पाटन र अस्कल क्याम्पसमा एक महिनादेखि ताला, करारमा जागिर खाने विद्यार्थी नेताकाे दाउ

पाटन र अस्कल क्याम्पसमा एक महिनादेखि ताला, करारमा जागिर खाने विद्यार्थी नेताकाे दाउ

A+ A A-

त्रिभुवन विश्वविद्यालयका आंगिक क्याम्पसहरू पाटन संयुक्त क्याम्पस र अमृत साइन्स क्याम्पस (अस्कल) लामो समयदेखि तालाबन्दीमा छन् । पाटन संयुक्त क्याम्पसमा नेविसंघ, अखिल क्रान्तिकारी र अनेरास्ववियु (समाजवादी) ले ३५ दिनदेखि संयुक्त रूपमा तालाबन्दी गरेका छन् । एमालेनिकट अनेरास्ववियुले अस्कल क्याम्पसमा विगत १३ दिनदेखि तालाबन्दी गरेको छ । तालाबन्दीका कारण दुवै क्याम्पसका नियमित प्रशासनिक एवं शैक्षिक क्रियाकलापहरू प्रभावित हुँदै गएका छन् ।

पाटन संयुक्त क्याम्पसमा बीएस्सी सीएसआईटीमा नयाँ कम्प्युटरको व्यवस्था हुनुपर्ने, शुद्ध खानेपानीको व्यवस्था गर्नुपर्ने, क्यान्टिनको व्यवस्था गर्नुपर्नेलगायतका माग राखी संयुक्त विद्यार्थी संगठनले क्याम्पस प्रमुखलाई मूलगेटबाटै प्रवेशमा रोक लगाएर तालाबन्दी गरेका छन् ।

पाटन क्याम्पस स्ववियुनिकट एक विद्यार्थीका अनुसार शैक्षिक मुद्दा देखाएर बार्गेनिङमा विद्यार्थी संगठनहरू लागेका छन् । उनीहरूले उठाएका मागहरू सम्बोधन भइसक्दा पनि वार्तामा आउन नमान्नुले भित्री उद्देश्य अर्कै रहेकाे प्रस्ट हुने उनले बताए । उनका अनुसार कम्प्युटरका लागि टेन्डर भइसकेको छ । क्यान्टिन सञ्चालन गर्न पत्रिकामा सूचना निस्केको छ । पुस्तकालयमा पुस्तक पनि आएका छन् । खानेपानीको प्रबन्ध हुँदै छ । तर, केही विद्यार्थीहरूले करार कर्मचारी नियुक्तिका लागि विज्ञापन निस्केपछि अनावश्यक माग राखेर तालाबन्दी गरेका हुन्,’ उनले भने, केही विद्यार्थीका आफन्तलाई विभिन्न पदमा जागिर खुवाउन र केही विद्यार्थी नेता आफैँले करारमा जागिर खान दबाब दिने भित्री उद्देश्यले आन्दोलन गरेको बुझिएको छ ।’

क्याम्पस प्रमुख लक्ष्मणसिंह कुँवरका अनसार विद्यार्थीका मागअनुसार केही दिनअघि प्रशासनले १ सय १० कम्प्युटर खरिद गर्न ई–बिडिङ गरी खरिद प्रक्रियामा छ । खानेपानीको विषयमा केयूकेएलको सहयोगमा युरोगार्ड खरिद गरी जडान गर्ने काम भइसकेको छ ।

जारको पानी प्रयोग गर्ने तयारी भइरहेको र क्यान्टिन सञ्चालन गर्ने विषयमा छलफल भइरहेको क्याम्पस प्रमुख लक्ष्मणसिंह कुँवर बताउँछन् । क्याम्पस प्रमुख कुँवरले तालाबन्दीका कारण १० दिनदेखि क्याम्पस छिर्नसमेत नपाएको बताए । ‘पटक पटक वार्तामा बस्दा पनि टुंगो लागेको छैन । विद्यार्थीको माग पूरा गरिसकिएको छ । तर पनि ताला खुलेको छैन । किन खुलेन मैले पनि बुझ्न सकेको छैन । ‘विद्यार्थीका माग सबै सम्बोधन भइसकेका छन्, यति हुँदाहुँदै पनि एउटा सार्वजनिक पद धारण गरेको व्यक्तिको कालो फोटो गेटमा टाँस्दा त्यस व्यक्तिमा कत्तिको असर पर्छ भन्ने संगठनले सोच्नुपर्छ कि पर्दैन,’ उनले भने । नियमित विद्यार्थीभन्दा पनि पुराना विद्यार्थीले माग राखेर तालाबन्दी गरेको कुँवरले जनाए ।

अधिकांश माग पूरा भइसकेको अवस्थामा तालाबन्दी गर्नु उचित नभएको क्याम्पस प्रमुख बताउँछन् ।

क्याम्पसहरूमा लगाइएको तालाबन्दी नखुल्दा स्नातक तह दोस्रो वर्षका विद्यार्थीहरू परीक्षा फारम भर्नबाट वञ्चित भएका छन् । १६ वैशाखदेखि स्नातक तह दोस्रो वर्षको परीक्षा सञ्चालन हुँदै छ । तर, लामो समयदेखिको तालाबन्दीका कारण विद्यार्थीहरूले परीक्षा फारम भर्न पाएका छैनन्, जसले गर्दा उनीहरू परीक्षा दिनबाट वञ्चित हुने खतरा देखिएको छ । यता, क्याम्पस प्रमुख कुँवर भन्छन्, ‘त्रिभुवन विश्वविद्यालय, सीडीओ कार्यालय, उपकुलपतिसँग यस विषयमा कुरा भइसकेको छ, विद्यार्थीहरूले परीक्षा दिनबाट रोकिनु पर्दैन ।’

‘मुख्य कुरा भनेको विद्यार्थी संगठनले पनि विद्यार्थीहरूको मुद्दामा ख्याल गर्नुपर्‍यो । सम्बोधन भइसकेको मुद्दामा जसरी लागिपरेका छन् । त्यो सम्भव नै छैन । जबसम्म उनीहरूले गेटबाट ब्यानर हटाउँदैनन्, तबसम्म वार्ता असम्भव छ,’ उनले भने ।

नेविसंघका अध्यक्ष तारा शर्मा, अखिल क्रान्तिकारीका अध्यक्ष वीरेन्द्र मगर र अनेरास्ववियु समाजवादीका अध्यक्ष प्रेम बुढाले गरेका तालाबन्दी हटाउन माग गर्दै एमालेनिकट अनेरास्ववियुलगायत चार विद्यार्थी संठगनले भने संयुक्त विज्ञप्ति सार्वजनिक गरेका छन् । उनीहरूले तालाबन्दी खोलेर छलफलबाट समस्या समाधान गर्न माग राखेका छन् ।

यता, त्रिवि प्राध्यापक संघ पाटनले पाटन संयुक्त क्याम्पसको प्रशासन तालाबन्दीका कारण असहज भएको बताएको छ । विद्यार्थीहरूको मागहरूको सम्बोधनमा ढिलासुस्तीका कारण क्याम्पस प्रशासन एक महिनादेखि बन्द हुनाले प्रशासनिक भवनमा रहेका नेपाली, अंग्रेजी, भूगोल, राजनीतिशास्त्र, इतिहास तथा बौद्ध अध्ययन, नेपालभाषा र गृह विज्ञान विभागहरूबाट दैनिक रूपमा हुनुपर्ने शैक्षिक प्रशासनका कामहरू हुन नसक्दा विद्यार्थीहरू मर्कामा परेको संघले जनाएको छ ।

साथै, प्राध्यापकहरूले दैनिक कक्षाहरू लिएपछि आफ्नो विभाग जान नपाएको र विभागीय प्रमुखहरूले चौर र चिया पसलमा बसेर विद्यार्थीहरूका समस्याका सुनुवाइ गर्नुपरेको र पारिश्रमिकसमेत नपाएको गुनासो गरेका छन् । बन्दका कारण सबै सरोकारवालाहरूमा परेको असहजता अविलम्ब हट्नुपर्ने पक्षमा रहेको संघका सभापति रामबहादुर केसीले बताए । संघले आइतबारसम्म पनि असहज रहे प्राध्यापकहरूले पनि ३ दिनसम्म 'पेन डाउन' गर्ने चेतावनी दिएको छ ।

एमालेनिकट अनेरास्ववियुले पनि अस्कल (अमृत) क्याम्पस लैनचौरमा २५ चैतदेखि तालाबन्दी गरेको छ । विद्यार्थीमाथि आक्रमण गरेको आरोपमा पक्राउ परेका गैरविद्यार्थीलाई भर्ना गर्न दबाब दिँदै तालाबन्दी गरेको क्याम्पसले जनाएको छ । क्याम्पस प्रमुख लोकबहादुर बरालले विद्यार्थीलाई वार्तामा आउन आग्रह गर्दै अपिल जारी गरेका छन् ।

गैरशैक्षिक माग राखी तालाबन्दी गरेको भन्दै अस्कलका विद्यार्थीहरू पनि विभाजित भएका छन् । स्ववियु सभापति प्रेम जैसीले गैरशैक्षिक माग राखी तालाबन्दी गरेकाले तत्काल ताला खोल्नुपर्ने बताए । त्यस्तै, अखिल क्रान्तिकारी र नेविसंघ अस्कल पनि तालाबन्दीको विपक्षमा छन् ।

क्याम्पस प्रशासन, आर्थिक, परीक्षा शाखा र सहायक क्याम्पस प्रमुखको कार्यकक्षमा तालाबन्दी हुँदा शैक्षिक र प्रशासनिक काममा बाधा पुगेको क्याम्पस प्रमुख बरालले बताए । ‘क्याम्पसका हरेक समस्याहरूको समाधान वार्ताको माध्यमबाट नै पूरा गर्न सकिन्छ । वार्ता नै उत्तम विकल्प हो । त्यसैले जिम्मेवार भई विद्यार्थीका जायज समस्याहरू मात्र लिएर वार्तामा आउनुपर्‍यो,’ उनले भने ।

अनेरास्ववियुका केन्द्रीय सदस्य रुद्रहरि पोखरेलले भर्ना हुन चाहेका विद्यार्थीलाई भर्ना नगरेका कारण बाध्य भएर तालाबन्दी गरेको बताए । ‘हाम्रो मागमा क्याम्पस प्रमुखले सम्बोधन नगरेकाले ताला लगाउन बाध्य भएका हौँ, त्यसै पनि अनेरास्ववियु केन्द्रले क्याम्पसमा तालाबन्दी नगर्न निर्देशन दिएको छ,’ उनले भने ।

प्रकाशित मिति: आइतबार, वैशाख ९, २०८१ १५:४२