‘हैट’ अलि बढी नै गरें कि !’

A+ A A-

पछिल्लो समय ‘हैट’ थेगो चर्चित छ । साथीभाइको जमघट होस् वा अन्य कुनै प्रसंग, ‘हैट’ खुबै प्रयोग हुन्छ । यो शब्दसँगै एउटा अनुहार जोडिएर आउँछ अभिनेता बुद्धि तामाङको ।

नाटक र चलचित्रको पर्दामा बुद्धि तामाङलाई देख्यो कि दर्शक आफैं हाँस्न थाल्छन् । उनी नामभन्दा ‘टिपिकल’ थेगो ‘हैट’का कारण लोकप्रिय बने ।

अहिलेका ब्यस्त कलाकार हुन्, उनी । नाटक र चलचित्रमा उनको बेग्लै परिचय बनिसकेको छ । सहायक भूमिका भए पनि उनले एकपछि अर्काे चलचित्रमा दर्शकको मन जितेका छन् । पछिल्लो समय अधिकांश निर्माता निर्देशकको रोजाइमा पर्छन् ।

काभ्रेमा जन्म, काठमाडौंमा संघर्ष

काभ्रेको सरमथलीमा जन्मेका बुद्धिको बाल्यकाल गाउँमै बित्यो । स्थानीय कालिकादेवी प्राविमा प्रारम्भिक शिक्षा लिएका उनी श्री भूमे माविबाट एसएलसी गरेपछि नै काठमाडौं प्रवेश गरेका हुन् ।

२०६२/०६३ सालको राजनीतिक परिवर्तनसँगै जनतामा एक किसिमको उत्साह जाग्दै थियो । त्यतिबेला रंगकर्मीले पनि चोकचोकमा सडक नाटक देखाउँथे । डबली ‘संविधान सभामा महिलाको सहभागिता र अधिकार’ सडक नाटकको तयारी गर्दै थियो । त्यही बेला बुद्धि पनि नाटकमा आवद्ध भए । उनको जीवनमा नाटकको नयाँ यात्रा सुरू भयो ।

‘जीवनको लक्ष्य टुंगो लागेको थिएन । २०६२/६३ सालमा डबली थिएटरसँग जोडिन आइपुगे । जति बेला डबली थिएटरले सडक नाटक नाटक प्रदर्शन गथ्र्याे । त्यसपछि काठमाडौंमा नाटकसँग नाता गाँसियो’, उनले भने ।
‘जीवनमा के गर्ने के नगर्ने टुंगो लागेको थिएन । सोचाइ खाली थियो’, उनले भने ।

त्यसअघिसम्म अन्य व्यवसाय गर्थे । तर, व्यवसायमा सन्तुष्टि मिलेको थिएन । जीवनको लक्ष्य निर्धारण गर्न खोज्दै थिए उनी ।

दायाहाङ राई, सिर्जना सुब्बा, राजन खतिवडालगायत मण्डला थिएटर स्थापना गर्न लागिपरेका थिए । उनी पनि मण्डला थिएटर स्थापना गर्न कस्सिए ।

‘जीवनमा कलाकार मात्र बन्ने हुटहुटी थियो । ब्यस्त हुन्छु भनेर कलाकार बनेको होइन । नाटक मन पर्ने विधा भएकाले नाटक गर्ने लोभ थियो’, उनले भने ।

यसरी जमे अभिनयमा

मण्डला थिटर निर्माणधीन अवस्था थियो । रामबाबु गुरुङ चलचित्र ‘कबड्डी’ बनाउन जोशिएका थिए । रामबाबुसँगै दयाहाङ राई र राजन खतिवडा पनि सँगै थिए ।

बुद्धि र विजय बरालसँगै मण्डला काम गर्दै थिए । रामबाबुले पनि बुद्धि र विजयलाई चलचित्रमा काम गर्न भनेर सुनाए । अन्ततः चलचित्रमा अभिनय गरे ।

चलचित्र कबड्डी रिलिज भयो । दर्शक उनको क्यारेक्टरमा छिट्टै नोटिस भए । त्यसपछि एकाएक उनको नाम ‘हैट’मा परिणत भयो । अभिनय कौशलले चलचित्रमा उनको माग बढ्दै गयो ।

खासै नबोली एकै पटक बोल्ने मान्छेले बोल्ने थेगो । त्यसैले पनि मान्छेलाई स्वाद लाग्यो अनि रुचाइयो । चलचित्रलाई दर्शकले रुचाए । त्यति मात्रै होइन, बुद्धिको थेगो निकै प्रख्यात भयो ।

चलचित्रको ‘क्यारेक्टर’ले यो उचाइ दिलायो । बुद्धिको कबड्डी सिरिज, ‘छक्का पञ्जा’ लगायत चलचित्रको संख्या ५० पुग्यो । अझै पनि एक/दुईवटा चलचित्र रिलिज हुन बाँकी छ ।

‘संख्यात्मक रूपमा बढी नै चलचित्रमा अभिनय गरेंजस्तो लाग्छ । एकै पटक दुईवटा चलचित्र रिलिज हुँदा प्रचार गर्न गाह्रो हुँदोरहेछ । त्यसैले पनि संख्या घटाउन थालेको छु’, उनले भने ।

कलाकार भएपछि एकपछि अर्काे चलचित्रमा उत्कृष्ट काम गरौं भन्ने लोभ लाग्ने उनको बुझाइ छ ।

उनी भन्छन्, ‘संख्या थप्न कसैलाई पनि रहर नहुने र कलाकारलाई काम गर्ने हुटहुटी भइरहन्छ ।’

अधिकांश चलचित्रको स्क्रिप्ट अध्ययन गरेर छनोट गर्न भ्याउँदैनन् बुद्धि । आफ्नो ‘क्यारेक्टरलाई मात्रै हेर्छन्, उनी । चलचित्रमा आफ्नो जिम्मेवारी कत्तिको महत्त्वपूर्ण छ भन्ने कुराको विचार गरेर छनोट गर्छन् ।

कलाकारलाई एकपछि अर्काे चलचित्रमा राम्रो काम गर्ने लोभ हुन्छ । मलाई पनि त्यस्तै लोभ हुन्छ । तर, बढी नै गर्न थालें कि जस्तो लाग्छ’, उनले गम्भीर मुद्रामा भने ।

‘मलाई मेजर क्यारेक्टर चाहिँदैन’

आफूलाई ‘मेजर क्यारेक्टर’ चाहिन्छ भन्ने मानसिकताभन्दा बाहिर छन् उनी । मुख्य भूमिकामा भन्दा सहायकलाई सजिलो लाग्छ उनलाई । चलचित्रमा आफ्नो एउटा काँध थाप्न सकियोस् तर सम्पूर्ण काँधको जिम्मेवारी धान्न नसक्ने बताउँछन् उनी ।

पछिल्लो समय संख्यात्मक रूपमा बढी नै चलचित्र अभिनय गरेको भान भएको छ उनलाई । अभिनय दुईवटा चलचित्र एउटै मितिमा रिलिज हुँदा अप्ठ्यारोमा परेका छन् बुद्धि । प्रचार प्रसारमा पनि समय नमिल्ने र कतै जिम्मेवारीबाट टाढा भएजस्तो उनलाई भान हुन्छ ।

‘दर्शकलाई कुन चलचित्र कसरी अनुरोध गर्ने, कुन फिल्मलाई भन्ने यस्ता कुराले गर्दाचाहिँ निकै अप्ठ्यारो हुँदो रहेछ । कताकता बढी नै पो गर्न थालें कि जस्तो लाग्छ । मैले धेरै गरेछु कि जस्तो लाग्छ,’ उनले भने ।

बुद्धि आफूलाई जिम्मेवारी पूरा गर्न सक्ने कलाकारको रूपमा लिन्छन् । ‘चलचित्रको पोस्टर र ट्रेलरमा अटाउने कलाकार हुँ । चलचित्रको सबै जिम्मेवारी धान्न सक्ने कलाकार होइन’, उनले भने ।

दर्जनौं स्टेज नाटक र ५ सयभन्दा बढी सडक नाटकमा अभिनय गरिसकेका छन् उनले । ५० भन्दा बढी चलचित्रमा अभिनय गरिसके ।

चलचित्र र नाटकमा फरक

नाटक र चलचित्र कलाको एउटै विधा मान्छन् बुद्धि । काम गर्ने तरिका मात्रै फरक देख्छन् उनी । नाटकको पात्रमा रहेर मञ्चबाट बाहिर निस्किएपछि पनि त्यही पात्रले लखेटिरहन्छ ।

‘चलचित्रमा प्रविधिसँग खेल्दै काम गर्ने सुविधा छ । आफूलाई चित्त बुझेन भने फेरि टेक लिँदै काम गर्न पाइन्छ । नाटकमा दर्शकसँग प्रत्यक्ष साक्षात्कार गर्न पाइन्छ । र, तुरुन्तै रिजल्ट पनि भेटिन्छ’, उनले भने ।

नाटकले दर्शकलाई तुरुन्तै मनोरञ्जन प्रदान गर्छ । यसर्थ नाटकको स्वाद नै बेग्लै पाइन्छ । चलचित्र छायांकनपछि पनि विभिन्न चरणपछि मात्रै रिलिज हुन्छ । रिलिज हुनुअघि मनमा विभिन्न तर्कना पैदा गर्छ । तर, चलचित्रमा पनि अन्तिममा रिलिज भएपछि आनन्द आउने उनको अनुभव छ ।

पछिल्लो केही वर्षयता बुद्धि निकै ब्यस्त छन् । नाटकभन्दा चलचित्रमा ब्यस्त देखिन्छन् । वर्षको तीनवटासम्म नाटकमा अभिनय गर्ने बताउँछन् उनी ।