सकिए पर्व, रित्तिए गाउँ

A+ A A-

दसैं तिहार र छठ सकिएसँगै सुदूरपश्चिमका गाउँहरू खाली हुन थालेका छन् । दसैं तिहार, छठलगायतका पर्व मनाउन गाउँ पुगेका मानिसहरू कर्मथलो फर्किन थालेका कारण गाउँ पुनः सुनसान बन्न थालेका छन् ।

पर्व मनाउन गाउँ फर्किएका अहिले कर्मथलोमा जान थालेका कारण गाउँहरू सुनसान जस्तै बनेका छन् । दसैं तिहारमा गाउँमा आएकाहरू अहिले कर्मथलोमा फर्किन थालेका कारणले गाउँहरू खाली हुन थालेको कालिकोट नरहरिनाथ गाउँपालिका–५ का रामबहादुर बोगटीले बताए । ‘दसैं तिहार मनाउन गाउँमा आएकाहरू अहिले कर्मथलोमा फर्किन थालेका छन्,’ उनले भने, ‘अहिले गाउँहरू पूरै खाली छन् ।’

दसैं तिहार मनाउन गाउँमा पसेका कर्मचारी, विद्यार्थी र गाउँका मानिसहरू रोजगारीका अयन्त्र जान थालेका कारण गाउँ अहिले बुढाबूढी केटाकेटी मात्र भेटिने गरेको कालिकोट पचालझरना गाउँपालिका अध्यक्ष खड्कबहादुर सेजुवालले बताए ।

‘गाउँमा अहिले केटाकेटी र बुढाबुढी मात्र देखिन थालेका छन्,’ उनले भने, ‘दसैं तिहार मनाउन गाउँमा आएकाहरू अहिले रोजगारीलगायतका कामले अन्यत्र जान थालेका छन् ।’

दसैं तिहारका बेला भरिभराउ गाउँ पुनः रित्तो बनेको सुर्खेत बराहताल गाउँपालिका–७ का जगत बडुवालले बताए । बडुवाल भन्छन्, ‘दसैं तिहारका बेला गाउँ रंगीचंंगी थिए अहिले रित्ता भए ।’

गाडी पाउनै मुश्किल

गाउँघरबाट शहर र रोजगारीका लागि बाहिर जानेको संख्या वृद्धि भएका कारण अहिले सवारीसाधनमा सिट पाउनै मुश्किल हुन थालेको छ ।

कालिकोटबाट काठमाडौं जाने टिकट नपाएर गाडी रिजर्भ गरेको खाँडाचक्र नगरपालिका–१ का जयन्ती शाहीले बताइन् । ‘१८ गते काठमाडौंका स्कुलहरू खुल्ला हुँदैछन्,’ उनले भनिन्, ‘कालिकोटबाट आउँदा गाडी रिजर्भ गरेर आयौं । सुर्खेतबाट काठमाडौं जाने गाडीको टिकट पनि पाउन सकेको छैन् ।’

अहिले बसपार्कहरूमा यात्रुहरूको चाप निकै हुने गरेको र टिकट पाउनै मुश्किल रहेको सुर्खेत बसपार्कस्थित रारा कर्णाली यातायात प्रालिका काउन्टर इन्चार्ज अक्कल कार्की बताउँछन् ।

भरिन थाले शहर

गाउँहरू रित्तिँदै जाँदा शहर भने भरिन थालेका छन् । दसैं तिहारमा सुनसान रहेको सुर्खेतको वीरेन्द्रनगर बजारमा मानिसहरूको चाप बढ्न थालेको छ । बन्द रहेका पसल तथा अन्य व्यवसाय खुल्ला हुन थालेपछि मोफसलका शहरी क्षेत्रमा चहलपहल बढेको हो ।