हमास–इजरायल युद्धः खण्डहर बन्यो गाजा, १२ सयको बदला ३३ हजारको ज्यान

A+ A A-

हमासलाई नष्ट गर्ने भन्दै इजरायलले गाजामाथि हमला सुरु गरेको ६ महिना पूरा भएको छ ।

हमासविरुद्ध भनिए पनि मानवतालाई नै चुनौती दिएको यो युद्धका क्रममा महिला र बालबालिकासहित ३३ हजारभन्दा बढीको ज्यान गएको छ । हमासलाई समाप्त पार्ने दाबी गरिएको यो युद्धमा उत्तरी गाजा र दक्षिणी गाजाका अधिकांश क्षेत्र ध्वस्त बनेका छन् ।

अब इजरालयलले लाखौँ प्यालेस्टिनीले शरण लिइरहेको रफाहलाई निशाना बनाउने तयारी गरिरहेको छ । जसका कारण हमासविरुद्ध भनिएको युद्ध गाजाका सर्वसाधारणविरुद्ध हो कि भन्ने देखिन थालेको छ । हमासले गत वर्षको ७ अक्टोबरमा इजरायलमाथि हमला गरेको थियो ।

हमासका लडाकुले इजरायली क्षेत्रमा प्रवेश गरी हमला गरेका थिए । रकेट हमलामा तेल अभिभ, मध्य इजरायल र आसपासका क्षेत्रमा १ हजार २ सय इजरायली मारिएका थिए । साथै, हमासले सीमावर्ती क्षेत्रमा चलिरहेको एक म्युजिक फेस्टिबलमा आक्रमण गर्दा २५० भन्दा बढीलाई बन्दी बनाएर गाजामा लगेको थियो ।

त्यसपछि सुरु भएको ६ महिने युद्धका क्रममा ३३ हजार १७५ जना प्यालेस्टाइनीकाे मृत्यु भइसकेको छ । जसमा ७० प्रतिशत महिला र बालबालिका छन् । मारिनेमा १४ हजार ३५० जना बालिबालिका छन् । यो निकै भयानक दृश्य हो । यसरी हेर्ने हो भने १ इजरायली बराबर नेतान्याहुको सेनाले २७ प्यालेस्टिनीको हत्या गरेका छन् ।

गाजाको करिब आधा जनसंख्या उत्तरदेखि दक्षिण र अहिले रफाहमा समेटिएको छ । मारिनेमा १७० जना संयुक्त राष्ट्र संघका कर्मचारी र ७ जना वल्र्ड सेन्ट्रल किचनका कर्मचारी समेत रहेका छन् । यस्तै, यो युद्धमा ९० जना पत्रकारले समेत ज्यान गुमाएका छन् ।

गाजामा मृत्यु हुनेको संख्या योभन्दा बढी हुन सक्ने अनुमान गरिएको छ, जहाँ ७५ हजारभन्दा बढी घाइते भएका छन् ।

अन्तर्राष्ट्रिय मिडिया रिपोर्टअनुसार गाजाको १७ प्रतिशत क्षेत्र रफाहमा १५ लाखभन्दा बढी मानिस बसिरहेका छन् । संयुक्त राष्ट्रसंघले गाजामा तत्काल युद्धविराम गर्न प्रस्ताव पारित गरे पनि त्यसलाई बेवास्ता गरिरहेको इजरायलले अब यही क्षेत्रलाई आफ्नो निशाना बनाउने तयारी गरिरहेको छ ।

गाजाको अन्य क्षेत्र भग्नावशेषमा परिणत भइसकेको छ । अन्तर्राष्ट्रिय दबाबबीच रफाह र आसपासका क्षेत्रबाट इजरायलले आफ्नो सेना फिर्ता बोलाए पनि इजरायली रक्षामन्त्री योआब ग्यालेन्टले सेनाले दक्षिणी शहर रफाहसँगै अन्य इलाकामा हमलाको तयारी गरिरहेको बताएका छन् ।

युद्धविरामका लागि इजिप्टको कायरोमा वार्ता भइरहे पनि कुनै परिणाम निस्किन सकेको छैन ।

प्रकाशित मिति: सोमबार, चैत २६, २०८० १६:४०