२ महिनापनि टिकेन पोखरामा ई–टिकेटिङ सेवा

A+ A A-

पोखरा महानगर क्षेत्रभित्र सार्वजनिक सवारीसाधनहरुमा शुरु गरिएको ई–टिकेटिङ (विद्युतिय प्रणाली) दुई महिना नबित्दै बन्द भएको छ । गत भदौ १ गतेबाट महानगर क्षेत्रमा सञ्चालन हुने भाडाका सवारी साधनहरुमा शुरु गरिएको ई–टिकेटिङ असोज अन्त्यमा आएर बन्द भएको हो ।

ई–टिकेटिङको महानगर प्रमुख मानबहादुर जीसीले भदौ २ गते उद्घाटन गरेका थिए । मेसिनमा प्रयोग भएको नेपाल टेलिकमको सर्भरले काम नगर्दा ई–टिकेटिङ सिस्टम बन्द गरिएको महानगरले जनाएको छ ।

महानगरले वैशाखदेखि नै लागु हुनेगरि ई–टिकेटिङ शुरु गर्ने योजना बनाएपनि प्राविधिक कारणले भदौबाट मात्र शुरु हुन सकेको थियो । महानगरको अगुवाइमा पोखराका बस व्यवसायी र एनक्लाउड कम्पनीबीच पोखराभित्र सञ्चालन हुने सार्वजनिक यातायातका साधनहरुमा परिक्षणका रुपमा ई—टिकेटिङ शुरु गरिएको थियो ।

टिकट काट्ने मेसिन, इन्टरनेट र सर्भरमा समस्या देखिन थालेपछि सवारीधनीले सो प्रणाली नै बन्द गरेका हुन् । टिकट मेसिनका लागि नेपाल टेलिकमले थ्रिजी इन्टरनेट उपलब्ध गराउँदै आएको थियो ।

‘मेसिनले टिकटै फाल्दैन, फुल चार्ज गरेर ल्याएको मेसिन तत्कालै चार्ज सकिएको देखाउने, सिस्टम ह्याङ हुने भउपछि ई–टिकेटिङ बन्द गरेका हौं ।’, पोखरा नगरबसका चालक सचिन थापाले बताए ।

‘नचलाएको बेला पनि मेसिन तात्तिने र इन्टरनेटको डेटा सकिएर हैरान पाथ्र्यो,’ उनले भने, ‘एकदिन हैन, दुईदिन हैन सधैं उही समस्या देखिएपछि विधुतिय प्रणाली बन्द गर्न वाध्य भयौं ।’

दैनिक रुपमा यात्रुसँग झगडा र अनावश्यक झन्झट हुन थालेपछि दसैं अघिबाटै अधिकांश व्यावसायीहरुले मेसिन बोक्नै छोडिसकेको उनले जानकारी दिए ।
पोखरा महानगरले भने परिमार्जन सहितको नयाँ प्रणाली र नयाँ रुटको खोजी भइरहेकाले यो सिस्टम रोकिएको जानकारी दिएको छ ।

‘नेपाल टेलिकमको थ्रिजी सेवाको पहुँच सबै ठाउँमा पुग्न नसकेकाले केही समस्या देखियो । महानगरले दूरसञ्चार र एनक्लाउडलाई गुणस्तरिय सेवा सञ्चालनका लागि पत्राचार गरिसकेको छ,’ पोखरा महानगरपालिकाका ट्राफिक व्यवस्थापन संयोजक सुरेन्द्र पौडेलले भने, ‘परिक्षणकालमा केही प्राविधिक समस्या देखिएको हो । तत्काल हल गरेर अघि बढ्छौं ।’

शुरुवाती चरणमा दूरसञ्चारले १ सय ८० वटा बसमा मात्रै इन्टरनेट उपलब्ध गराएका कारण समस्या देखिएको बताउँदै इन्जिनियर सुरेन्द्र पौडेलले अब महानगरमा सञ्चालन हुने ८ सयवटै बसमा इन्टरनेटको सुविधा राखेपछि समस्या नआउने दाबी गरे ।

पोखरा बस व्यवसायी समितिका महासचिव अमृत शर्मा तिमिल्सिनाले नेपाल टेलिकमको थ्रिजी सेवाका कारण ई–टिकेटिङमा समस्या देखिएपछि केही समयका लागि सेवा बन्द गरिएको बताए ।

‘केही प्राविधिक समस्या देखिएपछि केही समयलाई सेवा स्थगित गरिएको हो । बन्द भएको होइन,’ उनले भने, ‘प्राविधिक समस्या हल भएसँगै तत्काल सेवा सुचारु हुनेछ ।’

नेपाल टेलिकमले उपलब्ध गराएको थ्रिजी सेवा अत्यन्त महंगो भएको पनि उनले गुनासो गरे ।

‘२–३ सय रुयैयाँको डेटा लियो, २–३ दिन पनि टिक्दैन,’ उनले भने, ‘दैनिक सेवा सञ्चालनका लागि यो निकै महंगो सेवा भयो । यस्तो भएपछि चौबिसै घण्टा सेवा सञ्चालनमा ल्याउन समस्या हुन्छ ।’

पोखरा महानगरभित्रका ३० रुटमा दैनिक ८ सय सवारी चल्छन् । ८ सयमध्ये पहिलो चरणमा १० प्रतिशत सवारीमा जडान गरिएको ई–टिकेटिङ मेसिनमा समस्या देखिएको उनले बताए ।

प्राविधिक सहयोगी संस्था एनक्लाउडका दीपेन्द्रनारायण श्रेष्ठले भने नेपाल टेलिकमको डेटा सुधारको काम भइरहेकोले इटिकेटिङ रोकिएको जानकारी दिए । उनले सार्वजनिक साधनहरुमा पहिलोपटक परिक्षण भएकाले केही समस्या देखिनु सामान्य रहेको पनि बताए ।

‘अहिले नेपाल टेलिकमको डेटामा सेवा सञ्चालन भइरहेका छ । हामीले सेवाको औपचारिक सुरुवात समेत गरेका छैनौं,’ श्रेष्ठले भने, ‘सुरुमा प्राविधिक कारणले समस्या देखिएको हो ।’

के हो ई–टिकेटिङ सिस्टम ?

ई–टिकेटिङ सवारीसाधनको भाडा भुक्तानी गर्ने विद्युतिय माध्यम हो । बसका सहचालकसँग एउटा डिभाइस हुन्छ । सो डिभाइसमार्फत् यात्रुहरुले प्रविधियुक्त टिकट पाउँछन् । यो प्रणाली सुरु भएपछि प्रत्येक यात्रुले विशेष प्रकारको यात्रा कार्ड पनि पाउने छन् ।

व्यवसायीले दिएको त्यही कार्ड गाडीका सहचालकले डिभाइसमा ‘रिड’ गराउने छन् । यात्राको दूरिअनुसार लागेको भाडा त्यही कार्डबाट बसको खातामा ट्रान्सफर हुनेछ । सो कार्डमा यात्रुले अग्रिम पैसा जम्मा गरेको हुनुपर्दछ ।

ओम डेभलपमेन्ट बैंकले त्यसमा सहकार्य गरेको छ । पहिलो चरणमा नगद नै लिएर सहचालकले ई–टिकट प्रदान गर्ने छन् । दोस्रो चरणदेखि यात्रु कार्ड उपलब्ध भइसकेकाहरुको लागि कार्ड रिड गरेर भाडा भुक्तानी गरिने छ ।

जिपिएस जडान भएकाले यात्रा गरेको ठाउँको रकम स्वतः कार्डबाट बैंकमा ट्रान्सफर हुनेछ ।

सो कार्डको १ सय रुपैयाँ पर्छ । कार्ड लिएबापत बैंकले प्रोत्साहन स्वरुप १ सय रुपैयाँ बोनस पनि दिनेछ ।

दोस्रो चरणमा चढेको ठाउँमा कार्ड रिड गराउने र झर्दा पनि रिड गराएपछि आफूले यात्रा गरेको दूरीबमोजिम पैसा काटिने छ ।

प्रकाशित मिति: शुक्रबार, कात्तिक ८, २०७६ १८:५०