७८ जना न्यायाधीश छानबिनको घेरामा

A+ A A-

आजको राजधानी दैनिकले न्यायाधीशमाथिको छानविनका बारेमा प्रमुख समाचार प्रकाशित गरेको छ । सर्वोच्च अदालतको पद बहालपछि प्रधानन्यायाधीश चोलेन्द्र शम्शेर जबराले न्यायालयभित्रको बेथिति हटाउनका लागि सूक्ष्म अनुगमन थाल्दै आएका छन् ।

न्यायालयमा न्यायाधीशबाटै बेथिति भएको निष्कर्षसहित उनले कार्यसम्पादन मूल्यांकन हेरेर न्यायाधीशको काज सरुवा र स्पष्टीकरण लिइरहेका छन् । न्यायपरिषद् सचिवालयले न्याय सम्पादनमा गम्भीर त्रुटि गर्ने ७८ जना न्यायाधीशविरुद्धको उजुरीका विषयमा छानबिन सुरु गरेको छ ।

यसअघि न्यायपरिषद्ले विराटनगर उच्च अदालतका पाँच जना न्यायाधीशलाई बदनियत राखेर न्याय सम्पादन गरेको भन्दै न्यायपरिषद् सचिवालय काजमा झिकाएको थियो ।

३३ किलो सुनकाण्डका अभियुक्तलाई सामान्य धरौटीमा छाड्ने विराटनगरका मुख्य न्यायाधीश कुलरत्न भुर्तेल, नागेन्द्रलाभ कर्ण, थीरबहादुर कार्की, सारंगा सुवेदी, उमेशकुमार सिंह, उमेशराज पौडेल, साधुराम सापकोटा र जनक पाण्डेलाई न्यायपरिषद् सचिवालयमा तानेको थियो । सुन तस्करीमा भरियालाई दोषी देखाएर मुख्य अभियुक्तलाई छाडेको भन्दै सचिवालयले मिसिल मागेर छानबिन गरिरहेको छ ।

न्यायपालिकामा हुने विकृति रोक्नका लागि प्रधानन्यायाधीशले उजुरी परेकामध्ये माघ पहिलो साता न्यायपरिषद् काजमा तानिएका तनहुँ जिल्ला न्यायाधीश ओमकर उपाध्यायले गरेको न्याय सम्पादनमा गम्भीर त्रुटि भेटिएको भन्दै स्पष्टीकरण सोधेको थियो ।