बढी पर्यटक भित्रिने नाका फोहोरले अस्तव्यस्त

A+ A A-

नेपालमा स्थलमार्ग हुँदै सबैभन्दा बढी पर्यटक भित्रिने नाका हो, रुपन्देहीको बेलहिया नाका । यो नाका अहिले अस्तव्यस्त बनेको छ । यो नाकाबाट बढीभन्दा बढी भारतीय पर्यटक भित्रन्छन् । तर, फोहोरका कारण नाकाबाट भित्रिने पर्यटकले नाक थुनेर आउनुपर्ने बाध्यता छ । ढलको व्यवस्थापन नहुँदा बेलहिया अस्तव्यस्त बनेको हो ।

नियमित सरसफाइ नहुँदा फोहोरले पर्यटकहरु नाक थुनेर हिँड्न बाध्य छन् । भारतलगायत श्रीलंका, थाइल्याण्ड, म्यानमार, चीन, कोरिया, अमेरिका, भियतनामलगायत एक सयभन्दा बढी मुलुकका पर्यटक भित्रिने बेलहिया नाकाको दुर्दशाका कारण पर्यटकमा नकारात्मक सन्देश प्रवाह हुने चिन्ता पर्यटन व्यवसायीले गर्न थालेका छन् ।भत्किएको सडकका खाल्डाखुल्डी, धुलो र हिलोले पर्यटकसँगै स्थानीय पनि आजित छन् । सडक किनारको ढल, फोहोर तथा जमेको हिलेपानी गनाएर बसिनसक्नुको भएको स्थानीय उज्वल पोखरेलको गुनासो छ ।

बेलहियालाई नछोएको लुम्बिनी भ्रमण वर्ष

प्रदेश ५ ले अहिले लुम्बिनी भ्रमण वर्ष २०७६ मनाइरहेको छ । भ्रमण वर्षका नाममा सवा ४ करोड बजेट खर्च हुँदैछ । प्रचारप्रसार, नाकाको व्यवस्थापन, सूचना बोर्ड, सरसफाइलगायतका कार्यक्रम भइरहेको योजनामा उल्लेख छ । सीमा नाकाको सरसफाइ र डस्टबीन खरिदका लागि मात्रै प्रदेश सरकारले यो वर्ष ४० लाख बजेट छुट्याएको छ । तर, बेलहियामा भने न त फोहोर राख्ने डस्टबीन छ न सरसफाइका कार्यक्रम नै गरिएका छन् ।विभिन्न दिवसका अवसरमा सरकारका मन्त्री, सेना, प्रहरी तथा स्थानीय सरकारका प्रमुख र नेताहरुले कुचो पकडेर सडक बढार्छन् । तर, त्यसपछिका दिनमा नाकाको अवस्था र पर्यटकले भोग्नुपरेका समस्यातर्फ प्रदेश र स्थानीय सरकारको चासो गएको देखिँदैन । पर्यटन वर्षको घोषणा गरेका केन्द्र र प्रदेश सरकारले पर्यटकीय नाकाको व्यवस्थापनमा ध्यान नदिइएको पर्यटन व्यवसायीको गुनासो छ । ‘यसको सरसफाइ गरेर यसलाई सुन्दर बनाउन सके पर्यटकहरुमा राम्रो सन्देश जान्थ्यो, तर यहाँ फोहोरै फोहोर छ,’ नेपाल एसोसिएसन अफ टुर एण्ड ट्राभल एजेण्ट्स (नाटा) प्रदेश ५ का अध्यक्ष सागर अधिकारीले भने ।