के कांग्रेस गृहमन्त्री लामिछानेप्रति नरम भएको हो ?

A+ A A-

नेपाली कांग्रेस र राष्ट्रिय स्वतन्त्र पार्टी (रास्वपा) बीच सम्बन्ध ठीकठाक छैन । कांग्रेसले इतिहास देखाएर आफ्नो तुलनामा रास्वपालाई राजनीतिक सिद्धान्त प्रस्ट नभएको पार्टी मान्छ । रास्वपाले पनि कांग्रेससँग सम्बन्ध बनाउन रुचि देखाएको छैन । रास्वपा माओवादी नेतृत्वको सरकारमा एमालेसँग मिलेर दुई पटक सरकारमा गएको छ ।

रास्वपा सरकारमा सहभागी भइरहँदा सहकारीको रकम हिनामिनामा सभापति रवि लामिछाने मुछिए । हाल उपप्रधान तथा गृहमन्त्री रहेका लामिछानेको राजीनामा बटमलाइन बनाएको कांग्रेस अहिले संसदीय समिति बनाएर सूर्यदर्शन सहकारीबाट लामिछानेले लिएको कर्जाबारेमा छानबिन गर्न माग गरिरहेकाे छ ।

कांग्रेसले मिनी संसदमा लामिछानेलाई स्वागत र प्रतिनिधिसभामा बहिस्कार गरिरहेकाे छ । संसदको राज्य व्यवस्था तथा सुशासन समितिका सभापति रामहरि खतिवडाले लामिछानेलाई गरेको स्वागतलाई लिएर कांग्रेस नेताहरूले अनभिज्ञता प्रकट गरेका छन् ।

तर, समिति सभापति खतिवडा पार्टी सभापति शेरबहादुर देउवाको अनुमति लिएर समिति बैठक राखेकाे दाबी गर्छन् । अहिले कांग्रेसका संसदहरू संसद बैठक सुरु हुनेबित्तिकै जर्‍याकजुरुक उठ्छन् । सभामुखले समय दिन्छन् र कांग्रेसको तर्फबाट एक जनाले गृहमन्त्रीमाथि लागेका आराेपकाे छानबिन गर्न संसदीय समिति गठनकाे माग गर्छन् र बैठक चल्न दिन्छन् ।

के गृहमन्त्री लामिछानेसँग कांग्रेसकाे सम्बन्ध सुध्रिने लाइनमा हाे ? 'पहिलाभन्दा अलि बढी हाइ हेल्लो हुन थालेको हो ।त्यसलाई सम्बन्ध भन्न मिल्दैन,’ रास्वपा प्रवक्ता मुकुल ढकालले भने ।

कांग्रेस सभापति देउवाले सरकारमा जाने रणनीतिअन्तर्गत अन्य दललाई नचिढ्याउने नीति लिएका छन् । त्यसअनुसार रास्वपाप्रति कांगेस नरम भएको ठानिएकाे छ । ‘कांग्रेसका नेताहरूको दिमागमा घन्टी बजेर अरू दलहरूसँग पनि कुरा गरिराख्न पर्छ भने जस्तो देखिन्छ । सत्ता सहकार्य गर्ने कुरा भएको छैन । त्यस्तो तहमा सम्बन्ध आएको छैन,’ प्रवक्ता ढकालले प्रस्ट्याए ।

कांग्रेस सभापति देउवाले प्रधानमन्त्री पुष्पकमल दाहाल प्रचण्डसँग भेट बढाउनु पनि कांग्रेसले अन्य दलहरूसँग सम्बन्ध सत्ता र प्रतिपक्षमा हुँदा नजिकको बनाउन खोजेको देखिएकाे उनले बताए ।

उता कांग्रेसभित्र संस्थापन समूहले नरम बन्ने रणनीति बनाइरहँदा इतरसमूह भने लामिछानेप्रति गरम नै छ । उनीहरूले पार्टीको एकै धारणा बनाउन संसदीय दलको बैठक राख्न पनि सभापति देउवामाथि दबाब दिइरहेका छन् ।

‘बाहिर भाष्य त्यस्तो आएकाे जस्ताे हामीलाई लाग्दैन,’ कांग्रेस सांसद सञ्जय गौतमले शिलापत्रसँग भने । कांग्रेसले पहिला मन्त्री लामिछानेबारे प्रधानमन्त्रीको जवाफ माग गरेको थियो । त्यसबाट चित्त नबुझाएपछि संसदीय छानबिन समितिको माग गरेको छ ।

‘सहकारीसँग धेरै कुराहरू जोडिएको छ । सत्य तथ्य जनतामाँझ आउनुपर्छ । संसदलाई बन्धक बनाउने हाम्रो मुड होइन । एउटा समयसम्म सरकारले हेरोस् भनेर पर्खन्छौँ,’ गौतमले भने, ‘कांग्रेस रास्वपासँग नरम भन्ने होइन । भोलि आफ्नै मन्त्री पर्‍यो भने पनि हाम्रो माग त्यही हो ।’

छानबिन गर्नुपर्ने मन्त्रालयमा आरोपी बस्न नमिल्ने र छानबिनमा मन्त्री लामिछानेले सघाउनुपर्ने कांग्रेसको माग छ । सोमबारको प्रतिनिधिसभामा कांग्रेसले सहकारी ठगहरूको पक्षमा सरकारले वकालत गरिरहेको बतायो ।

कांग्रेसको तर्फबाट बोल्दै सांसद प्रतिमा गौतमले भनिन्, ‘सरकार अहिले सहकारी पीडितलाई न्याय दिने कुरामा भन्दा उनीहरूलाई घरको न घाटको बनाउने सहकारी ठगहरूको पक्षमा वकालत गर्ने, फैसला सुनाउन उद्यत भएको देखिन्छ ।’

उनले उजुरी ताम्रपत्र र स्वर्णपत्रमा लेख्नुपर्ने हो भनेर प्रश्न गरिन् । ‘प्रधानमन्त्रीज्यू यही संसदमा आएर गृहमन्त्री रवि लामिछानेविरुद्ध परेको कानुनी हिसाबले मुद्दा गर्न अयोग्य भएको फैसला गर्नुहुन्छ, मानौँ वासिङ मेसिनमा राखेर सफाचट पारेर निकालेकोजस्तो गरेर यहाँ बोल्नुहुन्छ,’ उनले भनिन्, ‘आरोपित गृहमन्त्री आफूविरुद्ध परेको उजुरीलाई चिर्कटोको संज्ञा दिनुहुन्छ । दुःख लाग्छ, उजुरी त कागजमै लेख्ने होला नि, कि ताम्रपत्र, स्वर्णपत्रमा लेख्ने चलन हाे।’

प्रकाशित मिति: सोमबार, चैत १९, २०८० २०:४७