तालिम लिन इटाली गएका यातायातका हाकिम स्वीट्जरल्याण्डमा

A+ A A-

सवारीचालक अनुमतिपत्र नपाएर सात लाख सेवाग्राही समस्यामा परिरहेका बेला यातायात व्यवस्था विभागका महानिर्देशक गोगनबहादुर हमाल आधा दर्जन कर्मचारी लिएर विदेश भ्रमणमा निस्किएका छन् ।

सरकारले स्मार्ट लाइसेन्स दिने भन्दै करिब ७ करोड रुपैयाँमा खरिद गरेको मेसिन बनाउन छाडेर मेसिन चलाउने तालिम भन्दै प्रशासन सेवाका कर्मचारी र मन्त्रीका पीएलाई लिएर महानिर्देशक हमाल विदेश भ्रमणमा गएका हुन् ।

प्राविधिकले लिनुपर्ने तालिम लिन महानिर्देशक हमालसहितको टोली इटालीको तालिममा मात्र सहभागी भएन, स्वीट्जरल्याण्डका शहर घुम्नसमेत भ्यायो ।

यातायात व्यवस्था विभागले १ वर्षअघि मास स्मार्ट लाइसेन्स प्रिन्ट गर्ने मेसिन ७ करोड रुपैयाँमा खरिद गरिएको थियो । मेसिनका लागि आवश्यक रिबन खरिद नगर्दा हाल ७ लाखभन्दा बढी सेवाग्राही स्मार्ट लाइसेन्स लिन रसिद लिएर बसेका छन् ।

भौतिक पूर्वाधार तथा यातायात व्यवस्था मन्त्रालय स्रोतका अनु्सार मास स्मार्ट लाइसेन्स प्रिन्ट गर्ने मेसिन संचालनको तालिम लिन भन्दै महानिर्देशक हमालले प्राविधिक कर्मचारीलाई उपेक्षा गर्दै प्रशासनिक कर्मचारीलाई इटाली भनेर लगेका थिए । तर, इटाली भनेर विदेश गएका कर्मचारी स्वीट्जरल्याण्ड घुम्न व्यस्त देखिएका छन् ।

मास प्रिन्टर सञ्चालन गर्ने ज्ञान नहुँदा अझै ७ लाखभन्दा बढी सेवाग्राहीले स्माट लाइसेन्स पाएका छैनन् । मेसिनले तीन वर्षमा १० लाख मात्र लाइसेन्स प्रिन्ट गरेको छ ।

स्रोतका अनुसार छपाइ तालिम लिन इटाली जाने टोलीमा मन्त्रालयका प्रशासन प्रमुख सहसचिव राजेश्वर ज्ञवाली, गत भदौ पहिलो साता विभागका महानिर्देशक भएका हमाल, भदौमा सरुवा भएर आएका विभागका निर्देशक बन्धु बाँस्तोला, मन्त्रालयकी सडक इन्जिनियर सहसचिव प्रमिला वज्राचार्य छन् ।

मन्त्री महासेठका स्वकीय सचिव लालबन्दीका सोमराज बराल र दाङ स्थायी घर भएका कम्प्युटर इन्जिनियर केशवराज गौतम पनि तालिममा गएका छन् । तालिममा गएका कर्मचारीमध्ये गौतम मात्र सम्बन्धित फाँटका पर्छन् ।

‘अहिले विदेश गएका कर्मचारीहरूमा एक जनाबाहेक अरुले भने स्मार्ट कार्ड छपाइ गर्ने मेसिन चलाउन त परै जाओस्, देखेका समेत छैनन्’ मन्त्रालयका एक कर्मचारीले शिलापत्रसँग भने ।

भौतिक पूर्वाधार तथा यातायात व्यवस्थामन्त्री रघुवीर महासेठले तामिलममा लाइसेन्स प्रिन्ट गर्ने मेसिनको अनुहार नै नदेखेका प्रशासनिक कर्मचारीलाई यूरोपको भ्रमणको अवसर प्रदान गर्न दबाब दिएपछि महानिर्देशक हमालले मन्त्रीका पीएलाई नै लगेका थिए ।

गत १३ कात्तिकमा गएका हमाल बिहीबार नेपाल फर्किसकेका छन् । अन्य कर्मचारी भने यूरोपका अन्य देशको भ्रमणमै रहेको स्रोतको दाबी छ ।

मेसिनमा कार्ड छाप्न कलर प्रिन्ट गर्न आवश्यक पर्ने रिबन नै खरिद नगर्दा मेसिन विगत दुई महिनादेखि थन्किएर बसेको छ ।

प्रकाशित मिति: बिहीबार, कात्तिक २१, २०७६ १६:०९