मभित्रको ‘म’

A+ A A-

यो सुन्दर ब्रम्हाण्डको अण्डा फोडेर त हेर,
तिमी ‘म’लाई भेटाउँछौ साथी
म त एक चल्लाजस्तै हुँ, यो सुन्दर ब्रम्हाण्डको
हो यो ब्रम्हाण्डको म एक सानो चल्ला हुँ,
जो आफैंमा बृहत् ब्राह्मण छु ।

सौर्यमण्डलको सूर्य सरी यो मन,
कल्पनाको बेग त प्रकाश वर्षभन्दा अझ शीघ्र छ यसमा
तर एकछिन,
चेतना ममा वायुमण्डलझैं वरिपरि छाएको छ यहाँ
त्यसैले त ‘म’ लाई ध्वस्त बनाउने
मबाट निस्केका विकिरण,
अझसम्म ‘म’मा समाहित भएका छैनन् ।
हो मभित्रको ‘म’
मभन्दा धेरै स्वच्छ र भिन्न छ

हरेक पल बिग ब्याङ भइरहन्छ यो मनमा,
साथी त्यो बिग ब्याङ अनुभव गरेर त हेर
तिमी हरपल आफैंमा ब्रम्हदेव पाउँछौ
हो त्यही ब्रम्हदेव हुन् बन्धु,
हाम्रो मभित्रको ‘म’

साथी ‘म’भित्र पूरै ब्रम्हाण्ड भए पनि म खुशी छैन
हो साथी म आफैंबाट सुरछित छैन
ब्रम्हाण्डको सूक्ष्म भर्सनले भरिएको ‘म’,
आखिर ब्ल्याक होलपनि त छ ईष्र्याको रूपमा !
त्यो ईष्र्यारूपी ब्ल्याक होलले गर्दा
मभित्रको मेरो चेतना कहिल्यै सुरक्षित छैन मित्र

अनि यो समयको के कुरा गरौं म,
यो त मेरो आत्मालाई नै कब्जा गरेर
उमेर स्वरुप उपस्थित छ यहाँ

साँच्चै यो समय पनि विचित्रको छ सखा,
कहिले यो कारागारको रूप लिएर जीवन बाँध्छ
त कहिले यो अवसरविहीन बनाएर मनमा मन्थन गराउँदै,
एक नवीन समाजको विकल्प दिन्छ
अनि कहिले आफैं प्रति छट्पटी उत्पादन गर्ने,
कारखानाको सिर्जना गर्छ यो
चाहे भूत होस् या मात्र अड्कल काट्न सकिने त्यो भविष्य,
या चाहे वर्तमान नै किन नहोस्
हर क्षण उमेर रूपी कारागारको रूप लिएर जीवन बाँध्छ यहाँ
कहिले सोच्छु,
के मृत्यु अनि आशा नभएको भए समयको महत्त्व हुन्थ्यो ?

साँच्चै यो समय पनि विचित्रको छ है सखा !
त्यसैले त यो पनि मभित्रको त्यो चेतनशील ‘म’ मै छ
शायद समय साँच्चिकै महत्त्वहीन हुन्थ्यो होला,
यदि यहाँ मभित्रको ‘म’ नभएको भए

तर चन्द्रमा मभित्र शालीनताको रूपमा छन्
त्यो शालीनता जसले मेरो अहंकाररूपी ज्वाला बल्नुअघि नै
‘म’ मा शीतलताको लहर सिर्जना गर्छ ।
हो, एकछिन यही शालीनताको पुजारी बनेर त हेर
मृत्युपूर्व नै तिमीलाई चन्द्रलोक प्राप्त हुन्छ
त्यसैले त मित्र,
‘म’ यो सुन्दर ब्रम्हाण्डको एक सानो चल्ला हुँ
जो आफैंमा एक बृहत् ब्रम्हाण्ड छु ।

प्रकाशित मिति: शनिबार, कात्तिक ९, २०७६ ०८:४१