्नो प्यासनलाई बढी प्राथमिकता दिन्छु । अर्को कुनै बाधाले मेरो इच्छा र सपनालाई असफल नपारोस्, म यही चाहन्छु ।

’प्रेम प्रस्ताव

स्वाभाविक हो, अविवाहित, त्यसमाथि मोडलिङ क्षेत्रमा रहेका कारण उनलाई प्रेम प्रस्ताव त निकै आउँछन् । ‘धेरैजसोले सामाजिक सञ्जालमार्फत्, कतिपयले फोनमा र केहीले भेटमा प्रेम प्रस्ताव राख्नुहुन्छ’, उनी भन्छिन्, ‘म युरोपेली समाजमा घुलमिल भएकाले प्रेम प्रस्ताव राख्नेलाई धन्यवादसहित सम्मानपूर्वक सम्झाउँछु र उहाँहरूसँग मेरो सम्बन्ध एउटा साथी वा दाजुबहिनीको रूपमा मात्र हुन्छ ।’

जीवनका केही सपना साकार गरेपछि मात्रै प्रेम र विवाहका बारेमा सोच्ने उनको भनाइ छ ।

सेक्स

नेपाली समाजमा खुला रूपमा ‘सेक्स’का कुरा गर्नु पाच्य हुँदैन । तर, सारा यस्ता कुरा खुला रूपमा गर्नुपर्ने बताउँछिन् । ‘यो मानिसको शारीरिक र मानसिक स्वास्थ्यसँग जोडिएको कुरा हो । यसमा लजाउने वा यसलाई अश्लील मान्नुहुँदैन’, उनी भन्छिन् ।

पहिरन

सारा आधुनिक फेसन रुचाउँछिन् । उनी आफूलाई सुहाउने र सहज हुने खालको पहिरन लाउनुपर्ने बताउँछिन् । ‘मचाहिँ मौसम, कम्फर्ट र म्याचिङअनुसारको पहिरन लगाउँछु’, उनले भनिन् ।

राजनीतिबारे

धेरै मोडलहरू राजनीतिप्रति त्यति जानकार हुँदैनन् । तर, सारा राजनीति र समाजप्रति मोडलको चासो हुनुपर्ने मान्यता राख्छिन् । ‘राजनीतिले देश र समाजको भविष्य निर्धारण गर्छ’, उनी भन्छिन्, ‘यो पूरै संसारमा राजनीति हुन्छ । संसारभरि हुने राजनीतिबारे हामी कलाकार झन् धेरै जानकार हुनुपर्छ । यो महत्त्वपूर्ण हुँदैन थियो भने संसारभर किन हुन्थ्यो ?’

आफू विदेशमै भए पनि नेपाली समाज र नेपाली राजनीतिबारे चासो राख्ने गरेको उनको भनाइ छ ।युरोप र नेपाल

उनी युरोप बसेको करिब डेढ दशक भयो । त्यहाँको समाज, मूल्य, मान्यता, जीवनशैलीलगायतसँग उनी राम्रोसँग जानकार भइसकेकी छन् । नेपालमै जन्मिएर करिब दुई दशकयता बिताएकाले यहाँको समाजबारे त उनी जानकार नहुने कुरै भएन ।

‘युरोपमा मानवअधिकार, पेसा, जिम्मेवारी र समयलाई निकै संवेदनशील मानिन्छ’, सारा भन्छिन्, ‘नेपाली समाजको परिचय मानवीय सहयोग र सद्भाव हो ।’

युरोपको तुलनामा नेपाली समाज आर्थिक विकासमा पछि भए पनि प्रकृति, भाषा, संस्कृतिमा नेपाल नै अगाडि रहेको उनको भनाइ छ । ‘मैले एउटा कलाकार भएर हेरेँ’, सारा भन्छिन्, ‘नेपाली मूलकी भएकाले यहाँको भाषा, संस्कृति, प्रकृतिलगायत गर्व गर्न सक्ने धेरै कुरा हामीसँग छन्, जो युरोपसँग कमै छ ।’

भविष्यका योजना

आगामी दिनमा म्युजिक भिडियोसँगै फिल्ममा करिअर बनाउने साराको योजना छ । यसबाहेक भविष्यमा छोराछोरीबाट बेवास्ता गरिएका ज्येष्ठ नागरिकका लागि सेवागृह सञ्चालन गर्ने उनी बताउँछिन् । कलाकारितासँगै समाजसेवा उनको रुचिको विषय हो ।

नयाँलाई सुझाव

मोडलिङमा आउन चाहने युवायुवतीलाई उनको सुझाव छ, ‘यो फिल्डलाई बुझेर, आइपर्न सक्ने चुनौतीको सामना गर्ने हिम्मत राखेर र मान्छे चिनेर जोडिनुहोला ।’

प्रकाशित मिति: शनिबार, कात्तिक ३०, २०७६ ०७:२५