'बंगलादेशी राष्ट्रपतिको पोखरा भ्रमणले पर्यटन प्रवर्द्धनमा सघाउ पुग्छ'

A+ A A-

चारदिने नेपाल भ्रमणमा रहेका बंगलादेशका राष्ट्रपति मोहम्मद अब्दुल हमिदले बिहीबार पोखरा भ्रमण गरेका छन् । बुधबार काठमाडौं उत्रिएका राष्ट्रपति अब्दुल हमिद ५५ जनाको टोलीसहित बिहीबार मध्यान्ह हेलिकोप्टरमार्फत पोखरा भ्रमणमा आएका हुन् ।

राष्ट्रपति अब्दुल हमिदसहितको टोलीलाई गण्डकी प्रदेश सरकारले भव्य स्वागत गर्‍याे ।

राष्ट्रपति अब्दुल हमिदले भ्रमणका क्रममा पोखराको फेवातालसहित कास्कीको रुपाकोट क्षेत्रको समेत अवलोकन गरेका छन् । उनले फेवातालमा नौका बिहारदेखि पोखरा हुँदै कास्कीको रुपाकोट गाउँपालिकाको पर्यटकीय स्थलको समेत अवलोकन गरेर बिहीबारै काठमाडौं फर्किएको गण्डकी प्रदेश सरकारका प्रवक्ता रामशरण बस्नेतले बताए ।

प्रवक्ता बस्नेतले राष्ट्रपति अब्दुल हमिदको पोखरा भ्रमणले पोखरामा बाह्य पर्यटकहरूको आगमन बढ्ने अपेक्षा गरिएको बताए । ‘बंगलादेशका राष्ट्रपतिको पोखरा भ्रमणपछि पोखरामा आन्तरिक तथा बाह्य पर्यटकको संख्यामा वृद्धि हुनेमा हामी विश्वस्त छौं,’ उनले भने, ‘भ्रमणले यस क्षेत्रको पर्यटन प्रवर्द्धनमा टेवा पुग्ने विश्वास लिएका छौं ।’

नेपाल सरकारले २० लाख पर्यटक भित्र्याउने लक्ष्यसहित मनाउन लागेको ‘नेपाल भ्रमण वर्ष २०२०’ कार्यक्रमलाई सफल पार्न राष्ट्रपति अब्दुल हमिदको भ्रमणले ठूलो टेवा पुग्ने विश्वास गरिएको उनको भनाइ थियो ।

उनले भने, ‘राष्ट्रपतिजस्ता उच्चपदस्थ व्यक्तित्वहरूको भ्रमणले नेपालको शान्तिसुरक्षा चुस्त रहेको सन्देश विश्वभरि दिनेछ, जसले गर्दा पर्यटन प्रवर्द्धनमा ठूलो महत्त्व राख्दछ ।’ बंगलादेशका राष्ट्रपति हमिद फेवातालमा डुंगा सयरसँगै माछापुच्छ्रेलगायतका हिमशृंखलाहरूको दृश्यावलोकनपछि उनीसहितको टोली रुपाकोट गाउँपालिकास्थित रुपाकोट रिसोर्टमा पुगेकाे थियाे ।

राष्ट्रपति हमिदको पोखरा भ्रमणका क्रममा सुरक्षा व्यवस्था मजबुत पारिएको कास्कीका प्रमुख जिल्ला अधिकारी रमेशकुमार केसीले बताए । राष्ट्रपति हमिदको भ्रमणले पोखराको पर्यटन प्रवर्द्धनमा ठूलो प्रभाव पार्ने पोखराका पर्यटन व्यवसायी दिनेश शर्माले बताए । ‘बंगलादेशका राष्ट्रिपतिको भ्रमणपछि बंगालादेशी पर्यटकहरूको नेपाल भ्रमणमा वृद्धि हुनेछ,’ उनले भने, ‘उच्च ब्यक्तित्वहरूको भ्रमण सूचीमा नेपाल परेपछि अन्य देशका नागरिकहरूले समेत भ्रमणमा नेपाललाई छनोट गर्नेमा शंका छैन ।’

राष्ट्रपति हमिदलाई पोखरा विमानस्थलमा गण्डकी प्रदेश प्रमुख अमिक शेरचन, कार्यवाहक मुख्यमन्त्री किरण गुरुङलगायतले भव्य स्वागत गरेका थिए ।

त्यसैगरी, रुपाकोट रिसोर्टबाट गण्डकी प्रदेशका आन्तरिक मामिला तथा कानुनमन्त्री हरिबहादुर चुमान, सरकारका प्रवक्ता बस्नेतसहितको टोलीले बिदाइ गरेको हो ।

राष्ट्रपति हमिदलाई पोखरामा स्वागत गर्न विभिन्न ठाउँहरूमा फूलसहितको घडाले स्वागत गरिएको थियो । पोखरा विमानस्थलमा उनलाई पञ्चेबाजासहित फूलमालाले स्वागत गरिएको थियो ।

प्रकाशित मिति: बिहीबार, कात्तिक २८, २०७६ १९:३९