यूएईका सडकमा पर्यटकले भरिएको दुईतले बस हुइँक्याउने शान्तिकुमारी (भिडियो)

A+ A A-

युनाइटेड अरब इमिरेट्स (यूएई) का चौडा र चम्किला सडकमा गुड्ने डबल डेकर अर्थात् दुईतले पर्यटकीय बसमा चढ्नै लागेका पर्यटक सेतो सर्ट, कालो पाइन्ट र कालै चस्मामा सजिएकी शान्तिकुमारी भण्डारीको मुस्कानसहितको स्वागतमा छक्क पर्छन् । कतिपय मन्त्रमुग्ध हुन्छन् ।

विश्वका विभिन्न देशबाट आएका पर्यटकहरू भरेर शान्ति आफ्नै रफ्तारमा 'बिग बस' हुक्याउँछिन् । को हुन् त यसरी यूएईका चिल्ला सडकमा संसारभरका पयर्टक राखेर यत्रो बिग बस हुइँक्याउने शान्ति ?

०००

ओखलढुङ्गाको खुवापानीमा चार दशअघि दुई छोरा र पाँच छोरीमध्ये काइली शान्तिलाई बाल्यअवस्थादेखि नै जिवनमा केही न केही गर्नुपर्छ भन्ने लाग्थ्यो । बुबा अमरबहादुर भण्डारी नेपाल आर्मीमा थिए । छाराछोरीले केही गर्छुभन्दा प्रोत्साहन गरिरहन्थे ।

दुई दाइहरू काठमाडौं बस्ने भएकाले शान्ति पनि ओखलढुङ्गास्थित गंगा मा.विबाट ८ कक्षासम्मको अध्ययन पूरा गरेर काठमाडौं छिरिन् । थप अध्ययन काठमाडौंबाटै गरिन् ।

शान्ति सन् २०१५ मा नेपालमा अवसरको खोजीमा भौँतारिइरहेकी थिइन् । चाहेजस्तो र खोजे जस्तो केही काम फेला परेको थिएन ।

त्यतिबेला शान्तिकी बहिनी यूएईमा थिइन् । उनी यूएईमा ब्युटिपार्लरमा कार्यरत थिइन् र ब्युटिपार्लरको शाखा बिस्तार गर्ने तयारी भइरहेको थियो । बहिनीले शान्तिलाई ब्युटिपार्लरको शाखा विस्तारका क्रममा अवसर सिर्जना भएकाले इच्छा भए आफूले सहयोग गर्ने बताइन् ।

बहिनीको प्रस्ताव शान्तिलाई राम्रो लाग्यो । बहिनीले यूएईबाटै भिजिट भिषाको चाँजोपाँजो मिलाइदिइन् । त्यतिबेला शान्तिसँग पासपोर्ट थिएन, न पार्सपोर्ट बनाउन लाग्ने पाँच हजार नै थियो । आमाले आफ्नो तिलहरी बेचेर उनलाई पार्सपोर्ट बनाउने खर्च जुटाइदिएको शान्ति सम्झिन्छिन् ।

त्यसपछि शान्ति अवसरको खोजीमा परदेशतर्फ लागिन् । यूएई पुगेर उनले ब्युटिपार्लरमा काम थालिन् ।

करिब एक वर्षपछि शान्तिले उक्त काम छाडिन् । उनमा सवारीचालक अनुमतिपत्र (ड्राइभिङ लाइसेन्स) लिएर 'ड्राइभर' बन्ने सपना थियो ।

जुन भिषामा उनी त्यहाँ पुगेकी थिइन् । त्यही भिषाले उनले सवारीचालक अनुमतिपत्र (ड्राइभिङ लाइसेन्स) पाउन सहज थिएन । उनले हिम्मत हारिनन् बरू जसरी भए पनि ड्राइभिङ लाइसेन्स लिने उपायको खोजीमा लागिन् ।

त्यसका लागि यातायात क्षेत्रमै काम गर्नुपर्ने थाहा पाइन् र स्थानीय यातायात कम्पनीमा स्कुल बस सुपरभाइजरको काम थालिन् ।

त्यसको एक वर्षपछि लाइट सवारीको लाइसेन्स प्राप्त गरेसँगै स्कुल बस सुपरभाइजरको काम छाडेर अबुधावीस्थित एक प्रतिष्ठित यातायात कम्पनीमा अल गजलमा पुगेर १९ दिने प्रशिक्षण लिइन् । त्यसपछि सोही कम्पनीमा ट्याक्सी चालकको काम गर्न थालिन् ।

ट्याक्सी चलाउन थाले पनि सडकका बारेमा राम्रो ज्ञान नहुँदा सुरूवाती दिनमा निकै गाह्रो भएको उनको अनुभव छ । आफ्नै गल्तीले कतिपय अवस्थामा यात्रुहरूको भनाइ खानुपरेको पनि शान्ति सुनाउँछिन् ।

तर, उनले हिम्मत हारिनन् । आफूले आफैँलाई सम्झाइरहिन् । संयमता अपनाउँदै काम गरिरहिन् । केही महिनामै सडकसँग अभ्यस्त बनिन् ।

करिब पाँच वर्ष त्यहाँ ट्याक्सी चलाएपछि आफूमा थप जोस र आत्मविस्वास जागेको उनी बताउँछिन् । त्यसपछि उनमा ठूलो अर्थात् हेबी बस चलाउने रहर जाग्यो । अनि आबुधाबीमा सिटी बस चालकको अनुमतीपत्रका लागि आवेदन दिइन् । अन्तर्वाता र त्यसपछिको ड्राइभिङ टेस्ट परिक्षामा सफल भइन् ।

आबुधाबीको यातायात नीति उनका लागि सहज थिएन । महिला बस चालकका लागि नीति नभएकाले उनको आवेदन रद्द भयो ।

पुनः बस टुर्स कम्पनीमा बिग बसमा डबल डेकर अर्थात् दुई तले बस चालकका लागि आवेदन दिइन् । मध्यपूर्वीय पर्यटन क्षेत्रमा महिला बस चालक अभ्यास नै थिएन । सोहीकारण उक्त कम्पनीले पनि उनको प्रस्तावलाई खासै चासो दिएन ।

त्यसपछि बिग बस टुर्स मध्यपूर्वका क्षेत्रीय निर्देशक माइकल लिसलाई भेटेर शान्तिले आफूले काम गर्न सक्ने विस्वाश दिलाइन् । उनको केही गर्ने हुटहुटी देखेर प्रभावित बनेका तिनै माइकलको सहयोगमा डबल डेकर बस (दुई तले पर्यटकीय) बस चालकको अनुमति पाएको उनी सुनाउँछिन् ।

यसरी शान्तिले आफूलाई मध्यपूर्वको पर्यटन क्षेत्रमा प्रथम महिला डबल डेकर बस चालकका रूपमा उभ्याएकी मात्र छैनन्, विश्वभरका महिलाका लागि प्रेरणासमेत बनेकी छन् ।

पछिल्लो समय यूएईस्थित विभिन्न संघसंस्थाहरूले उनलई प्रेरक पात्रका रूपमा बोलाउछन् । शान्ति भ्याएसम्म पुग्ने कोसिस गर्छिन् ।

आफ्नो सफलतामा सबैभन्दा धेरै आमा खुसी भएको बताउने शान्ति भन्छिन्, ‘धेरैले तपाईं मेरो प्रेरणाको स्रोत हो भन्नुहुन्छ । धेरै खुसी लाग्छ । तर अझै धेरै गर्नुछ ।’

मान्छेले कुनै पनि असफलताबाट बिचलन हुनुको सट्टा त्यसलाई पाठका रूपमा लिएर आफ्नो उद्देश्यमा निरन्तर लाग्ने हो भने सफलता सम्भव रहेको शान्तिको भनाइ छ ।