किमले दिए चेतावनी– युद्धको समय आइसक्यो

A+ A A-

उत्तर कोरियाली नेता किम जोङ उनले एकपटक फेरि युद्धको चेतावनी दिएका छन् । उनले देशको आसपासको सैन्य र राजनीतिक स्थिति स्थिर नरहेकाले अब पहिलेभन्दा बढी युद्धका लागि तयार रहन निर्देशन दिएका छन् । देशको प्रमुख सैन्य विश्वविद्यालयको भ्रमणका क्रममा उनले युद्धको समय आएको बताएका हुन् ।

यो महिनाको सुरुमा उत्तर कोरियाले नयाँ हाइपरसोनिक इन्टरमिडिएट ब्यालिस्टिक मिसाइलको परीक्षण गरेको थियो, जसबाट उत्तर कोरियाको ब्यालिस्टिक मिसाइलको तैनाथी थप बलियो बनेको विश्लेषण गरिएको छ ।

उत्तर कोरियाले दक्षिण कोरिया र अमेरिकाले लगातार सैन्य तनाव बढाइरहेको आरोप लगाउँदै आएको छ । उनले केही महिनाअघि मात्रै दुस्मनले उक्साएमा परमाणु हमला गर्न पनि नहिचकिचाउने बताएका थिए ।

यसलगत्तै उत्तर कोरियाले अन्तरमहादेशीय ब्यालिस्टिक मिसाइल ह्वासोङ–१८ को लन्च गरेको थियो । यद्यपि उत्तर कोरियाले आफू युद्धको विरुद्धमा रहेको र आफ्ना परमाणु हतियार आत्मरक्षाका लागि भएको बताउने गरेको छ ।

अमेरिका, दक्षिण कोरिया र जापानको शत्रुतापूर्ण नीतिको सामना गर्न हतियार आवश्यक भएको उनको दाबी छ । गत वर्षको सैन्य परेडका क्रममा किमले आफ्नो परमाणु शक्ति देशको हित उल्लंघन गर्नेविरुद्ध हमला गर्न सुम्पिएको बताएका थिए ।

गत वर्षको सेप्टेम्बरमा मात्रै उत्तर कोरियाले एक कानुन संशोधन गरेको छ । जसले सम्भावित हमलाको खतरालाई मध्यनजर गर्दै परमाणु हतियार प्रयोगको अधिकार दिन्छ ।

योसँगै राजनीतिक नेतृत्व वा जनताको ज्यान खतरामा परेको वा देशमाथि आक्रमणको अवस्थामा परमाणु हतियार प्रयोगको एकल निर्णय नेता किमले गर्न सक्छन् ।

यति मात्रै होइन, यदि कमान्ड कन्ट्रोल सिस्टममा खतरा महसुस भएमा मिसाइल अटोमेटिक लञ्च हुनेछ । अर्थात् किम जोङ उनको स्वीकृतिसमेत चाहिने छैन । उत्तर कोरियाले संशोधन गरेको कानुनअनुसार परमाणु हतियार उत्पादनमा पनि तीव्रता ल्याउनेछ ।

जुलाईमा उत्तर कोरियाका रक्षामन्त्री काङ सुन नामले दक्षिण कोरियामा अमेरिकाका एयरक्राफ्ट क्यारियर्स, बम्बर्स र मिसाइल सबमरिनको तैनाथीले परमाणु हतियार प्रयोगको खतरा बढेको बताएका थिए ।

उत्तर कोरियासँग ३० देखि ४० वटा परमाणु हतियार रहेको विश्वास गरिन्छ । यसबाहेक उसले हरेक वर्ष ६ देखि सातवटा नयाँ हतियार बनाउन सक्छ । सन् २००३ मा उत्तर कोरिया परमाणु अप्रसार सन्धिबाट पछि हटेको थियो ।

उसले २००६ देखि २०१७ को बीचमा ६ पटक परमाणु हतियारको परीक्षण गरेको थियो । सन् २०१७ मा उत्तर कोरियाले हाइड्रोजन बम परीक्षण गरेको थियो । जुन परमाणु बमभन्दा केही गुणा बढी शक्तिशाली हुन्छ ।

उत्तर कोरियाले परीक्षण गरेका परमाणु हतियार १०० देखि ३७० किलोटनसम्मका रहेको बताइन्छ । जबकि १०० किलोटनको परमाणु बम हिरोसिमामा खसालिएको बमभन्दा ६ गुणा शक्तिशाली हुन्छ ।

यसै वर्षको मार्चमा किमले न्युक्लियर वेपन इन्स्टिच्युटको भ्रमण गरेको थिए, जहाँ उत्तर कोरियाका परमाणु बम राखिएको छ । उत्तर कोरियाले सानासाना परमाणु हतियार पनि बनाएको छ, जसलाई कम दूरीका मिसाइलमा तैनाथ गर्न सकिन्छ ।

सन् २०१८ मा उत्तर कोरियाले अमेरिकी तत्कालीन राष्ट्रपति डोनाल्ड ट्रम्पसँगको वार्तापछि पुंग्ये–री साइट बन्द गरेको थियो । यहीँबाट उसले छपटक परमाणु हतियार परीक्षण गरेको थियो । तर, अमेरिकासँगको वार्ता असफल भएसँगै उत्तर कोरियाले फेरि यसलाई सञ्चालनमा ल्याएको छ ।

प्रकाशित मिति: शुक्रबार, चैत ३०, २०८० १७:०८