श्रम कार्यालय बुटवलमा सेवाग्राहीलाई सास्ती

A+ A A-

रुपन्देहीको मर्चवारी गाउँपालिका–७ का एक उल्लाहा मुसलमान गएको बिहीबार बिहानै बुटवलस्थित श्रम कार्यालय पुगेका थिए । बिहान ८ बजेदेखि नै श्रम कार्यालयमा लाइन बसेका उनले ४ बजेसम्म पनि फर्म बुझाउन पाएनन् । कतारका लागि श्रम स्वीकृति लिनुपर्ने काम सकेर साँझ घर फर्किने उनको फर्म बुझाउन नपाएपछि तुहियो ।

शुक्रबार फर्म त बुझाए तर साँझसम्म पनि काम सकिएन । सबै कागजपत्र मिलेको छ तर काम नभएको उनको गुनासो छ । काठमाडौं जान नपर्ने भनेर बुटवलमा श्रम स्वीकृति गर्ने व्यवस्थाले झन् सास्ती थपेको उनको भानाइ छ ।

यी त केही उदाहरण मात्र हुन् । यस क्षेत्रका वैदेशिक रोजगारमा जाने कामदारलाई श्रम स्वीकृतिका लागि काठमाडौं जानुपर्ने बाध्यता अन्त्य गर्न भन्दै सञ्चालनमा आएको कार्यालयबाट झन् सास्ती पाएका छन् । आफ्नै प्रदेशमा आएको कार्यालयले समयमै सेवा दिनेभन्दा सास्ती दिएको उनीहरूको गुनासो छ ।

दैनिक रूपमा ४ सयभन्दा बढी सेवाग्राही आउने कार्यालयमा २ सय जनाको मात्र काम हुने गरेको बताइन्छ । कार्यालयमा ४ सयभन्दा बढी सेवाग्राही दैनिक रूपमा कार्यालयमा पुग्छन् । श्रम स्वीकृतिका लागि काठमाडौं धाउनु नपर्ने भनेर सञ्चालनमा आएका कार्यालयले झनै सास्ती दिएका छन् ।

गएको १५ पुसदेखि बुटवलमा पनि पुनः श्रम स्वीकृति (एक पटक विदेश गएर आएकाहरूका लागि) शुरू भएको थियो । सुरूमा बुटवल उपमहानगरपालिका–६, चाँदबारीस्थित एक घरबाट कार्यालय सञ्चालन गरिए पनि त्यहाँ साँघुरो भएपछि श्रम तथा रोजगार मन्त्री गोकर्ण विष्टको निर्देशनमा चैतबाट बुटवल– १०, रामनगरस्थित सीप विकास तालिम केन्द्रको भवनमा कार्यालय स्थापना गरी काम गरिएको छ ।

कार्यालयमा सेवाग्राहीको ठेलमठेल हुन्छ । आफ्नो नाम नबताउने सर्तमा केही सेवाग्राहीले फर्मसँगै पैसा दिनेको एकै दिनमा पनि काम गरिदिने गरेको आरोप लगाए । गत पुसदेखि सातै प्रदेशबाट एक पटक विदेश गएर आएकाहरूका लागि श्रम स्वीकृति दिन शुरू गरिएको थियो । नयाँ कामदार भने काठमाडौं नै जानुपर्ने हुन्छ । सेवा प्रवाहमा समस्या हुनु मुख्य कारण इन्सुरेन्स गर्न समय लाग्नु पनि रहेको व्यवसायीको भनाइ छ ।

कार्यालयमा ११ जना मात्र कर्मचारी छन् । अंग्रेजी र अरबी भाषाका अनुवादक कम हुँदा समस्या भएको कार्यालयले जनाएको छ । सेवा दिन दुईवटा काउन्टर मात्र छन् । भाषा अनुवादक र केही कर्मचारी थप गर्न सकिए चारवटा काउन्टरबाट सेवा प्रवाह गर्न सकिने देखिन्छ । सेवाग्राहीको चाप बढेपछि कार्यालयले टोकन वितरण गरेको छ । कार्यालय प्रमुख अनन्तमणि मरासिनीले दसैंलगत्तै सेवाग्राहीको चाप हवात्तै बढेकाले श्रम स्वीकृतिका लागि आउने सबैलाई एकै दिनमा सेवा दिन नसकेको स्वीकार गरे ।

कार्यालयबाट प्रदेशका १२ वटै जिल्लावासीले सेवा लिन सक्नेछन् । त्यसबाहेक नेपालका जुनसुकै जिल्लाका मानिसले पनि यो कार्यालयबाट सेवा लिन सक्छन् । कार्यालयले हालसम्म २७ हजार जनाको श्रम स्वीकृति गरेको जनाएको छ । वैदेशिक रोजगारमा बढी भएका ठाउँलाई लक्षित गरी शुरूमा प्रदेशमा श्रम स्वीकृति दिन शुरू गरिएको थियो । नेपालमा सबैभन्दा धेरै २ नम्बर प्रदेशका युवा वैदेशिक रोजगारमा छन् ।

प्रकाशित मिति: बुधबार, कात्तिक ६, २०७६ १६:५१