पार्टी एकीकरण भएको डेढ वर्षपछि युवा संघ र वाईसीएल जिल्ला कमिटी एकीकृत

A+ A A-

तत्कालीन नेकपा एमाले र नेकपा (माओवादी) बीच पार्टी एकीकरण भएको करिब डेढ वर्षपछि युवा संगठनका जिल्ला कमिटीबीच एकीकरण भएको छ । एकीकरणपछि तत्कालीन एमालेनिकट युवा संघले ४२ वटा जिल्ला र तत्कालीन माओवादीनिकट वाईसीएलले ३५ जिल्लामा संयोजक पाएको छ ।

राष्ट्रिय युवा संघ नेपाल केन्द्रीय कमिटीको शनिबार बसेको बैठकले सबै जिल्लामा संयोजक तोकेको हो । दुवै संगठनको केन्द्रीय कमिटी एकीकरण हुँदा तत्कालीन वाईसीएलका अध्यक्ष रामप्रसाद सापकोटा ‘दीपशिखा’ ले संयोजक पाएका थिए भने युवासंघका अध्यक्ष रमेश पौडेलले सहसंयोजकको जिम्मेवारी पाएका थिए ।

युवा संघले प्रदेश, जिल्ला, महानगर तथा उपमहानगरमा इन्चार्ज तथा सहइन्चार्ज केन्द्रीय समिति सदस्य रहने निर्णय गरेको छ । संघले जिल्ला संयोजक तथा सहसंयोजक एक हप्ताभित्र टुंग्याउन साविकका संगठनहरूलाई निर्देशन दिएको छ । संयोजक र सहसंयोजक साविक संगठनको वरिष्ठता र सक्रियताका आधारमा चयन गर्ने निर्णय गरेको छ ।

संघले जनाएअनुसार साविक युवा संघले मोरङ, झापा, इलाम, खोटाङ, धनकुटा, तेह्रथुम, भोजपुर र ओखलढुंगा गरी प्रदेश एकबाट आठ जिल्ला र साविकको वाईसीएलले सुनसरी, उदयपुर, पाँचथर, सोलुखुम्बु, संखुवासभा र ताप्लेजुंग गरी ६ जिल्लामा संयोजक पाउने भएको छ ।

प्रदेश २ को पर्षा, सिरहा, रौतहट र बाराको संयोजक युवा संघले र महोत्तरी, धनुषा, सर्लाही र सप्तरीको संयोजक वाईसीलले पाएको छ ।

प्रदेश तीनमा ललितपुर, मकवानपुर, धादिङ, दोलखा, काभ्रे, भक्तपुर र नुवाकोटको संयोजक युवा संघलाई र काठमाडौं, चितवन, सिन्धुली, रामेछाप, सिन्धुपाल्चोक र रसुवाको संयोजक वाईसीएललाई दिइएको छ ।

गण्डकी प्रदेशमा नवलपुर (परासी पश्चिम), बाग्लुङ, लमजुङ म्याग्दी, मुस्ताङ र पर्वतको संयोजक युवासंघले पाएको छ भने कास्की, गोरखा, स्याङ्जा, तनहुँ र मनाङको संयोजक वाईसीएलले पाउने भएको छ ।

प्रदेश ५ को रुपन्देही, बाँके, अर्घाखाँची, गुल्मी, नवलपरासी, रोल्पा र दाङको संयोजक युवा संघलाई र कपिलवस्तु, बर्दीया, रुकुम पूर्व र पाल्पा जिल्लाको संयोजक वाईसीएललाई दिइएको छ ।

कर्णाली प्रदेशको दैलेख, जाजरकोट, हुम्ला, जुम्ला र डोल्पाका संयोजक युवा संघलाई र सुर्खेत, सल्यान, कालिकोट, रुकुम पश्चिम र मुगुको संयोजक वाईसीएललाई दिइएको छ ।

सुदूरपश्चिम प्रदेशको कैलाली, बाजुरा, अछाम, बझाङ र बैतडीको संयोजक युवा संघलाई र कञ्चनपुर, डोटी, दार्चुला र डडेलधुराको संयोजक वाईसीएललाई दिने निर्णय भएको छ ।

युवा संघले आगामी १४ मंसिरमा हुने उपनिर्वाचनमा किरण पौडेलको नेतृत्वमा प्रचार/प्रसार समिति गठन गरेको छ । समितिका सदस्यहरूमा प्रभात कटवाल, ज्ञानेन्द्र गुरुङ, पुष्प ओली, रोशन बस्नेत, प्रकाश गौतम, नविन खड्का र प्रकाश लामिछाने रहेका छन् ।

डब्ल्यूएफडीवाईको महासभामा भाग लिन संयोजक रामप्रसाद रापकोटा ‘दीपशिखा’ को नेतृत्वमा सुमन देवकोटा, सन्तोष रावल र सुन्दर भुषाल जाने निर्गाय बैठकले गरेको छ ।

प्रकाशित मिति: आइतबार, कात्तिक १७, २०७६ १५:२७