जाडो छल्न वस्तुभाउसहित बेसीतिर

A+ A A-

कर्णालीका हिमाली जिल्ला डोल्पा, मुगु, हुम्लाका स्थानीयवासी जाडो छल्नका लागि तराइ झर्न थालेका छन् । दसैं र तिहार सकिएसँगै हिमाली जिल्लामा जाडो बढ्ने भएकाले उनीहरु तराइ झर्न थालेका हुन् ।

कर्णालीका हिमाली जिल्लावासी चिसो बढ्न थालेपछि न्यानोको खोजीमा बेसी झर्ने गरेका छन् ।

हिउँदमा हिउपात हुने जाडो निकै बढ्ने भएकाले जाडो छल्नका लागि बेसीतिर बस्तु भाउसँगै झर्ने गरेको मुगु कार्मारोङ् गाउँपालिकाका टासी लामाले बताए । ‘हिमालमा हिउँ पर्छ । चिसोका कारणले भेडाब्राखा चराउन गाह्रो हुन्छ,’ उनले भने, ‘त्यसैले न्यानोका लागि हामी बेसी झर्ने गरेका छौं ।’

बसाइँसराइका क्रममा जुम्ला, हुम्ला र मुगुका हिमाली बस्तीका मानिसहरु भेडा, च्याङ्ग्रा, खच्चड र गाईगोरु लिएर कालिकोट हुँदै दक्षिणी अछाम र दैलेखमा जाने हुम्लाका तातोपानी गाउँपालिकाका कम्बर रोकायाले बताए । ‘हिमालमा हिउँ पर्छ । जाडो हुन्छ । भेडा र वस्तुभाउ चराउन गाह्रो हुन्छ,’ उनले भने, ‘त्यसैले सधैंका वर्ष झैँ जाडो छल्न हामी औलमा झर्ने गरेका छौं ।’

हिमाली बस्तीका जनजाती र अन्य समुदाय वर्षको चार महिना उत्तरी भेगमा पर्ने चीनतिर जाने गर्दछन् भने चिसो लागेपछि बेसी झर्ने गरेका मुगु खत्याड गाउँपालिका नरबहादुर कार्कीले बताए । ‘वर्षायाममा भेडा च्याङग्रासहित उत्तरी चीनमा जाने गरेका छौं,’ उनले भने, ‘अहिले भने चिसो छल्न दक्षिणको अछाम र दैलेखमा जाँदैछौं ।’

त्यस्तै हुम्लाका, मैला, मदेना, डाडाफया, श्रीनगरका बासिन्दा पनि जाडो छल्न भेडा, च्याङ्ग्रा, घोडा, खच्चड गाईगोरु लिएर बेँसीतिर झरेका हुम्लाका नरबहादुर शाहीले बताए । ‘हुम्लाका धेरै मानिसहरु जाडो छल्न औलमा झरेका छन्,’ उनले भने, ‘औलमा झरेपछि व्यापार पनि हुने, जाडो पनि छलिने गरेको छ ।’

माथिल्लो डोल्पाका अधिकांश स्थानीयवासी बेसी झरिरहेको काइके गाउँपालिका–७ का चन्द्र रोकायाले बताए । ‘मंसिर, पुस र माघको तीन महीनाको जाडो छल्नका लागि जाजरकोट, नेपालगञ्ज, काठमाडौं, सुर्खेतलगायतका जिल्लामा यहाँका स्थानीयवासी जाने गर्दछन्,’ उनले भने, ‘अहिले डोल्पाको जुफाल विमानस्थलमा बेसी झर्नेको ठूलो भीड लागेको छ ।’