'हामीले सोचेकै थिएनौँ यति धेरै दर्शकले ‘बोक्सीको घर’लाई पर्खिरहेका रहेछन्' (भिडियो)

'हामीले सोचेकै थिएनौँ यति धेरै दर्शकले ‘बोक्सीको घर’लाई पर्खिरहेका रहेछन्' (भिडियो)

A+ A A-

यतिखेर नेपाली सिनेमा घरहरू ‘बोक्सीको घर’मय बनेका छ । गत शुक्रबारबाट प्रदर्शनमा आएको ‘बोक्सीको घर’ले दर्शकको निकै राम्रो साथ पाउँदा बक्स अफिसमा व्यापार पनि आक्रामक गरिरहेको छ । सन् २०१६ मा मण्डला नाटक घरमा मञ्चन भएको नाटक ‘बोक्सीको घर’ मा आधारित यो सिनेमाले मूलतः अशिक्षित चेतका कारण नेपाली समाजमा स्थापित कुरीतिका कारण सिर्जित परिस्थितिलाई प्रस्तुत गरेको छ । ‘बोक्सीको घर’को परिकल्पनाकार सिनेमामा मुख्य भूमिकामा देखिएकी केकी अधिकारी नै हुन् ।

चलचित्रको परिकल्पनादेखि निर्माण र प्रदर्शन हुनुअघिसम्म ‘बोक्सीको घर’ले दर्शकको यसरी अपार माया पाउँछ भन्ने आफूले नसोचेको उनी सुनाउँछिन् । सिनेमा ‘बोक्सीको घर’ मार्फत आज पनि नेपालको ग्रामीण भेगका किशोरी तथा महिलाले सामाजिक कुरीतिका कारण भोग्नुपरेको दुर्दशाविरुद्ध जनचेतना फैलाउने प्रयास गरेको उनको भनाइ छ ।

मूतलः विश्व अन्य ग्रहको खोजीमा निस्किसक्दा पनि नेपाली समाज भने अझै सामाजिक कुरीति र विभेदमा रुमलिइरहेको तितो यथार्थबाट कुँडुलिएर ‘बोक्सीको घर’ निर्माण गरिएको केकी बताउँछिन् । हामीले केकी अधिकारीलाई शिलापत्र स्टुडियोमार्फत चलचित्र ‘बोक्सीको घर’सँग सम्बन्धित केही प्रश्न राखेका छौँ ।

०००

एतिखेर सिनेमा हलहरू ‘बोक्सीको घर’मय बनिरहेका छन्, कस्तो महसुस भइरहेको छ ?

एकदम ऊर्जा मिलेको महसुस गरिरहेकी छु । आजभन्दा तीन वर्षअघि यो कथा, विषयवस्तु छनोट गर्दैगर्दा यो विषयलाई दर्शकले कसरी लिनुहुन्छ ? मैले जसरी अनुभूत गरिरहेकी छु, दर्शकलाई त्यस्तै अनुभूत हुन्छ कि हुँदैन भन्ने लागेको थियो ।

‘बोक्सीको घर’ले दर्शकको यति धेरै साथ पाउँछ भन्ने लागेको थियो ?

यति धरै दर्शकको साथ पाइन्छ भन्ने कल्पनासम्म गरेकी थिइनँ । इमानदारीका साथ आफ्नो शतप्रतिशत दिएर काम गर्नुपर्छ भन्ने मान्यता म राख्छु । त्यसैगरी काम गरेको पनि हो । तर यति ओभर वेलभिङ रेस्पोन्स आउँछ भनेर चाहिँ हामीले कल्पेका थिएनौँ ।

काठमाडौंभित्र, मोफसल, मेजर स्टेसन, देशव्यापी रूपबाट एकदमै राम्रो रेस्पोन्स आएको छ । हलबाट म्यानेजरहरूले उत्साहित भएर फोन गरिरहनुभएको छ । हामीले पनि सोचेका थिएनौँ, यति धेरै दर्शकले चलचित्रलाई पर्खिरहेका रहेछन् भनेर ।

‘बोक्सीको घर’लाई आठ वर्षअघि मण्डलामा मञ्चन भएको नाटकमा आधारित भन्नुभएको छ, नाटक र सिनेमा त फरक विषय होइन ?

हजुर, नाटकमै आधारित हो चलचित्र तर नाटक र सिनेमा विधा नै फरक हुन् । त्यो कारणले स्टोरी टेलिङवाइज, प्रेजेन्टेसनवाइज सिनेमामा त ब्याकराउन्ड स्कोरका कुराहरू आउँछन् । पोस्टमा गर्नुपर्ने अनेक काम हुन्छन् । सिनेमा भन्नेबित्तिकै त्यसको एउटा सिनेम्याटिक ल्याङ्ग्वेज हुनुपर्छ । आफ्नै भाष्यले सिनेमाले आफैँ कथा बोल्नुपर्छ । त्यो हिसाबले नाटकभन्दा चलचित्र नितान्त फरक छ । त्यति भन्दाभन्दै फेरि कथाचाहिँ उस्तै पाउनुहुन्छ ।

‘बोक्सीको घर’ले उठाएको विषय नेपाली समाजमा आज पनि देख्नुहुन्छ ?

यो अवस्था आज पनि नेपाली समाजमा विद्यमान भएकैले यो चलचित्र बनाइएको हो । पछिल्ला समाचारहरू हेर्ने हो भने पनि बोक्सीको आरोप लगाएर पीडामा पारिएका महिलाहरूका समाचार अझै पनि फ्रन्ट पेजमा आइरहेका हुन्छन् । त्यस्ता समाचारले किन त्यो स्पेस पाइरहेको छ त ? किनकि त्यस्ता घटना आजको दिनसम्म पनि घटिरहेका छन् । र, यो भनेको यति अमानवीय, यति नीच र यति संकुचित समाज र चेतबाट आएको चीज हो, जसलाई पूर्ण रूपमा निर्मूल गर्नुपर्छ भन्ने उद्देश्य मिडियाले लिएको अवस्था हो ।

महिला हिंसाका त कति खालका घटनाहरू हुन्छन् । तर पनि बोक्सीकै आरोप बनेका समाचारले प्राथमिकता पाउने गर्छन् । किनभने हाम्रो समाजले महिलालाई लगाउने जुन बोक्सीको आरोप छ, त्यो आफैँमा लज्जास्पद विषय हो ।

नेपाली समाज हिजोभन्दा त धेरै शिक्षित भइसकेको छ नि होइन र ?

शिक्षाले पछिल्लो समय चेतनाको स्तर त पक्कै पनि बढेको त होला । हिजोको तुलनामा यस्ता घटना कम भएका पनि होलान् । यद्यपि पूर्ण रूपमा निर्मूल नभएका कारणले आज पनि मैले यो अन्तर्वार्ता दिइरहँदा पनि देशको कुनै कुनामा एउटा महिलालाई बोक्सीको आरोप लगाएर कुटपिट, यातना, अनेकन लाल्छनामा मलमूत्र खुवाइदिनेदेखि समाजबाटै निकालिदिने घटाना घटिरहेकै छन् । त्यसैले हामी काठमाडौंमा छौँ, शहरमा छौँ, यस्ता घटना घटेका छैनन् । हामीले देखेका छैनौँ भनेर नजरअन्दाज गर्न मिल्दैन । कम्तीमा हामीजत्तिको मान्छेले त मिल्दै मिल्दैन ।

भिडियो: