प्रदेश १ मा तिहार : खुकुरी हानाहानदेखि अत्यधिक रक्सी खाएर मृत्युसम्म

A+ A A-

यसपटक तिहारमा प्रदेश १ मा जुवातास, झैझगडा, चोरी लुटपाटजस्ता सामाजिक अपराधका घटनामा कमी आएको प्रहरीले जनाएको छ । प्रदेश प्रहरी कार्यालय विराटनगरका प्रवक्ता प्रहरी वरिष्ठ उपरीक्षक शेखर कोइरालाका अनुसार यो अवधिमा सुनसरीको धरान क्षेत्रमा मात्र घरेलु हात हतियारहरु देखाएर धाकधम्की तथा लुटपाट गर्न खोज्ने र ज्यान मार्ने धम्की दिने ५ जनालाई हतियारसहित पक्राउ गरिएको छ ।

त्यस्तै, ठूलो रकमको बाजी राखी जुवातास खेल्ने र खेलाउने ५८ जुवाडेलाई नियन्त्रणमा लिइएको छ । जुवा खालबाट ३० बुक तास, १६ थान कौडा र नगद ८ लाख ४३ हजार ५ सय ८२ रुपैयाँसमेत बरामद गरिएको छ ।

दीपावली भरिमा १ लाख १८ हजार बराबरको पटका र पटका ओसारपसारमा संग्लग्न २ जनालाई नियन्त्रणमा लिइएको कोइरालाले बताए ।

सवारीसाधनको व्यवस्थापन, विभिन्न स्थानमा सवारी चालक तथा यात्रुहरुलाई सचेतना जगाउने उदेश्यले चेतनामूलक कार्यक्रम सञ्चालन गरिएको थियो ।

दिपावालीको अवधिभर मादक पदार्थ सेवन, चालक तथा यात्रुको लापरवाही, तीव्र गति, सडकको दुरावस्था, पर्याप्त सवारीको अभावजस्ता कारणबाट १ नम्बर प्रदेमा ७ बस, एक माइक्रो, कार, ट्याक्टर, तीनवटा टेम्पो २६ मोटरसाइकल र दुई साइकल गरी ४१ सवारी साधन दुर्घटनामा परेका थिए ।

सो दुर्घटनामा ६ जनाले ज्यान गुमाएका छन भने ५३ जना घाइते भएका छन् । यसैगरी, दिपावलीभर प्रदेशका विभिन्न स्थानमा ११ जनाले झुण्डिएर र ३ जनाले विष खाएर आत्महत्या गरेका छन् । झुण्डिएर आत्महत्या गर्ने क्रममा २ जना र विष खाएर १४ जना घाइते भएका छन् । यो अवधिमा विभिन्न स्थानबाट लडेर ४ जनाको मृत्यु भएको छ । रक्सी खाएर झैझगडा हुँदा एकजनाको मृत्यु भएको छ । २० जना घाइते भएका छन् ।

दिपावली गर्ने क्रममा ५ घरमा आगलागी हुँदा ४२ लाख बराबरको क्षति भएको छ । यस्तै विद्युत सर्ट भएर १० घरमा आगलागी भएको र अन्दाजी १ करोड ४५ लाख बराबरको क्षति भएको छ । आगलागीमा परी २ जनाको मृत्यु र ३ जना घाइते भएका छन् ।

अत्याधिक मादक पदार्थ सेवनका कारण एक जनाको मृत्यु भएको छ । यसैगरी, पानीमा डुबेर एक बालकको मृत्यु भएको छ ।

दीपावालीकै समयमा मादक पदार्थ सेवन गरी एक आपसमा झैझगडा भइ खुकुरी हानाहान हुँदा ४ जना घाइते भएका थिए । यस्तै ४ वटा जबर्जस्ती करणीका घटना भएको छ । नदीले बगाएर एकजना जना बेपत्ता भएका छन् ।

प्रकाशित मिति: मंगलबार, कात्तिक १९, २०७६ १७:१२