लुम्बिनीका मुख्यमन्त्रीले आज विश्वासको मत लिने, मन्त्री नपाएसम्म मत नदिने नेकपा एसको अडान

लुम्बिनीका मुख्यमन्त्रीले आज विश्वासको मत लिने, मन्त्री नपाएसम्म मत नदिने नेकपा एसको अडान

A+ A A-

आज लुम्बिनी प्रदेशका मुख्यमन्त्री जोखबहादुर महराले विश्वासको मत लिँदै छन् । नेपाली कांग्रेसका डिल्लीबहादुर चौधरिले राजीनामा दिएपछि चैत २३ मा माओवादी केन्द्रको संसदीय दलका नेता महरा मुख्यमन्त्री बनेका थिए ।

दिउँसो १ बजे बस्ने प्रदेशसभा बैठकमा महराले विश्वासको मत लिने कार्यसूची रहेको प्रदेशसभा सचिव दुर्लभकुमार पुन मगरले जानकारी दिए ।

महरालाई पाँच राजनीतिक दलका ४७ र एक स्वतन्त्र सांसद गरी ४८ जना प्रदेशसभा सदस्यको समर्थन छ । मुख्यमन्त्री नियुक्त भएको एक महिनाभित्र विश्वासको मत लिनुपर्ने संवैधानिक प्रावधान छ ।

महरालाई गठबन्धनका दल नेकपा एमालेका २९, माओवादी केन्द्रका १०, नागरिक उन्मुक्ति पार्टीका ४, जनता समाजवादी पार्टी (जसपा) का ३, एकीकृत समाजवादीका १ र स्वतन्त्र सांसद खड्ग बस्नेत गरी ४८ सांसदको समर्थन छ ।

प्रदेशसभाका ८७ मध्ये बहुमतका लागि ४४ सांसद आवश्यक पर्छ । मुख्यमन्त्रीले तीन जना मन्त्रीसमेत नियुक्त गरिसकेका छन् । तर, उनीहरूको जिम्मेवारी भने तोकिएको छैन ।

एमालेबाट दल उपनेता चेतनारायण आचार्य, माओवादी केन्द्रबाट दीपेन्द्र पुन र जसपाबाट भण्डारीलाल अहिर मन्त्री बनेका छन् ।

विश्वासको मत पाएपछि मात्रै मन्त्रीको जिम्मेवारी तोकिने र थप मन्त्री नियुक्त गर्ने तयारी मुख्यमन्त्रीको छ ।

यता एकीकृत समाजवादी र स्वतन्त्र सांसद खड्ग बस्नेतलाई मन्त्री बनाउने लिखित सहमति कार्यान्वयन नभएसम्म महरालाई मत नदिने अडान नेकपा एकीकृत समाजवादीले राखेको छ ।

लुम्बिनी प्रदेशमा सरकार गठन हुनुअघि दलहरूबीचमा भएको सहमति कार्यान्वयन नहुँदासम्म महरालाई विश्वासको मत नदिने अडान राखेको एकीकृत समाजवादी लुम्बिनी प्रदेशका सुदन खनालले जानकारी दिए ।

लुम्बिनीमा सरकार गठन हुँदा एकीकृत समाजवादीलाई पनि सरकारमा सहभागी गराउन मन्त्री दिने सहमति भएको थियो । तर, मुख्यमन्त्रीले सहमति कार्यान्वयन नहुँदै चैत ३० मा विश्वासको मत लिन थालेको भन्दै पूर्वसहमति कार्यान्वयन नहुँदासम्म विश्वासको मत दिन नसकिने अडान नेकपा एसले राखेको छ ।

लुम्बिनी प्रदेशमा एकीकृत समाजवादीबाट भगवती अधिकारी मात्रै प्रदेशसभा सदस्य छिन् । उनलाई सामाजिक विकासमन्त्री बनाउने आश्वासन मुख्यमन्त्रीले दिएका दिएका थिए ।

तर, एक हप्ताभित्रै सत्ता साझेदार दलको बीचमा मन्त्रालय भागवण्डाको विषयले तरंग ल्याउन थालेको छ । नेकपा एसले मत नदिए पनि समर्थन गरेका अन्यले मत दिएमा भने महराले विश्वासको मत पाउनेछन् ।

प्रकाशित मिति: शुक्रबार, चैत ३०, २०८० ०८:५३