बुटवलमा चार लेनको सडक विस्तारले लियो गति

A+ A A-

बुटवलले आन्तरिक बाइपास सडकहरूलाई विस्तार र स्तरोन्नतिका काम तीव्र पारेको छ । सोही क्रममा यहाँको मुख्य आन्तरिक बाइपासका रूपमा रहेको कालिका पथको विस्तारको काम सुरू भएको छ ।

बुटवल उपमहानगरपालिकाले बुटवलका ९ र ११ वडामा पर्ने कालिकापथ सडकको निर्माण कार्य तीव्र पारिएको जनाएको छ । सडक क्षेत्रलाई ८२ फुट कायम गरी चार लेनको रूपमा विस्तार हुन लागेको उक्त सडकमा अहिले डोजरहरू चलाई निर्माण कार्य अगाडि बढाएको छ ।

पहिलो चरणमा सडक क्षेत्रभित्र पर्ने भौतिक संरचना भत्काएर नाली निर्माण गरिनेछ । तीन किलोमिटरभित्र पर्ने उक्त बाटो ८२ फुट रहनेछ ।

तीनै तहका सरकारको संयुक्त लगानीमा निर्माण हुन लागेको उक्त सडकको लागत ६३ करोड रुपैयाँ रहेको छ । पुरानो बसपार्क अर्थात् कृषि उपज केन्द्र परिसरदेखि योगीकुटीसम्मको भित्री सडक कालिका पथलाई ८२ फुटको कायम गर्दै स्तरोन्नतिको काम सुरू भएको बुटवल उपमहानगरपालिकाका नगरप्रमुख शिवराज सुवेदीले बताए । यो सडक आन्तरिक बाइपासमध्येकै सबैभन्दा स्तरीय सडक बन्ने विश्वास गरिएको छ ।

बुटवलले यो सडकको विस्तृत परियोजना प्रतिवेदन (डीपीआर) नै बनाएर नमूना सडक बनाउन थालेको हो । डीपीआरमा झण्डै एक अर्ब लागत र तीन वर्षको अनुमान गरिए पनि लागत र समय दुवै घट्न सक्ने बताइएको छ । २०५४ सालमा यो सडकलाई ८२ फुटको कायम गर्ने गरी मापदण्ड बनाइएको थियो । यद्यपि केही व्यक्तिहरूले सडक विस्तारका काममा अवरोध सिर्जना गरेकाले उतिबेलै योजनामा परेको सडक विस्तार ढिलो गरी मात्रै सुरू भएको छ ।

उपमहानगरका उपप्रमुख गोमादेवी आचार्यले नगवासीहरूकै सहकार्यमा योजनाहरूको सफल कार्यान्वयन गरिने बताउँदै दिर्घकालीन योजनाअनुरूप पूर्वाधार विकासका कामहरू भइरहेको बताइन् । उनले वैकल्पिक मार्गहरूको स्तरोन्नति गर्ने, विस्तार गर्ने, नमूना पिच गर्नेदेखि सहायक मार्गमा पुल र आकाशे पुल निर्माण गर्नेसम्मका योजनाहरू धमाधम कार्यान्वयन भइरहेको जानकारी दिए ।

बुटवलको ११ देखि १९ वडाका विभिन्न टोलहरू जोड्ने ग्रामीण सडक उपमहानगरले स्तरोन्नति गर्दै ग्राभेल गरेको छ भने तीमध्ये केही सडकमा पिचको काम सुरू भएको छ । त्यस्तै, वडा नं. १ देखि १० सम्मका भित्री सडकहरू स्तरोन्नति गर्नेदेखि मर्मत सम्भार गर्नेसम्मका काम चलिरहेका छन् । यीमध्येका बाइपास सडकहरूमा क्षेत्राधिकार छुट्याएलगत्तै कालोपत्रे गर्ने गरी विस्तारका काम अगाडि बढ्ने बताइएको छ ।

बुटवल– ११ का अधिकांश सडकहरूको स्तरोन्नति भएको छ । यहाँ गतआवमा सञ्चालित करिब १ सयवटा योजनामा सडक विस्तार र स्तरोन्नतिका योजना धेरै छन् । नमूना पिच, नमूना नाली निर्माण, ठूला बस्ती जोड्ने पुल निर्माणदेखि ढल निकासका कामहरू भएको वडा अध्यक्ष रामचन्द्र क्षत्रीले जानकारी दिए ।

मापदण्डअनुरूपको सडक कायम गर्नका लागि अहिले प्राविधिकसहितको विशेष टोलीले विभिन्न सडक खण्डहरूको अध्ययन गरिरहेको बुटवलका प्रमुख प्रशासकीय अधिकृत चक्रपाणि शर्माको भनाइ छ । संघ, प्रदेश सरकार र जनसहभागितामा सडक स्तरोन्नतिका कामहरू भइरहेका छन् ।

उपमहानगरपालिकाका वरिष्ठ इन्जिनियर तथा शहरी पूर्वाधार विकास महाशाखा प्रमुख सुमन श्रेष्ठले बुटवलका मुख्य वैकल्पिक मार्गहरूलाई सडक क्षेत्राधिकार कायम गर्दै विस्तार र स्तरोन्नति गर्ने काम भइरहेको जानकारी दिए । उनले बाइपास सडकहरूलाई बुटवलको चक्रपथसँग जोड्ने गरी काम भइरहेको छ ।

प्रकाशित मिति: आइतबार, कात्तिक २४, २०७६ १६:४७