लुम्बिनीका मुख्यमन्त्रीको शपथअघि सत्ता साझेदारको बैठक, आचार्यको नेतृत्वमा सरकारमा जाने एमालेको तयारी

लुम्बिनीका मुख्यमन्त्रीको शपथअघि सत्ता साझेदारको बैठक, आचार्यको नेतृत्वमा सरकारमा जाने एमालेको तयारी

A+ A A-

लुम्बिनी प्रदेशका मुख्यमन्त्री जोखबहादुर महाराले आज दिउँसो पद तथा गोपनीयताको शपथ लिँदै छन् । आजै सानो आकारको मन्त्रीमण्डल विस्तार गर्ने महराको तयारी छ ।

अहिले भागवण्डा मिलाएर मन्त्रिपरिषद् गठन गर्नका लागि सत्ता साझेदारहरूको छलफल भइरहेको छ । आइतबा बिहान बुटवलमा छलफल सुरु भएको हो । यसअघि पटकपटक छलफल भए पनि सहमति भइनसकेकाले आज पुनः बैठक बसेको हो । महरालाई समर्थन गरेका पाँच दल र स्वतन्त्र सांसद छलफलमा सहभागी छन् ।

प्रदेश प्रमुखको कार्यालय बुटवलमा शपथ लिएपछि मुख्यमन्त्री तथा मन्त्रीहरू पदवहालीको लागि प्रदेश राजधानी दाङ जानेछन् ।

४८ जना प्रदेशसभा सदस्यहरूको हस्ताक्षरसहित सरकारको दाबी पेस गरेका नेकपा (माओवादी केन्द्र) का जोखबहादुर महरालाई लुम्बिनी प्रदेश प्रमुख अमिक शेरचनले शुक्रबार नेपालको संविधानको धारा १६८ को उपधारा (२) अनुसार मुख्यमन्त्री नियुक्त गरेका थिए । महरालाई एमालेका २९, माओवादी केन्द्रका १०, नागरिक उन्मुक्ति पार्टीका ४, जनता समाजवादी पार्टीका ३, नेकपा एकीकृत समाजवादीका १ र स्वतन्त्र १ सांसदले समर्थन गरेका छन् ।

एमाले भने प्रदेश सांसद चेतनारायण आचार्यको नेतृत्वमा सरकारमा सहभागी हुने तयारीमा छ । आचार्य प्रदेशस्थित एमाले संसदीय दलका उपनेता हुन् । ‘नेकपा एमालेका तर्फबाट चेतनारायण आचार्यको नेतृत्वमा सरकारमा सहभागी हुने निर्णय भएको छ । उहाँले मुख्यमन्त्रीसँगै आज बिनाविभागीय मन्त्रीको रूपमा शपथ लिनुहुन्छ,’ एमालेका एक नेताले भने ।

अर्घाखाँची निर्वाचन क्षेत्र नम्बर १ को (१) बाट दोश्रोपटक प्रदेशसभा सदस्यमा निर्वाचित आचार्य यसअघि पार्टी महासचिव शंकर पोखरेल नेतृत्वको सरकारमा आन्तरिक मामिलामन्त्री र २०७९ मा लिला गिरी नेतृत्वको सरकारमा खानेपानी तथा सहरी विकासमन्त्री भएका थिए ।

यसअघि लिला गिरी नेतृत्वको सरकारमा सहभागी भएर तीन महिना मात्रै मन्त्री भएकाहरूलाई नै दोहोर्‍याउने सम्भावना रहेको ती नेताले बताए । आचार्यले कुन मन्त्रालय लिने भन्ने टुंगो नलागे पनि एमालेलेले अर्थ र भौतिक पूर्वाधार तथा विकास मन्त्रालयको दाबी गरेकाले ती दुई मन्त्रालयको मर्यादाक्रम मिलाएर एउटाको जिम्मेवारी आचार्यले लिने उनको भनाइ छ ।

आज सकेसम्म साना दलसमेत समेटेर ४ जना मन्त्रीले शपथ लिने तयारी रहेको उनले बताए ।

प्रकाशित मिति: आइतबार, चैत २५, २०८० ०९:२९