रोनाल्डो युभेन्टस गएको एक सिजनपछि मेस्सीद्वारा कीर्तिमान बराबर

A+ A A-

समकालीन विश्व फुटबलमा लियोनल मेस्सी र क्रिष्टियानो रोनाल्डोमध्ये को ठूलो खेलाडी भन्ने बहस हुने गरेको छ । हुन पनि यी दुई खेलाडीबीच एक दशकदेखि निरन्तर प्रतिस्पर्धा चल्दै आएको छ ।

फूटबलका हस्ती, खेलाडी र दर्शकबीच हरबखत चलिरहने विवाद हो, ‘मेस्सी महान् कि रोलाल्डो ?’ दुवैले समान ५/५ वटा बालोन डि’ओर जितेका छन् । फिफा वेस्ट प्लेअरमा भने मेस्सी रोनाल्डो भन्दा अगाडि छन् ।

मेस्सीले ६ पटक फिफा बेस्ट प्लेयरको उपाधी जितेका छन् भने रोनाल्डोले ५ पटक उपाधी चुमेका छन् ।

सन् २००९ मा म्यान्चेस्टर युनाइटेडबाट रोनाल्डो स्पेनिस क्लब बार्सिलोना गएपछि मेस्सीसँग खास भिडन्त सुरु भएको हो । तर रोनाल्डोले आफ्नो प्रतिभा युनाइटेडमै रहेर पनि देखाइसकेका थिए ।

बार्सिलोना तथा अर्जेन्टिनाका कप्तान मेस्सी यस्ता खेलाडी हुन्, जसले क्लब फुटबलमा अब जित्न बाँकी सायदै कुनै उपाधी छैन ।

तर उनले राष्ट्रका लागि २००८ को ओलम्पिकमा स्वर्ण पदक जित्नुबाहेक अन्य उपलब्धी हात पार्न सकेका छैनन् । रोनाल्डोले भने पोर्चुगललाई एक पटक युरोपेली च्याम्पियन बनाएका छन् ।

स्पेनिश ला लिगामा एक दशकदेखि यी दुई खेलाडी हरेक सिजन प्रतिस्पर्धामा रहे । कुनै सिजन मेस्सी र कुनै सिजन रोनाल्डो अघि रहे । यतिबेला फेरि एक पटक मेस्सी र रोनाल्डोको चर्चा भएको छ ।

रोनाल्डो ला लिगा छाडेर इटालियन क्लब युभेन्टस गएको एक सिजनपछि मेस्सीले ह्याट्रिकमा रोनाल्डोको कीर्तिमान बराबरी गरे । शनिबारराति भएको खेलमा सेल्टा डि भिगोमाथि ४–१ को जित निकाल्ने क्रममा मेस्सीले ह्याट्रिक गरेका हुन् ।

सानै उमेरमा बार्सिलोनामा जोडिएका उनले १६ अक्टोबर, २००४ मा बार्सिलोनाका लागि पहिलो खेल खेलेका थिए ।

त्यसयता उनी निरन्तर बार्सिलोनाको मुख्य हिस्सेदार बन्दै आएका छन् । ३२ वर्षीय मेस्सीले हालसम्म बार्सिलोनाबाट ला लिगामा ४५९ खेलमा ४२७ गोल गरेका छन् भने रोनाल्डोले २९२ खेलमा ३११ गोल गरेका छन् ।

मेस्सी ला लिगामा सर्वाधिक गोल गर्ने खेलाडीको सूचीको शीर्ष स्थानमा छन् भने रोनाल्डा दोस्रो स्थानमा पर्छन् । दुवै खेलाडीले ला लिगामा समान ३४ ह्याट्रिक गरेका छन् ।

रोनाल्डो गत सिजन नै रियल म्याड्रिड छाडेर युभेन्टस गएका छन् । रोनाल्डो युभेन्टस गएको एक सिजनपछि मेस्सीले ह्याट्रिकको कीर्तिमान बराबरी गरेका हुन् ।

ला लिगाका मेस्सी सर्वाधिक गोेलकर्ता भएपनि ह्याट्रिकमा भने रोनाल्डोभन्दा १६७ खेल बढि खेलेपछि उनको कीर्तिमान बराबरी गरेका हुन् ।

जुनसुकै कीर्तिमानमा पनि मेस्सी र रोनाल्डोको रस्साकस्सी देखिन्छ । मेस्सीको अनुशासित खेल र रोनाल्डोको परिश्रमलाई उनीहरुको सफलताको सुत्र मानिन्छ ।

प्रकाशित मिति: आइतबार, कात्तिक २४, २०७६ १५:३६