जनताको विश्वास जितेका दिन हिन्दु राष्ट्र बनाउँछौँ, गणतन्त्र र संघीयता फाल्छौँः राप्रपा महामन्त्री गुरुङ [भिडियो वार्ता]

जनताको विश्वास जितेका दिन हिन्दु राष्ट्र बनाउँछौँ, गणतन्त्र र संघीयता फाल्छौँः राप्रपा महामन्त्री गुरुङ [भिडियो वार्ता]

A+ A A-

प्रधानमन्त्री पुष्पकमल दाहाल ‘प्रचण्ड’लाई गत ९ फागुनमा ४० बुँदे मागपत्र बुझाएको राष्ट्रिय प्रजातन्त्र पार्टी (राप्रपा) आजदेखि आन्दोलनमा उत्रँदै छ । प्रधानमन्त्री प्रचण्डले माग सम्बोधन नगरेकाले काठमाडौंमा शक्ति प्रदर्शन गर्ने राप्रपाले जनाएको छ । सरकार र राजनीतिक दलहरूलाई पूर्वराजा ज्ञानेन्द्र शाह पनि अटाउने राजनीतिक व्यवस्थाका लागि दबाब दिनु प्रदर्शनको उद्देश्य रहेको राप्रपाले जनाएको छ । राप्रपाका महामन्त्री राजेन्द्र गुरुङका अनुसार शक्ति प्रदर्शन गर्नुको अर्को उद्देश्य देशलाई हिन्दु राष्ट्र कायम गर्नु, प्रदेश खारेज, भ्रष्टाचार, कुशासनविरुद्ध जनतालाई जागरुक पार्नु पनि हो । यही विषयमा गुरुङसँग शिलापत्रकर्मी जङ्ग तामाङले गरेको कुराकानीः

०००

राप्रपाले व्यवस्था परिवर्तनका लागि भन्दै आजदेखि प्रदर्शन गर्दै छ, सफल हुनुहोला ?

हामीले अवस्था र व्यवस्था परिवर्तको शंखघोष गर्‍यौँ । मुलुकमा विकृति, विसंगति, बेथिति, बेरोजगार र भ्रष्टाचार बढ्दो छ । उद्योग कलकाखारना बन्द छन् । युवाहरूले विदेशिनुपरेको छ । ठूल्ठूला भ्रष्टाचारका काण्डहरू भएका छन् । त्यसमा ठूला राजनीतिक दलका तलदेखि माथिसम्मका नेता मुछिएका छन् । राजनीतिले मुलुकलाई समृद्धितर्फ उन्मुख गर्नुपर्नेमा, मुलुकको अस्तित्व, मान सम्मान बढाउनुपर्नेमा उल्टै कमजोर पार्ने काम भइरहेको छ । यो राजनीतिक व्यवस्थाबाट मुलुक अगाडि बढ्दैन ।

मुलुकलाई कसरी अगाडि बढाउने ?

अहिलेकै मार्गचित्रबाट मुलुक अगाडि बढ्दैन । ठूला दलहरूलाई नै राष्ट्र निर्माणको जिम्मेवारी दिने हो भने मुलुक अगाडि बढ्न सक्दैन । त्यस कारण गत फागुनमै हामीले सरकारलाई मागपत्र बुझाएका थियौँ । त्यसको सम्बोधन हुनुपर्थ्यो । राज्य गम्भीर रूपमा प्रस्तुत हुनुपर्थ्यो । तर, भएन । हामीले हाम्रा आन्दोनलका कार्यक्रम सुरु गरेका छौँ । आज जनतालाई आन्दोलित गराएर उपत्यकामा प्रदर्शन गर्दै छौँ । मलाई लाग्छ, यो प्रदर्शनले नेपाली जनतालाई आन्दोलित बनाउनेछ । घचघच्याउनेछ । जनताको मानसिकतामा व्यवस्थाप्रति व्यापक परिवर्तन ल्याउनेछ । नेपाल र नेपाली जनताले भोग्नुपरेको समस्याबाट मुक्ति पाउन व्यवस्था परिवर्तन गर्नुपर्छ ।

भ्रष्टाचार, रोजगारी, सुशासन जस्ता प्रश्न व्यवस्था परिवर्तनले निदान हुन्छ ?

अबको समस्या समाधान सबैको सहअस्तित्व र सबैको सम्मानबाट हुने हो ।

त्यो भनेको राजासहितको व्यवस्था चाहिन्छ भनेको हो ?

हो । त्यो राजसंस्था, जसको २५० वर्षको इतिहास छ । मुलुक निर्माण गर्ने सन्दर्भमा, जनताको उन्नति र प्रगति गर्ने सन्दर्भमा, देशको विकास गर्ने सन्दर्भमा अनुभव होला नि त्यो राजसंस्थाको ।

तर, राजा निरंकुश बन्दा जनताले नै फालेका होइन र ?

गलत भाष्य । जनताले जनआन्दोलनबाट राजालाई फालेकै होइनन् । त्यसबेला राजसंस्था अन्त्यको एजेन्डा नै थिएन ।

राजा ज्ञानेन्द्र कसरी नागार्जुन पुगे त ?

देशी-विदेशी षड्यन्त्रले पुर्‍याए । मुलुकको विकासमा ठूलो बाधक राजसंस्थालाई देख्यो ।

माओवादीले त राजसंस्थालाई ‘सामन्तवादको प्रतीक’ भन्थ्यो नि ?

उसले भन्थ्यो । तर, अहिले सामन्तवादको प्रतिनिधित्व उसैले गर्छ । आज प्रचण्डले ३० हजार डलरको घडी लाउँछन् । उसको छोरीले १२ लाखको ब्याग बोक्छिन् ।

राप्रपालाई धनुषामा हुर्किएका डा. रामवरण यादव, भोजपुरमा हुर्किएकी विद्या भण्डारी या तनहुँमा हुर्किएका राचमन्द्र पौडेल राष्ट्राध्यक्ष भएको मन नपरेको हो ?

नेपालको अस्तित्व सदासर्वदा रहिरहनुपर्छ । अटुट् रहनुपर्छ । अटल रहनुपर्छ । हाम्रो मान्यता के हो भने यो नेपालको अस्तित्व दिगो बनाउने र अटल बनाउने हो भने राष्ट्रपति प्रणालीबाट वा गणतान्त्रिक प्रणालीबाट सम्भव छैन । आज तपाईं हेर्नुहुन्छ भने जताजतै निराशा पाउनुहुन्छ ।

राजतन्त्रमा चाहिँ जनता खुसी थिए ? देश ठीकठाक चलेको थियो ?

देशको मान, सम्मान र अस्तित्वमा औँला कसैले ठड्याउँदैनथे । विदेशमा नेपालीको शिर उँचो थियो । विकास त क्रमशः हुँदै जाने कुरा हो । २०५७ सम्ममा देशलाई एसियाली मापदण्डमा पुर्‍याउने लक्ष्य थियो । एउटा लक्षित गन्तव्य थियो । आज २०८० मा आइपुग्दा सिटामोल किन्न नपाएर मान्छे मरिरहेका छन् । ५ हजार औषधिको बिल तिर्न नसकेर अस्पतालको छतबाट हाम फालेर मरिरहेका छन् । त्यस्तो घटना सुन्नुभएको छैन ? त्यस कारण मुलुकलाई जोगाउनका लागि हामी सबैको सहभागिता चाहिन्छ ।

उसो भए मुलुक जोगाउन प्रदर्शन गर्न लाग्नुभएको ?

त्यो त हो त । अहिलेको मार्गचित्र र प्रणालीबाट मुलुक जोगिँदैन भन्ने हाम्रो ठहर हो । हाम्रो निष्कर्ष हो । त्यसका लागि हामीले चाहेको सरकार र दलहरूबीच नवीन समझदारी हो । नेपाल र नेपाली जनतालाई केन्द्रविन्दुमा राखेर विश्वमा नेपाल र नेपालीको मान सम्मानलाई उँचो पार्ने प्रणालीमा जाऔँ ।

पूर्वराजालाई नारायणहिटीमा ल्याउने र राष्ट्रप्रमुखको भूमिका दिलाउने त हो नि राप्रपाको लक्ष्य ?

त्यति संकुचित भएर पनि नहेरौँ । हाम्रो उद्देश्य भनेको नेपाल जोगाउने हो । अहिलेको व्यवस्थाले जोगिँदैन । नेपाल जोगियो भने राजा पनि रहने हो । हामी पनि रहने हो । नेपाल नै नरहे कोही पनि रहँदैनौँ । त्यस कारण मुलुक जोगाउन राप्रपा मात्रै भएर पुग्दैन, तीन करोड नेपालको साथ चाहिन्छ ।

हिजो राजा हुँदा हालीमुहाली गरेका तपाईंहरूलाई अहिले सत्ताको छटपटी त भएको होइन नि ?

त्यस्तो होइन । राप्रपालाई सरकारमा आउन भनेर रातो कार्पेट ओछ्याइएको छ । प्रदेशमा पनि चार सिट भएको ठाउँमा मुख्यमन्त्रीको अफर छ । रेड कार्पेट ओछ्याइरहेको छ । तर, अहिले हामी सरकारमा नआउने भनेका छौँ । मुलुक जोगाउन अभियानमा जाने भनेका छौँ ।

प्रदेश सभामुखमा त खुट्टा उचालेर जानुभयो नि ?

गयौँ । तर, कोशी र बागमतीको सभामुखमा जानु छुट्टै रणनीति छ ।

अनि, प्रदेश खारेजीको माग राख्ने तर प्रदेशकै सभामुख लिन मिल्छ ? कस्तो खालको राजनीति राप्रपाको ?

राजनीति भनेको सधैँ सिधा बाटोमा जाँदैन । हामी मन, वचन र कर्मले संघीयताविरोधी हौँ । वचन र कर्मले हामी धर्मनिरपेक्षताको विरोधी हौँ । गणतन्त्रको विरोधी हौँ । राप्रपालाई सभामुख दिँदा भोलि नियति के हुन्छ भन्ने अहिल्यै गणतन्त्रवादीहरूले बुझ्नुपर्छ । म तपाईंमार्फत गणतन्त्रवादीहरूलाई भन्न चाहन्छु, तपाईंहरूले संघीयताविरोधीलाई प्रदेशको सभामुख बनाउनुभएको छ, हेर्दै जानुहोस्, भोलि नियती के हुन्छ ?

संघीयता मासिदिनुहुन्छ ?

पहिलो काम नै त्यही हुन्छ । मासिदिन्छौँ । नेपाली जनतालाई आन्दोलित गरेर नेपाली जनताको विश्वास जुन दिन जित्छौँ, त्यही दिन खारेज गरिदिन्छौँ ।

प्रकाशित मिति: मंगलबार, चैत २७, २०८० १०:३५

जङ्‌ग तामाङ

प्रतिक्रिया दिनुहोस्

भर्खरै

विश्वकप खेल्ने टाेली घाेषणा भएपछि सन्दीपले लेखे– षड्यन्त्रकाे शिकार भएँ, सबैलाई आशिष मिलाेस्

नेता भएर अर्ती नदिनुस् आफूले पनि काम गर्नुस् : मुख्यमन्त्री कँडेल

सप्तरीको चिम्टीका अग्निपीडितलाई छिन्नमस्ता गाउँपालिकाका कर्मचारीले एक दिनको तलब दिने

गर्मी बढेपछि बुटवलका विद्यालयमा दुई दिन बिदा

सुदूरपश्चिमका मुख्यमन्त्री साेडारीले शुक्रबार विश्वासको मत लिने

लोकप्रिय

सहकारी ठगीले इलाम २ मा तनाव दिएपछि रवि लामिछानेको नयाँ स्टन्ट, धन्यवाद दिन गृह मन्त्रालय पुग्ने को हुन् ?

सरकार ढाल्न कांग्रेसले दाेहाेराे संवाद थालेपछि प्रचण्डले तयार पारे तीन विकल्प

इलाम २ः प्रारम्भिक मतपरिणाममा एमाले र 'पूर्वएमाले'बीच टक्कर

श्रीमती रञ्जितासँगकाे सहमति भंग भएपछि रेशम विक्षिप्त, २० मिनेटमा सात स्टाटस

इलाम २ अपडेटः यस्तो छ प्रारम्भिक मतपरिणाम

विचार

पसिना बगाउनेहरूलाई हेलाहोचो गरेर कसरी आऊला समृद्धि ?

लगानी सम्मेलन : यसअघि गरिएका लगानी प्रतिबद्धता कार्यान्वयन भए कि भएनन्, खाेजी हुनुपर्छ

चीनमा एउटै भूकम्पले लिएको थियो ८ लाख ३० हजारको ज्यान (भिडियो)

ब्लग

कसरी हटाउने सार्वजनिक सवारीको बेथिति ?

सधैँ हाँसीखुसी देखिने गाउँकी काकी, डाक्टर र अर्जुन मैनालीले राेजेकाे गलत बाटाे

छोटो तर मनमोहक पदयात्रा 'लाङटाङ'

शिक्षा

आफ्नै छोराछोरी पढाउन राजा वीरेन्द्रले भित्र्याएका थिए ए–लेभल, कस्ता विद्यार्थीले पढ्ने ?

जनकपुरकाे याज्ञवल्क्य स्कुलमा विद्यार्थीकाे आकर्षण, प्रवेश परीक्षा दिने आधाले मात्रै पाए भर्ना

१२ वर्षीय सुवर्णो आइज्याक बारी कसरी बने प्रोफेसर ?