गौतमबुद्ध अन्तर्राष्ट्रिय विमानस्थल तीन महिना पछि धकेलिने

A+ A A-

भैरहवामा निर्माणाधीन गौतमबुुद्ध अन्तर्राष्ट्रिय विमानस्थल सञ्चालनमा आउन अब करिब ३५ दिनमात्र बाँकी छ ।

विमानस्थल निर्माण सम्पन्न गर्ने अन्तिम मिति आउँदो ३० डिसेम्बर (१४ पुस) सम्मको हो । तर आगामी डिसेम्बरसम्म विमानस्थल पूर्णरुपमा उडान भर्न योग्य भने नहुने भएको छ ।

विमानस्थलको ‘आईसीबी–वान’ अन्तरगत पूर्वाधार निर्माणको काम प्रायः सकिएपनि विद्युतीय उपकरण जडान (आईसिबी टु) का कामहरु समेत सबै सम्पन्न गर्न अझै कम्तीमा पनि तीन महिना लाग्ने देखिएको छ ।

भौतिक पूर्वाधारका मुख्य कामहरु निर्माण सम्पन्न भई फिनिसिङको काम भैरहेपनि ती पूर्वाधारहरुमा जडान हुने विद्युतीय एवम् सूचनाका उपकरण आईपुग्न ढिला हुने भएकाले डिसेम्बरको अन्तिमसम्म विमानस्थल पूर्ण रुपमा तयार नहुने आयोजनाले जनाएको छ ।

उपकरण आउन भइरहेको ढिलाइले विमानस्थल सञ्चालनमा आउने समयसीमा ३ महिना पछाडि धकेलिने संकेत देखिएको छ । युुरोपका विभिन्न देशबाट मगाइएका उपकरण नेपालमा आउन अझै कम्तिमा एक महिना लाग्ने छ ।

विमानस्थलका आयोजना प्रमुुख तथा इन्जिनीयर प्रवेश अधिकारीले उपकरण जडान र रंगरोगनको काम बाँकी रहेको बताए । उपकरण जडान गरेपछि मार्च अन्तिमबाट पूर्णरुपमा विमानस्थल सञ्चालनमा आउने उनले बताए ।

यसबारे नागरिक उडड्यन प्राधिकरण र आयोजनाबीच छलफल भइरहेको उनको भनाई छ ।

टावरका सामान, ब्यागेज कलेक्सन (कन्भेयर बेल्ट), युपीएस, प्यासेन्जर इन्फरमेशन डिस्प्ले बोर्ड, फ्लाइट इन्फरमेशन सिस्टम डिस्प्ले बोर्ड, फायर अर्लाम सिस्टम, स्मोक डिटेक्टर सिस्टम, कम्युनिकेशन नेभिगेशनका उपकरण, लिफ्ट, एक्सरे मेशिन र अन्य उपकरणहरु आउन बाँकी छन् ।

यद्यपि डिसेम्बर ३१ सम्म (आईसीबी वान अन्तरगतका) भौतिक पूर्वाधारका आगमन तथा प्रस्थान भवन, कन्ट्रोल टावर, प्रशासकीय भवन, धावन मार्ग, एप्रोन, ट्याक्सी वे सबैको निर्माण सम्पन्न हुनेछ ।

भौतिक प्रगति ८५ प्रतिशत

विमानस्थलको हालसम्म भौतिक निर्माणको प्रगति ८७ प्रतिशत सकिएको छ । आयोजना प्रमुुख अधिकारीले बाँकी काम मध्ये १० प्रतिशत उपकरण जडान र ३ प्रतिशत अन्य काम बाँकी बताए ।

स्थानीय स्तरबाट कुनै पनि अवरोध नभएको र निर्माणको ठेक्का पाएको चिनियाँ नर्थ वेस्टले काम धमाधम गरेकाले भौतिक पुर्वधारको प्रगति उल्लेख्य रहेको उनले बताए ।

अवरोधबीच तयार हुँदै छ विमानस्थल

२०७१ सालबाट निर्माण सुरु गरिएको विमानस्थल २०७४ सालमै सम्पन्न हुनुपर्ने थियो ।

तर निर्माण कम्पनीको ढिलासुस्ती, मुख्य ठेकेदार र स्थानीय आपूर्तिकर्ताबीच आपसी मतभेद, तराई–मधेश आन्दोलन, भारतीय नाकाबन्दी, नदीजन्य सामग्रीको अभावजस्ता कारणले आयोजना निकै पछि धकेलिदै आएको छ ।

यसअघि २ पटकसम्म म्याद थप गरिएको थियो । पछिल्लो समय तेश्रो पटक निर्माण सम्पन्न हुने समय थप गरी २०१९को डिसेम्बर ३१ सम्म पु¥याइएको हो । सो विमानस्थलको तत्कालीन प्रधानमन्त्री सुुशील कोइरालाले २०७१ माघ १ गते शिलान्यास गरेका थिए ।

कति हो लागत ?

निर्माणधीन विमानस्थलको कुल लागत ६ अर्ब २२ करोड हो । यो रकम जग्गा अधिकरण बाहेकको रहेको आयोजनाले बताएको छ । एडिको ४० प्रतिशत ऋण र १८ प्रतिशत अनुदानमा यो विमानस्थल बन्दै छ ।

विमानस्थल पूर्णरुपले सञ्चालनमा आएपछि दैनिक १५ हजारभन्दा बढी यात्रुहरुलाई सेवा दिन विमानस्थल तयार हुनेछ ।

त्यो बोहक विमानस्थलमा सौर्य उर्जामार्फत १० मेघावाट विद्युत् उत्पादन गर्ने गरी काम अगाडि बढाइएको छ । प्रमुख प्रवेश अधिकारीले एडीबीको अनुदानमा सौर्य ऊर्जा जडान गरिने बताए ।

निजी क्षेत्र उत्साहित

निर्माणाधीन विमानस्थल कहिले सम्पन्न हुन्छ भन्ने व्यग्र प्रतिक्षामा यहाँका उद्योगी, व्यवसायी एवं पर्यटन व्यवसायीहरु रहेका छन् । विमानस्थललाई लक्षित धमाधम रुपन्देहीमा लगानी भित्रिएको छ भने पर्यटककै लागि ठूला र स्तरीय होटलहरु समेत थपिने क्रम बढ्दै छ ।

होटल तथा रेष्टुरेन्ट व्यवसायी संघका अध्यक्ष समुन्द्र जिसीले विमानस्थल पूर्णरुपमा सञ्चालन भएपछि आउने पर्यटकहरुको सुविधालाई ध्यानमा राख्दै रुपन्देहीमा होटलहरु धमाधम खुलेको बताए ।

प्रकाशित मिति: शुक्रबार, कात्तिक २२, २०७६ १४:१०