राष्ट्रपति ट्रम्पका कारण अमेरिकी कूटनीतिज्ञ खतरामा !

एक पूर्व अमेरिकी राजदूतले राष्ट्रपति डोनाल्ड ट्रम्पले टेलिफोन सम्बादमा गरेको अस्पष्ट टिप्पणीका कारण आफूले खतरा महसुस गरेको बताएकी छन् ।

अमेरिकी राष्ट्रपति डोनल्ड ट्रम्पमाथि महाभियोग लगाउने विषय तीव्र गतिमा अघि बढिरहेका बेला पूर्व अमेरिकी राजदूतको यस्तो भनाई बाहिर आएको हो ।

युक्रेनका लागि अमेरिकाकी पूर्व राजदूत मुरी युभानोभिचले कंग्रेसलाई युक्रेनका नेतासँग टेलिफोन वार्ताका क्रममा ट्रम्पले गरेको टिप्पणीले आफूलाई ‘निकै चिन्तित बनाएको’ बताएकी छन्।

‘उनी, युभानोभिच केही कुराहरूबीचबाट गुज्रिनुपर्ने छ,’ ट्रम्पले आफ्ना युक्रेनी समकक्षीलाई संवादका क्रममा भनेका थिए ।

डेमोक्रेटिक पार्टीले हालैमात्र गोप्य रुपमा गरिएको कुराकानीको विवरण सार्वजनिक गरेको छ । रिपब्लिकन पार्टीबाट राष्ट्रपति निर्वाचित भएका ट्रम्पले आफ्ना राजनीतिक प्रतिद्वन्द्वी जोए बिडेन र युक्रेनको एउटा ग्यास कम्पनीमा काम गरेका उनका छोरा हन्टर बिडेनमाथि भ्रष्टाचारको विषयमा छानबिन गर्न युक्रेनको सरकारलाई दबाब दिने कोसिस गरेको आरोप लगाइएको छ।

गत २५ जुलाईमा युक्रेनी राष्ट्रपति भोलोदिमिर जेलेन्स्कीसँगको कुराकानीका क्रममा ट्रम्पले आफूबारे भनेका कुराका कारण आफू ‘स्तब्ध’ भएको उनले बताएकी हुन् ।

‘उनले के भन्न खोजेका थिए भन्नेबारे मैले केही बुझिनँ,’ युभानोभिचले भनिन्। म धेरै चिन्तित थिएँ। म अझै छु।’ गत अक्टोबरमा युभानोभिचले दिएको बयान अहिले सार्वजनिक गरिएको हो।

बयानका क्रममा युरोपेली संघका लागि अमेरिकी राजदूतसँग सल्लाह माग्दा उनले युभानोभिचलाई ट्विटमार्फत ट्रम्पको प्रशंसा गर्न भनेको उल्लेख गरिएको छ। त्यस्तो सुझाव पालना गर्न नसक्ने उनले बताएकी छिन् ।

प्रकाशित मिति: मंगलबार, कात्तिक १९, २०७६ ०७:३०