उत्तर–दक्षिण कोरियाको सीमा नदीमा पानीसँगै रगत बगिरह्यो...

A+ A A-

उत्तर र दक्षिण कोरियाको सीमानजिक रहेको एउटा नदी रगतले पूरा रातो भयो । नदी नै रातो हुनेगरी रगत बगेपछि चर्चाको विषयसमेत बन्यो ।

दक्षिण कोरियामा अफ्रिकन स्वाइन फिबर फैलिने खतरा पैदा भएका कारण दक्षिण कोरियाली प्रशासनले यसलाई रोक्नका लागि ४७ हजार सुँगुर मार्न आदेश दिएको थियो । तर, वर्षाका कारण सीमानजिक रहेको डम्पिङ ग्राउन्डबाट रगत बगेर नजिकै रहेको सानो नदी इमजिनमा मिसियो । अफ्रिकन स्वाइन फिबर सुँगुरमा लाग्ने अत्यन्तै संक्रामक रोग हो ।

यसबाट सुँगुरहरु नबच्ने भए पनि मानिसमा भने त्यस्तो खतरा हुँदैन । स्थानीय अधिकारीहरूले रगतका कारण अन्य जनावरमा समेत खतरा हुने कुरा अस्वीकार गरेका छन् । उनीहरूले सुँगुर मार्नुभन्दा अघि नै तिनीहरूमा संक्रमणको उपचार गरिएकाे दाबी गरेका छन् ।

गत साता सुँगुर मार्ने अभियान नै चलाइएको थियो । त्यसरी मारिएका सुँगुर दुई कोरियाको सीमा क्षेत्रमा रहेको डम्पिङ ग्राउन्डमा ट्रकमा छाडिएको थियो ।

तिनीहरूलाई गाड्नका लागि आवश्यक पर्ने प्लास्टिक कन्टेनर बनाउन ढिला भएपछि मृत सुँगुरलाई तत्काल गाड्न नपाइएको हो । दक्षिण कोरियाली सेनाले सीमाक्षेत्रमा रहेको असैन्य क्षेत्रलाई पार गर्ने कुनै पनि जनावर मार्न पाउने अनुमति दिएको छ ।