एसका प्रवक्ता भन्छन्– एमाले–माओवादी गठबन्धनलाई साथ दिनु गलत थियाेजस्ताे भइसक्याे ( भिडियाे अन्तर्वार्ता)

एसका प्रवक्ता भन्छन्– एमाले–माओवादी गठबन्धनलाई साथ दिनु गलत थियाेजस्ताे भइसक्याे ( भिडियाे अन्तर्वार्ता)

A+ A A-

सुदूरपश्चिम प्रदेशमा नेकपा एकीकृत समाजवादी कांग्रेस, राप्रपा र नाउपासँगकाे गठबन्धनको पक्षमा उभिएपछि राजनीति तरङ्गित छ । त्यहाँ नाउपाको रेशम समूहका लक्ष्मणकिशोर चौधरीलाई मुख्यमन्त्री बनाउने गरी नेकपा एसले समर्थन दिएको छ । यसले प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओली झस्किएका छन् । गठबन्धन ढल्न सक्ने टिप्पणी पनि हुन थालेको छ । यिनै राजनीतिक घटनाक्रमको पृष्ठभूमिमा नेकपा एसका प्रवक्ता जगन्नाथ खतिवडासँग शिलापत्रकर्मी जङ्ग तामाङले गरेको सम्वादको सम्पादित अंशः

सुदूरपश्चिम प्रदेशमा नेकपा एकीकृत समाजवादीले किन गठबन्धन फेर्‍यो ?

केपी शर्मा ओली र प्रधानमन्त्री प्रचण्डले हठात् आफ्नो निर्णय परिवर्तन गर्नुभयो । हामीलाई सुदूरपश्चिममा मुख्यमन्त्री नदिने र नागरिक उन्मुक्तिको पनि रञ्जिता श्रेष्ठ पक्षलाई दिने निर्णयमा पुग्नुभयो । उहाँहरूको दिमागले नेकपा एकीकृत समाजवादीले प्राप्त गर्न लागेको अवसर खोस्नुपर्ने ठम्यायो । उहाँहरूले दिमाग जब परिवर्तन गर्नुभयो, तब हामीले हाम्रो आफ्नो कार्यनीतिक चाललाई परिवर्तन गर्‍यौँ । उहाँहरूले परिवर्तन गरेपछि हामी परिवर्तन हुन बाध्य भयौँ ।

उसो भए अब रञ्जिता पक्षबाट मुख्यमन्त्रीका दाबेदार भएका कैलाश चौधरीलाई समर्थन हुँदैन ?

अहिले त्यस्तो छैन । माथिल्लो तहमा कुनै संवाद भएको छैन । विचार विमर्श गरिएको छैन । नेकपा एकीकृत समाजवादीले जे गरे पनि पार्टीको निर्णय हो । गठबन्धनको निर्णय नभए पनि फरक पर्दैन भन्ने प्रकारले प्रधानमन्त्री र एमाले पनि हिँडेका छन् भने हामीले पनि खोजी गरिरहनु परेन । हामी आफ्नो दिशामा अगाडि बढ्छौँ ।

बागमतीमा पनि गठबन्धनबाट नेकपा एसले हात झिक्छ त ?

गठबन्धनको माथिल्लो तहमा पूर्ण रूपमा प्याकेजमै सहमतिको निर्णय भएन र बोलिएका कुरा बारम्बार परिवर्तन गर्न गठबन्धनका ठूला दलहरू लागिरहे भने अर्थात् नेकपा एकीकृत समाजवादीको समग्र कार्यकर्ता पंक्ति र नेतृत्वलाई अवमूल्यन गर्ने व्यवहार भइरह्यो भने यो सरकारमा हामीले बसिरहनुपर्ने र गठबन्धनलाई साथ दिइरहनुपर्छ भन्ने छैन ।

गठबन्धन तोडेर नेकपा एकीकृत समाजवादी बाहिर निस्किन्छ ?

अब अस्ति सरकार गठन गर्दा एमाले र नेकपा माओवादी केन्द्रले हामीलाई संलग्न गराएकै थिएन । जब सरकारमा बहुमतको संकट आउन लाग्यो, तब दुवै जना पार्टी अध्यक्ष माधवकुमार नेपालको घरमै आउनुभयो । सँगै बसेर कुरा गर्नुभयो । आफ्ना गल्तीहरूप्रति आत्मालोचना गर्नुभयो । माफी माग्नुभयो । सकेसम्म एउटै यात्रामा हिँडौँ । हामी धेरैवटा कम्युनिस्ट पार्टी मिलेर सरकार चलाऔँ भन्ने कुरा गर्नुभयो । विगतका सारा गल्ती, कमी कमजोरी, नेकपा एमालेको नेतृत्वबाट प्राप्त धोकाधडी, हामीप्रतिको शत्रुतापूर्ण व्यवहार सबैलाई हामीले थाँती राखेर ठीकै छ त कम्युनिस्ट विचारधारा बोकेकाहरू, समाजवादी चिन्तन बोकेका दलहरू एक ठाउँमा उभिएर सरकार चलाऔँ भन्छन् भने हिजोका गल्तीलाई बिर्सिएर विवादको विषय नबनाई सरकारमा सहभागी हुनु ठीक होला भनेर शंकाको लाभ दिइएको हो । तर, गलत थियोजस्तो भइसक्यो ।

कतै माधव नेपालले बार्गेनिङ मात्रै गरेको त होइन ?

त्यस्तो होइन । बरु, बार्गेनिङमै केपी शर्मा ओली र प्रचण्डको कुरा मिलेर सरकार बनेको हो । प्रचण्ड र देउवाजीको पनि बार्गेनिङ मिलेरै सरकार बनेको हो । र, बार्गेनिङलाई नकारात्मक रूपमा नलिऔँ ।

त्यसो भए अहिलेकाे गठबन्धन ढल्छ त ?

बहुमत कोहीसँग छैन । कुनै पनि बेला ढल्ने गरीको गठबन्धन छ । हिजो पनि त्यस्तै थियो । आज पनि त्यस्तै छ । सबैलाई मिलाएर हिँड्छु भनेर सोच्यो र व्यवहार त्यस्तो गर्‍यो भने टिक्छ । तर, आज भइरहेको व्यवहारले गठबन्धन टिकाउनेभन्दा पनि ढाल्छ ।

नेकपा एसले गठबन्धन टुटाउन सहयोग पुर्‍याउँछ ?

हामी यो गठबन्धनमा बस्नुपर्छ भनेर कसम किरिया खाएर पाँच वर्ष गठबन्धनलाई चलाउनुपर्छ भनेर आएको पार्टी होइनौँ । अर्को कुरा, गठबन्धनमा उपयुक्त व्यवहार भएछ भने यसलाई सहयोग गरिन्छ । तर, आज गरिरहेको व्यवहारले सुदूरपश्चिमको घटनाक्रम निम्त्याएको हो । त्यसले केन्द्रीय गठबन्धनलाई निकै ठूलो संकट पैदा गर्नेवाला छ ।

प्रचण्ड र ओलीले के गर्दारहेछन् भनेर माधवले खोलेको परीक्षण फायर मात्रै त होइन ?

यो फायर भन्नुहुन्छ, यो हाम्रो चाल भन्नुहुन्छ वा दृष्टिकोण भन्नुहुन्छ, जे भन्नुहोस् । हामीले रेशम चौधरीको पक्षमा रहेको दलको नेतालाई मुख्यमन्त्रीका लागि समर्थन गर्‍यौँ । घटना यही हो । यसलाई जसरी व्याख्या गरे पनि भयो ।

भिडियाे हेर्नुहाेस् :