ट्रम्पमाथि महाअभियोग बारेको सार्वजनिक सुनुवाइ सुरु

A+ A A-

अमेरिकी राष्ट्रपति डोनल्ड ट्रम्पमाथि महाअभियोग लगाउनेसम्बन्धी अनुसन्धानका क्रममा पहिलो पटक सार्वजनिक सुनुवाइ सुरू भएको छ ।

ट्रम्पमाथि आगामी निर्वाचनमा पुनः निर्वाचित हुने सम्भावना बढाउनका लागि युक्रेनसँग अनुचित तरिकाले सहयोग मागेको आरोप लागेको छ । उनले भने आफूमाथिको आरोप अस्वीकार गर्दै आएका छन् ।

सार्वजनिक सुनुवाइका क्रममा उनीविरुद्धका सबै प्रमाणहरूको प्रत्यक्ष प्रसारण गरिनेछ । सुनुवाइका क्रममा युक्रेनका लागि कार्यवाहक राजदूत बिल टेलरले बयान दिएका छन् ।

बन्द कोठाको सुनुवाइमा टेलरले राष्ट्रपति ट्रम्पले आफ्ना प्रतिद्वन्द्वी डेमोक्रेटिक नेता जोए बिडेन र उनका छोरा हन्टरविरुद्ध भ्रष्टाचारसम्बन्धी अनुसन्धान गर्न आग्रह गर्दै त्यसो नगरे अमेरिकी सहयोग रोक्ने धम्की दिएको बताएका थिए । उनले सार्वजनिक सुनुवाइका क्रममा सोही कुरालाई दोहोर्‍याउने देखिएको छ ।

रिपब्लिकन र डेमोक्रेट दुवै पार्टीले ट्रम्पमाथि महाअभियोगको विषयलाई लिएर उत्तेजक भाषा प्रयोग गर्दै आएका छन् ।

रिपब्लिकनहरूले ट्रम्पले कार्यभार सम्हालेकै दिनदेखि उनलाई ‘कु’ गर्ने प्रयास गरेको डेमोक्रेटिक पार्टीमाथि आरोप लगाउँदै आएको छ ।

संसद्‌को तल्लो सदनको जासुसीसम्बन्धी समितिका अध्यक्ष डेमोक्रेटिक नेता एडम शिफले यसअघि ट्रम्पले युक्रेनी राष्ट्रपति भोलोदिमिर जेलेन्स्कीबीचको फोन संवादलाई ‘परम्परागत गुन्डाहरूबीच भएको कुराकानी’ को संज्ञा दिएका थिए ।

सुनुवाइमा संलग्न समितिका रिपब्लिकन सदस्य एरिक साल्वेलले भने, ‘प्रत्यक्षदर्शीहरूका निम्ति अमेरिकी जनताअगाडि प्रस्तुत हुने र उनीहरूको यो धन्दामा जे देखियो त्यो सबैलाई भन्ने बेला आएको छ।’