अरू दलले घरदैलाे थाल्दा कांग्रेस कार्यकर्तामा छटपटी, उम्मेदवार छान्न नेताको गलफती

अरू दलले घरदैलाे थाल्दा कांग्रेस कार्यकर्तामा छटपटी, उम्मेदवार छान्न नेताको गलफती

A+ A A-

मंगलबार अपराह्नदेखि साँझसम्म कांग्रेस सभापति शेरबहादुर देउवा निवास बूढानीलकण्ठमा के भइरहेको छ भन्ने विषयमा ध्यान थियो । १५ वैशाखको उपचुनावमा इलाम २ र बझाङ १ (क) को उम्मेदवार छान्न संसदीय बोर्ड र पदाधिकारी तथा पूर्वपदाधिकारी बैठक राखिएको थियो । टिकटका आकांक्षीहरू चासो दिएर देउवा निवास वरपर चहारिरहेका थिए ।

घरीघरी उनीहरू देउवा निवासको कम्पाउन्डभित्र प्रवेश गर्न चाहन्थे । तर सुरक्षाकर्मीले रोक्थे । बाहिर उनीहरूको गुनासो हुन्थ्यो, ‘अरू पार्टीका उम्मेदवारले प्रचार थालिसके हाम्रो को हो भन्ने पनि थाहा छैन । यसरी कसरी हुन्छ ?’

अन्य पार्टीहरूले उम्मेदवार छानेर प्रचार गर्न घरदैलोमा पुग्दा कांग्रेसले उम्मेदवार नदिएकोका उनीहरू आक्रोशित देखिन्थे । खाजा पसल, चोक र देउवा निवासअघि टिकट पाउने सम्भावना भएकाहरू खर्चको जोहोको हिसाब गर्न व्यस्त थिए । उता निवासभित्र भने नेताहरूको बैठक बस्नै सकेन, कुर्दाकुर्दा पट्यार लाग्यो, कति पर्खने भनेर नेताहरू बाहिरिन थाले ।

२ बजे संसदीय दल र ३ बजे पदाधिकारी बैठक राखिएको थियो । नेताहरू देउवा निवासभित्र प्रवेश गरे तर सभापति देउवा पार्टीको मुख्य पदाधिकारीसँग छुट्टै बैठकमा थिए ।

‘२ बजे बोलाइएको बैठक समयमा सुरु हुनुपर्‍यो । नभएपछि हामी हिँड्यौँ,’ केन्द्रीय सदस्य अर्जुननरसिंह केसीले भने । उनीसँगै नेताहरू विजयकुमार गच्छदार, गोपालमान श्रेष्ठ, नारायण खड्का, रमेश रिजाल पनि निस्किए । देउवा निवासमा भएका नेताहरू मोबाइल खेलाएर बसे । देउवा भएको अर्को कोठामा नाममा गल्फतती भइरह्यो । देउवाको इलाम २ मा डम्बर खड्कालाई टिकट दिने चाहना छ । उनी २०७९ सालको चुनावमा एमालेका सुवास नेम्वाङसँग ११४ मतले हारेका थिए । देउवाको दिमागमा त्यही थियो । उनले सो कुरा भनिरहे । उता इतर समूह भने भेषराज आचार्यलाई टिकट दिलाउन खटिएको थियो । आचार्यको संगठनमा पकड भएको र उनलाई टिकट दिँदा हुने बताइरहेका थिए । देउवालाई मनाउन नसकेपछि इतर समूहका नेता डा शेखर कोइरालालाई बोर्ड बैठकमा आउन आग्रह गरियो । सो बैठकमा शेखरले देउवालाई धम्क्याउने राजनीतिक भाषा प्रयोग गरे ।

कोइरालाले जित्ने उम्मेदवारलाई टिकट नदिए पार्टीले क्षति बेहोर्ने चेतावनी दिए । बैठकमा कोइरालाले ‘जित्ने गरी टिकट दिनुस् होइन भने सबै जिम्मा तपाईँहरू लिनुस्’ भने । यति भनेर शेखर बैठकबाट निस्किँदै गर्दा केन्द्रीय सदस्य शशांक कोइराला दाइको कुरामा मेरो पनि सहमति छ भन्दै सँगै निस्किए ।

‘पार्टीले हारेकालाई टिकट नदिने निर्णय गरेको छ । फेरि तपाईँहरू हारेकोलाई टिकट दिन खोज्दै हुनुहुन्छ के गर्न खोजेको ? इलामको सवालमा सबैले भेषराजले जित्छ भन्दै छन् । तपाईं किन बुझ्नुहुन्न ? भेषराजलाई टिकट दिनुभयो भने ठीक छ होइन भने हार जितको जिम्मा तपाईं लिनुस्,’ शेखरले बैठकमा भने ।

उनीहरू सवा ५ बजे अघिपछि गर्दै देउवा निवासबाट बाहिरिए । बैठक जारी थियो । नेताहरू पालैपालो निस्किए । दुवै पक्ष आ–आफ्नो अडानमा रहिरहँदा आज निष्कर्ष ननिस्कने भन्दै नेताहरू बाहिरिएका थिए । सवा ६ बजे नेता एनपी साउद निस्किए । चलिरहेको छ केही पनि भएको छैन, भन्दै उनी बाहिरिए । उनीसँगै बाहिर आएका सहमहामन्त्री बद्री पाण्डे केही कुरा गरेर भित्र गए ।

साँढे ६ बजे नेताहरू आज नहुने भयो भन्दै निस्किए । ‘भोलि २ बजे संसदीय दलको बैठक र ४ बजे पदाधिकारी बैठक राखिएको छ,’ सहमहामन्त्री जीवन परियारले भने । देउवानिवासबाट बाहिरिँदै गर्दा नेताहरूले भन्दै थिए, ‘डम्बरजीलाई पाँच वर्षका लागि परीक्षण हुन दिइसकेका हौँ नि । सबै पार्टीले पहिचानवादी उठाए यसमा पनि हाम्रो विकल्प छ नि ।’

बैठकमा नेताहरूले मिल्ने कुरा नगर्दा बाहिर भेटिएका नगेन्द्र कुमाल भने जसले टिकट पाए पनि जिताउन लाग्नुपर्छ भन्दै थिए । ‘आफूले पाए जित्न लाग्ने हो अरूले पाए जिताउन लाग्ने हो । पार्टीले हार्न हुँदैन,’ शुभेच्छुकसँगको कुराकानीमा उनले भन्दै थिए ।

संसदको विषय प्रवेश

कांग्रेसले गृहमन्त्री रवि लामिछानेलाई संसदको रोस्ट्रममा जानबाट रोक्ने निर्णय गरेको छ । मंगलबार सभापति शेरबहादुर देउवाको निजी निवासमा बसेको संसदीय बोर्डको बैठकले गृहमन्त्री लामिछानेलाई संसदको रोस्ट्रममा जान रोक्ने निर्णय गरेको हो ।

’भोलि (बुधबार) मन्त्रीको जवाफ दिने कार्यसूचीमा गृहमन्त्रीको नाम आएमा संसद अवरोध गर्ने । त्यो नआएमा संसद अघि बढ्न दिने । आकस्मिक समयमा महामन्त्री विश्वप्रकाश शर्माले बोल्ने निर्णय भयो,’ कांग्रेस सहमहामन्त्री जीवन परियारले भने ।

सहकारी हिनामिना प्रकरणमा गृहमन्त्री लामिछानेको संलग्नता रहेको बारे संसदीय छानबिन समितिको माग राख्दै कांग्रेसले उनलाई संसदमा रोक लगाइरहेको छ ।

प्रकाशित मिति: मंगलबार, चैत २०, २०८० २२:०१