ब्रिटिस पूर्वकमान्डरको दाबी– यो वर्ष युक्रेनले युद्ध हार्न सक्छ

A+ A A-

रुसको हमलापछि युक्रेनलाई आर्थिक र सैन्य सहयोग गर्दै आएका पश्चिमा देश नै अब युक्रेनले युद्ध हार्ने निष्कर्षमा पुग्न थालेको पाइएको छ ।

ब्रिटेनका ज्वाइन्ट फोर्सेज कमान्डका एक पूर्व कमान्डर सर रिचर्ड ब्यारन्सले युक्रेनले यो वर्ष रुससँग हारको सामना गर्न सक्ने बताएका हुन् ।

उनले युक्रेनले युद्ध हार्ने गम्भीर खतरा रहेको भन्दै यसको कारण भने युक्रेन नै रुसविरुद्ध युद्ध जित्न नसकिने निष्कर्षमा पुग्न सक्ने बताए ।

यद्यपि युक्रेनले अहिलेसम्म यो निष्कर्ष निकालेको छैन । तर, युक्रेनी राष्ट्रपति भोलोदिमिर जेलेन्स्कीले पश्चिमा सहयोग कम हुँदै गए रुससँग लड्न कठिन हुने बताउने गरेका छन् ।

युक्रेनी सेनाले अहिले पनि गोलाबारुद, सैनिक र हवाई सुरक्षाको कमी महसुस गरिरहेको छ । गत वर्ष युक्रेनले गरेको सबैभन्दा प्रभावकारी प्रत्याक्रमणमा पनि रुसले कब्जा गरेका क्षेत्रबाट उसलाई पछि हटाउन सकेन ।

रुसले युक्रेनमा यो वर्षको गर्मीमा हमलाको तयारी गरिरहेको छ । रुसी यो वर्षदेखि अग्रिम पंक्तिमा लडिरहेको छ । तोपखाना र गोलाबारुदसहित अतिरिक्त लडाकू प्रयोग गरिरहेको छ, जसमा एफएबी ग्लाइड बम पनि सामेल छ । यो सोभियत कालको बम हो । जसमा पंखा, जीपीएस र १५ सय किलोग्राम विस्फोटक पदार्थ लगाइएको हुन्छ । यसले युक्रेनी सुरक्षाफौजमा ठूलो क्षति पुर्‍याइरहेको छ ।

गत वर्ष रुसले कहाँ आक्रमण गर्ने भन्ने स्पष्ट चित्र बनाएको थियो । सोही अनुसार जापोरिजियाको दक्षिण क्षेत्रसहितका इलाकामा हमला गरी युक्रेनको आक्रामक रणनीतिलाई सफल हुन दिएन । यो वर्ष पनि रुसले कब्जा गरेको डोनबास क्षेत्रको बाँकी हिस्सा जोगाउन युक्रेनलाई कठिन हुनेछ ।

रुसको सीमा क्षेत्रमा रहेको खारकिभ युक्रेनको रक्षा क्षेत्रका लागि ठूलो चुनौती हुने पश्चिमा विश्लेषण छ । जुन ठाउँमा अहिले पनि रुसी मिसाइल हमला भइरहेका छन् । ड्रोन, क्रुज र ब्यालेस्टिक मिसाइल हमलाको घातक मिश्रणबाट भइरहेको हमलाबाट बच्न युक्रेन पर्याप्त हवाई सुरक्षा गर्न असमर्थ छ ।

पूर्वी युक्रेनको डोनबास क्षेत्र सन् २०१४ देखि युद्धग्रस्त छ । जहाँ रुस समर्थित पृथकतावादीले पिपुल्स रिपब्लिक घोषित गरेका छन् । रुसले २०२२ मा डोनबास क्षेत्रका दुई प्रान्त डोनेस्क र लुहान्स्कमाथि रुसले कब्जा गरेको हो । पछिल्लो डेढ वर्षदेखि जमिनमा सबैभन्दा बढी लडाइँ यही क्षेत्रमा भइरहेको छ ।

बाख्मुत र अब्दिभ्का शहर कब्जा गर्ने रुसको कोसिस रोक्ने क्रममा युक्रेनले ठूलो सैनिक र आर्थिक संसाधन गुमाएको थियो । यो युद्धमा रुसतर्फ पनि ठूलो क्षति पुर्‍याएको युक्रेनको दाबी छ । तर, रुससँग अझै युद्धमा प्रयोग गर्ने जति सैन्य शक्ति छ, युक्रेनसँग त्यस्तो शक्ति छैन ।

युक्रेन अब जुन गम्भीर स्थितिमा छ, त्यसैको फाइदा उठाउँदै रुसले आफसेआफ निर्णायक अग्रता हासिल गर्न सक्छ । मध्यपूर्वमा छेडिएको नयाँ युद्धले युक्रेनलाई पश्चिमा सहयोग छायामा परिरहेको बेला रुस युक्रेनमाथिको हमला रोक्ने पक्षमा देखिँदैन ।

प्रकाशित मिति: आइतबार, वैशाख २, २०८१ १७:४९