बुटवलमा सुप्रिम सहकारीपीडितको नाराबाजी- जीबी राई खोइ, भन्देऊ न रवि दाइ ? (फोटो फिचर)

बुटवलमा सुप्रिम सहकारीपीडितको नाराबाजी- जीबी राई खोइ, भन्देऊ न रवि दाइ ? (फोटो फिचर)

A+ A A-

बुटवल राजमार्ग चौराहामा सुप्रिम सहकारीको कार्यालय थियो । कार्यालय बन्द भए पनि त्यहाँ बोर्ड भने अझै छ । सोही स्थानमा मंगलबार बिहान सुप्रिम सहकारीपीडितहरूले नाराबाजी गरे ।

उनीहरूले नाराबाजी गर्दै भनेका थिए- जीबी राई कहाँ छ ? रवि दाइलाई थाहा छ, रवि तिमीले के हेरेछौ जीबीलाई अझै समाएका छैनौ, जीबी राई खोइ, भन्देऊ न रवि दाइ ।

बुटवल तथा भैरहवालाई केन्द्रमा राखेर कारोबार गरेको सुप्रिम बचत तथा ऋण सहकारीका सञ्चालक रकम नतिरी फरार भएपछि पीडितहरूले आफ्नो रकम फिर्ता गराउन दबाब दिँदै आएका छन् । त्यसैअन्तर्गत मंगलबार उनीहरूले प्रदर्शन गरेका हुन् ।

उनीहरूले सुप्रिम सहकारीका अध्यक्ष, पधाधिकारी, व्यवस्थापक, वरिष्ठ कर्मचारीलाई तुरुन्तै कारबाही गर्नुपर्ने माग गरेका छन् । उनीहरूले उपप्रधानमन्त्री तथा गृहमन्त्री रवि लामिछानेलाई आफ्नो बाचा पूरा गर्न आग्रह गरेका छन् ।

उनीहरूले रवि दाइ आफ्नो वाचा पूरा गर, जीबी राई पक्राउ गर, पीडित जनता के भन्छन् जीबी राई ल्याऊ भन्छन्, सहकारी अनुगमन टोलीलाई कारबाही गर, हाम्रो रगतपसिनाको कमाइ फिर्ता गर, विभिन्न बहानामा ठग्ने प्रवृत्ति बन्द गरलगायतका प्लेकार्डसहित प्रदर्शन तथा नाराबाजी गरेका थिए ।

सुप्रिम सहकारी संघर्ष समितिले गरेको प्रदर्शनमा जीबी राईलाई प्रक्राउ गर्नुपर्ने र आफूहरूको रकम फिर्ता गर्नुपर्ने भन्दै नाराबाजी गरेका हुन् । बचत रकम फिर्ताका लागि दबाब दिन मंगलबार प्रदर्शन गर्ने र त्यसपछि चरणबद्ध आन्दोलन गर्ने संघर्ष समितिका संयोजक विजयकुमार नेपालले बताए ।

‘हिजो प्रतिपक्षमा हुँदा गृहमन्त्री रवि लामिछानेले चर्को स्वरमा जीबी राईलाई आकाश, पाताल, सात समुद्रपारि जहाँ भए पनि पक्राउ गर्न सरकारसँग माग गर्नुभएको थियो,’ नेपालले भने, ‘अहिले उहाँ आफैँ गृहमन्त्री हुनुहुन्छ, राईलाई पक्राउ गर्न कसले रोकेको छ ?’

हजारौँ बचतकर्ताको रकम अपचलन गरी फरार रहेका राई र व्यवस्थापकलगायतलाई पक्राउ गर्नुभन्दा अनुसन्धान गर्ने निकाय गृहमन्त्रीको असंलग्नता देखाउन लागिपरेको भन्दै पीडितहरूले आक्रोश व्यक्त गरेका थिए । ‘दश हजारभन्दा बढी बचतकर्ताको अर्बौं रकम हिनामिना हुँदा गृहमन्त्रीले आफ्नै पूर्वसहकर्मीलाई हालसम्म पक्राउ गर्न किन सकिरहेका छैनन् ?’ अर्का सहकारीपीडितले आक्रोश पोखे, ‘गृहमन्त्रीले प्रतिपक्षमा हुँदा एकथरी र सरकारमा गएपछि अर्कोथरी कुरा गर्न मिल्छ ?’

सहकारीपीडितलाई न्याय दिनभन्दा गृहमन्त्रीलाई चोख्याउन सरकार तल्लीन भएको प्रदर्शनमा सहभागीहरूको आरोप छ ।

आजदेखि थुनछेक बहस हुँदै

सुप्रिम सहकारीमा भएको घोटाला प्रकरणको मुद्दामा आजदेखि थुनछेक बहस हुने भएको छ । जिल्ला अदालत रुपन्देहीमा २८ जनालाई प्रतिवादी बनाएर दायर गरिएको मुद्दामा ६ जनाविरुद्ध आजदेखि थुनछेक बहस हुन लागेको हो ।

ओखलढुङ्गा घर भएका गितेन्द्रबाबु (जीबी) राईसहित २८ जनालाई प्रतिवादी बनाएर सरकारी वकिल कार्यालयले सोमबार जिल्ला अदालतमा मुद्दा दर्ता गराएको हो ।

सो प्रकरणमा पक्राउ परेका ६ जनाविरुद्ध थुकछेक बहस सुरु हुने जिल्ला अदालत रुपन्देहीका सूचना अधिकारी अन्तराम मरासिनीले बताए । उक्त सहकारी प्रकरणमा हालसम्म काठमाडौं, पोखरा, रुपन्देहीका गरी ६ जना पक्राउ गरेका छन् । अन्य प्रतिवादीहरूलाई फरार सूचीमा राख्ने प्रक्रियामा जानेछ ।

प्रकाशित मिति: मंगलबार, वैशाख ४, २०८१ १२:२२