जब सुवासले 'कठैबरीलै भन्ने कोनै छ र तिमी र मलाई' गीतमा संगीत भरे...(भिडियाे)

A+ A A-

लै लै लै लै... कठैबरीलै
भन्ने कोनै छ र तिमी र मलाई

चलचित्र प्रसादको यो गीत त तपाईंले पक्कै सुन्नुभएकाे हुनुपर्छ । यो गीतका गायक केतल क्षेत्री हुन् भने संगीतकार सुवास भुसाल। युट्युबमा तीन करोड दश लाख भन्दा धेरे पटक हेरिएको ‘लै लै’ गीत यति चर्चित बन्नुको कारण यस गीतमा भरिएको सुगम संगीत पनि हो भनिन्छ ।

सुवासले ‘लै लै’ भन्दा पहिले नै करिब दुई सयवटा लोक गीत तथा थुप्रै चलचित्रमा संगीत भर्ने काम गरिसकेका थिए । तर, चलचित्र प्रसादको ‘लै लै’ गीतले भने उनलाई सिंगाे चलचित्र क्षेत्रमा परिचित गरायो । वि.स. २०४० सालमा नुवाकोटमा जन्मिएका सुवास काठमाडौंमा हुर्के पढेका हुन् । घरमा बुबा मादल बजाउने भजन तथा गीतहरू गाउने भएकाले उनको बाल्यकाल सांगीतिक माहाैलमा नै बित्यो । सानैदेखि गम्भीर प्रकृतिका सुवास परिवारिक माहाैलका कारण पनि कलिलै उमेरमा संगीतप्रति आकर्षित हुन पुगे । स्कुलमा गुनगुनाउँदा साथीहरू उनको स्वरको प्रशंसा गर्दा त झनै सुवास दंग पर्थे।

त्याे बेला आजकाे जस्तो प्रविधिकाे विकास भएकाे थिएन । वाकमेनमा गीत सुन्ने चलन थियो । गीत सुन्न औधी रुचि भएका उनले ढिपी गरेर वाकमेन किन्न बाध्य पारे । वाकमेनमा उनी नारायण गोपाल, रामकृष्ण ढकाल, यम बराल लगायतका गीत धीत नमरेसम्म सुन्थे । बिस्तारै उनी आफैँ गायक बन्ने सपना देख्न थाले । २०६५ सालतिरको कुरा हाे सुवासले पहिलोपल्ट आफ्नै स्वरमा एउटा भजन रेकर्ड गराए । त्यसपछि आफैँ गाउने सोचले ‘जलन र पीडा’ नामक गीत तयार गरे । रेकर्ड पनि गराए । तर आफैँले गाएकाे गीत उनी आफैँलाई चित्त बुझेन । पछि फेरि राजेशपायल राईलाई गाउन दिए र त्यसमा संगीत भर्ने काम आफूले गरे ।

राजेशले गाएसँगै ‘जलन र पीडा’ लाई धेरै स्रोताले मन पराए । त्यहीँबाट सुवासले म त गायक होइन संगीतकार पो बन्नुपर्ने रहेछ भन्ने महसुस गरे । रेकर्डिङ स्टुडियोमा भेटिने सत्यराज आचार्य, स्वरुपराज आचार्य, रामकृष्ण ढकाललगायत त्यसबेलाका सर्वाधिक लोकप्रिय गायकहरू भेटेपछि त झनै उनलाई मैले गाउनु हुँदैन भन्ने लाग्यो । अर्काेतर्फ ‘जलन र पीडा’ ले स्रोताको मन जितेसँगै उनलाई संगीतकारका रूपमा खोज्नेहरूको संख्या बढ्न थाल्यो । त्यहीँबाट सुवासको संगीतकारका रूपमा व्यवसायिक यात्रा सुरु भयो ।

सुवासले पहिलोपल्ट चलचित्र सुश्रीको गीतमा संगीत भर्ने अवसर पाए । चलचित्र सुश्रीमा सुवासले भरेको संगीतको पृथक र आकर्षक शैलीले चलचित्र निर्माताको ध्यान खिच्न सफल बन्यो । त्यसपछि चलचित्र क्षेत्रमा उनको माग बढ्न थाल्यो ।
सुश्रीपछि, फिर्के, प्रसाद, सेल्फी किङ, आमा तथा भष्मे डन लगायत दर्जनाैँ चलचित्रमा संगीत दिइसकेका सुवास आफैँलाई भने सेल्फी किङको जिन्दगीको के छ र भर बोलको गीत सबैभन्दा धेरै मन पर्छ ।

उसो त संगीतकार पर्दापछाडि रहेर काम गर्ने भएकाले स्रोता तथा दर्शकमाँझ अक्सर अपरिचित नै रहने गर्छन् । तर गीतकार, गायक र संगीतकार एकअर्काका परिपुरक भएको सुवासको बुझाई छ ।

धैर्यता र निरन्तरताले नै आफूलाई सफल बनाएको बताउने सुवास पछिल्लो समय चलचित्र ‘पुजार सार्की’मार्फत निर्माताका रूपमा देखा परेका छन् । सुवासको लगानी रहेका ‘पुजार सार्की’ मा प्रदीप खडका, आर्यन सिग्देल तथा पल शाहकाे अभिनयलाई दिनेश रावतले निर्देशन गरेका छन् ।

‘पुजार सार्की’ आगामी जेष्ठ १० गते प्रदर्शनमा आउने छ । नेपालको सन्दर्भमा जुनसुकै क्षेत्रमा व्यवसायिक रूपले लाग्नेहरूका निम्ती सुरुवाती समयमा सहज नहुने अनुभव रहेको तर आफूले भने जीवनमा संगीतको क्षेत्रबाहेक केही नसोची लागेका कारण आजसम्म सुरुवातदेखि संगीतबाहेक पेट पाल्न अर्को काम गर्नुनपरेको उनी सुनाउँछन् ।

भिडियाे हेर्नुहाेस् :

प्रकाशित मिति: बुधबार, चैत २८, २०८० २०:२५