गोप्य रिपोर्ट हेरेर देउवाले इलाममा कसलाई देलान् टिकट ?

A+ A A-

उपचुनावका लागि मुख्य दलहरूले उम्मेदवार चयन गरे पनि नेपाली कांग्रेसले तय गरेकाे छैन । उसले इलाम २ मा गोप्य सर्वेक्षण गरे पनि त्यसको विवरण के थियो भन्ने खुलाएको छैन । पार्टी केन्द्रबाट गरिएको सर्वेक्षणअनुसार उम्मेदवारको खोजीमा कांग्रेस छ । ‘जिल्लाका साथीहरूसँग अनौपचारिक कुरा गरेका छौँ । प्राध्यापक, शिक्षक, वकिल, व्यापारी, भ्रातृ तथा शुभेच्छुक संस्थाका साथीहरू, नयाँ पुराना साथीहरूसँग पार्टी च्यानलबाट कुरा भएको हो । फलानाले गरे भनेर खोल्न मिल्दैन,’ प्रचार विभाग प्रमुख मीन विश्वकर्माले शिलापत्रसँग भने ।

अहिले पार्टी केन्द्रबाट महामन्त्री विश्वप्रकाश शर्मा र सहमहामन्त्री भीष्मराज आङ्देम्बे चुनावी क्षेत्रमा खटिएका छन् । भूगोलबाट केन्द्रमा पदाधिकारी भएकाले उनीहरू विशेष रूपमा खटिएका हुन् । कांग्रेसको इलाम २ क्षेत्रीय कार्यसमिति, प्रदेश प्रतिनिधि र महाधिवेशन प्रतिनिधिको ६ चैतको संयुक्त बैठकले सात जनाको नाम सिफारिस गरेको थियो । सिफारिस हुनेहरूमा भेषराज आचार्य, डम्बरबहादुर खड्का, केशव थापा, रमेश लिङ्देन, चन्द्रमाया लिम्बू, शान्तिकला राई तामाङ र नगेन्द्र कुमाल छन् । पहिलो नम्बरमा सिफारिस भएका आचार्य कांग्रेस महासमिति सदस्य हुन् । उनी २०७० सालको संविधानसभा निर्वाचनमा एमाले नेता नेम्वाङसँग पराजित भएका थिए । खड्का पनि २०७९ को चुनावमा नेम्वाङसँगै पराजित भएका थिए ।

उनीहरूमध्ये पाँच जना टिकटको आकांक्षा बोकेर नेपाली कांग्रेसका इलामका नेताहरू काठमाडौंमा अस्थायी डेरा जमाएर बसेका छन् । उनीहरूमध्ये चन्द्रमाया लिम्बू, शान्तिकला राई तामाङ काठमाडौं आएका छैनन् ।

काठमाडाै‌ आएका नेताहरू पार्टीका शक्तिकेन्द्रहरू सभापति शेरबहादुर देउवा निवास बुढानीलकण्ठ, इतर समूहका नेता शेखर कोइरालाको सचिवालय बालुवाटार, महामन्त्री गगन थापाको सचिवालय रातो पुलमा अस्थायी डेरा जमाएर बसेका छन् । महामन्त्री थापा बिहीबारबाट रोकिएको संवाद यात्रामा छन् । ‘इलामको उपचुनावको उम्मेदवारबारे पार्टीमा केही पनि प्रगति भएको छैन,’ संवाद यात्रा अघि उनले शिलापत्रसँग भनेका थिए । भूगोलको हिसाबले इलाममा उम्मेदवार चयन र अन्य रणनीतिको जिम्मा अर्का महामन्त्री शर्माले गर्नेछन् भन्दै उनी रोकिएको संवाद यात्रा पूरा गर्नतिर लागे ।

सभापति देउवाले बुधबार आकांक्षीहरूलाई निवासमा बोलाएका थिए । ‘संसदीय बोर्डबाट निर्णय हुनेछ’ भन्ने औपचारिक सन्देश लिएर आकांक्षीहरू निस्किए । सिफारिस भएकाहरूमध्येमा संस्थापन समूहले जिल्ला सभापतिसमेत रहेका खड्कालाई अघि सार्न चाहेको छ भने इतर समूहले आचार्यलाई । पार्टीको निकायमा दुवैको नाममा सहमति हुन नसके थापाले बाजी मार्न सक्नेछन् ।

कांग्रेस उपचुनावको टिकट दिनका लागि हतारिएको छैन । ‘प्रतिनिधिसभाको चुनावमा कांग्रेसका उम्मेदवार थोरै मतले पराजित हुनुभएको हो । उपचुनाव भएकाले बुझेर टिकट दिऔँ भनेर समय लिएका हौँ । हतारिएका छैनौँ,’ विश्वकर्माले भने । कांग्रेसले १९ चैतमा उम्मेदवार तय गर्ने जनाउ सभापति देउवाले आकांक्षीहरूलाई दिएका छन् । त्यसअघि आकांक्षीहरूलाई मिल्न र नमिले पनि संख्या कम हुने गरी आउन देउवाले भनेका छन् ।

आकांक्षीहरूबीच संवादमा एकले अर्कालाई छाडिदिन आग्रह गरिएको खड्काले बताए । ‘संवाद भएको एक/दुईपल्ट जसले टिकट पाए पनि एकले अर्कालाई सहयोग गर्ने भन्ने कुरा छ । मैले छोड्ने भन्ने त प्रश्नै आउँदैन । भर्खर हारेको घाइते मान्छे हुँ,’ खड्काले भने । पार्टीले स्थलगत प्रतिवेदन तयार पारेकाले त्यसका आधारमा उम्मेदवार तय गरे स्वीकार हुने उनले बताए । ‘फिल्ड भिजिटबाट आएको रिपोर्टअनुसार उम्मेदवार छनोट भएमा हामीले स्वीकार गर्छौं,’ खड्काले भने ।

अर्का आकांक्षी आचार्यले टिकट पाउने विषयमा नेताहरूमा छलफल भए पनि कसलाई दिने भन्नेबारे तय नभएको बताए । उनले आफूलाई सङ्गठन र कार्यकर्ताको साथ रहेको दाबी गरे । क्षेत्रीय सभापति, उपसभापति, सचिव, प्रदेश सांसद आफ्नो पक्षमा रहेको उनको दाबी छ । ‘मैले टिकट पाउनेमा कार्यकर्ता आशावादी छन् । नपाएमा १५–२० प्रतिशत कांग्रेस कार्यकर्ताले पार्टी छाड्छन् । मैले म बलियो भन्न खाेजेको होइन । पहिचानवादी र नयाँ दलको प्रभाव पर्न सक्ने भएकाले भनेको हुँ,’ आचार्यले भने ।

२०७९ मा भएको चुनावमा प्रत्यक्षतर्फ एमालेका उम्मेदवार सुवास नेम्वाङले ३० हजार २० मत ल्याउँदा तत्कालीन सत्ता गठबन्धनका उम्मेदवार कांग्रेसका खड्काले २९ हजार ९०६ मत ल्याएका थिए । समानुपातिकतर्फ नेपाली कांग्रेसले २२ हजार ३ सय ३३, नेकपा एमालेले २६ हजार ५ सय ६२, माओवादी केन्द्रले ५ हजार १ सय ५३, जनता समाजवादीले ९ सय ६, एकीकृत समाजवादीले ५ सय ८६ र स्वतन्त्रले ४ हजार ६ सय ८६ मत प्राप्त गरेका थिए ।

प्रकाशित मिति: शुक्रबार, चैत १६, २०८० १९:५९