कांग्रेस नेतृत्वलाई थाहै नदिई रामहरिले गृहमन्त्री लामिछानेलाई किन बोलाए संसदीय समितिमा ?

कांग्रेस नेतृत्वलाई थाहै नदिई रामहरिले गृहमन्त्री लामिछानेलाई किन बोलाए संसदीय समितिमा ?

A+ A A-

सूर्यदर्शन सहकारी ठगी प्रकरणमा मुछिएको भन्दै प्रतिनिधिसभामा प्रमुख प्रतिपक्षी दल नेपाली कांग्रेसले उपप्रधानमन्त्री तथा गृहमन्त्री रवि लामिछानेलाई बहिष्कार गर्दै आएको छ । कांग्रेसले प्रतिनिधिसभा बैठकमा राजीनामा माग गर्दै लामिछानेलाई गृहमन्त्रीका रूपमा स्वीकार गर्न नसकिने अडान लिइरहेको छ । तर, प्रतिनिधिसभामा गृहमन्त्री लामिछानेलाई बहिष्कार गर्दै आएको कांग्रेसले संसदीय समितिमा भने स्वीकार गरेको छ ।

प्रतिनिधिसभामा बहिष्कार गरेका गृहमन्त्री लामिछानेलाई कांग्रेसकै सांसद रामहरि खतिवडा सभापति रहेको राज्य व्यवस्था तथा सुशासन समितिमा भने प्रस्टीकरण दिने मौका दिइएको छ । खतिवडाले गृहमन्त्री लामिछानेलाई समितिको बैठकमा किन बोलाए भन्ने विषयमा कांग्रेसकै सांसदहरू अनभिज्ञ छन् ।

समितिमा रहेका कांग्रेसका अन्य सांसदहरू समितिको बैठक भएर जानैपर्ने बाध्यता रहेको र सभापतिले ‘पार्टी नेतृत्वसँग कुरा गरेर गृहमन्त्रीलाई बोलाएका होलान्’ भन्ने प्रतिक्रिया दिन्छन् । कास्कीको सूर्यदर्शन सहकारीबाट सदस्य नै नभई करोडौँ रकम अपचलन गरेको भन्दै कांग्रेसले प्रतिनिधिसभामा मन्त्री लामिछानेमाथि छानबिन गर्न संसदीय समिति बनाउनुपर्ने माग राख्दै आएको छ । उसले मन्त्री लामिछाने संलग्नबाहेक अन्य संसदीय गतिविधि नियमित हुन दिएको छ ।

समिति सदस्य हृदयराम थानी सभापतिले बुझ्नुपर्ने कुरा रहेको बताउँछन् । समिति सभापति पार्टीको केन्द्रीय सदस्य भएकाले राजनीतिक कुरामा खतिवडाले ध्यान दिनुपर्ने उनको भनाइ छ । ‘प्रतिनिधिसभामा पार्टीले उहाँलाई (उपप्रधान तथा गृहमन्त्री लामिछाने) बोल्न दिएको थिएन । यता समितिमा सभापतिजीले किन बोलाउनुभयो ? उहाँ (समिति सभापति खतिवडा)ले बोलाउनु हुन्छ/हुन्न कोसँग सल्लाह गर्नुभयो र बोलाउनुभयो ? बैठक छ भनेपछि समितिको बैठकमा जानैपर्‍यो । राजनीतिक तालमा, के कसरी जाने उहाँले बुझ्ने कुरा हो । पार्टीका शीर्ष नेताहरूसँग पनि सल्लाह गर्नुभएको होला । त्यो कुरा हामीलाई भन्नुभएको छैन,’ थानीले शिलापत्रसँग भने ।

समिति सभापति खतिवडाले पार्टीका नेताहरूसँग समन्वय गरे/नगरेको विषयमा कांग्रेस प्रचार विभाग प्रमुख मीन विश्वकर्माले भने अनभिज्ञता प्रकट गरे । ‘म पनि छक्क परेको छु । उहाँले गृहमन्त्रीलाई किन बोलाउनुभयो ? संसदमा गृहमन्त्री हुन अयोग्य भनेर आपत्ति प्रकट गरिरहेका बेला मिनी संसदमा बोलाएर प्रस्ट बोल्न दिने, अन्तर्क्रिया गर्ने, यो के हो भनेर अचम्म मानेको छु । नेताहरूसँग सोध्नुपर्छ,’ विश्वकर्माले शिलापत्रसँग भने । उजुरी परेपछि सो सम्बन्धमा प्रस्ट हुन मन्त्रीको आवश्यकता परेकाले बोलाएको हुन सक्ने विश्वकर्मा बताउँछन् ।

तर, समिति सभापति खतिवडा मन्त्रालयसँग सम्बन्धित समितिको बैठक राख्दा मन्त्री पदेन सदस्य रहने भएकाले सहभागी हुने बताउँछन् । बैठकमा समिति सभापति खतिवडाले गृहसचिव, प्रहरी प्रमुखलाई बोलाइएको र पदेन सदस्यसमेत रहने मन्त्री पनि उपस्थित भएको र बोल्न चाहेपछि समय दिएको बताए । ‘मन्त्रालयसँग समसामयिक विषयमा छलफल भनिएको थियो । सहकारीको विषय थिएन,’ उनले भने ।

समिति सभापति खतिवडाले समितिका पदेन सदस्यले आउँछु भनेपछि बैठक कसरी रोक्ने भनेर प्रश्न गरे । ‘गृह मन्त्रालयको सचिव र प्रहरी प्रमुखलाई मैले बोलाएँ । प्रधानमन्त्रीदेखि गृह, रक्षा र सामान्य प्रशासन मन्त्रीलगायतका पदेन सदस्यलाई चिट्ठी जान्छ । गृहमन्त्रीज्यूले म आउँछु भन्नुभयो । पदेन सदस्यले आउँछु भनेपछि डाकिएको बैठक रोक्न म सक्छु ? उहाँ छिट्टै आएर जान्छु भन्नुभयो, पछि बोल्नुभयो,’ समिति सभापति खतिवडाले शिलापत्रसँग भने, ‘पदेन सदस्य रहनुभएका रक्षामन्त्रीलाई पनि समय दिएँ । नत्र रक्षामन्त्री किन आउने ? उहाँको त विषय नै थिएन ।’

संसदमा भएको कांग्रेसको अडान जस्ताको त्यस्तै रहेको उनले बताए । संसदीय समिति कांग्रेसको मात्र नभएको खतिवडाको भनाइ छ । ‘संसदमा कांग्रेसको स्ट्यान्ड जस्ताको त्यस्तै छ । संसदीय समिति कांग्रेसको होइन, सबैको समिति हो । सबै सदस्यले धारणा राख्न पाउनुपर्छ । पदलाई प्रयोग गरेको कुरा समिति बैठकमा प्रहरी प्रमुखलाई दिएको निर्देशनबाट थाहा हुन्छ । सहकारीको विषयमा नबोल्न भन्दै थिए,’ खतिवडाले भने ।

तयारीका साथ आएका थिए गृहमन्त्री

गृहमन्त्री लामिछानेले दोस्रोपटक मन्त्री भएपछि संसदको रोस्ट्रममा बोल्न पाएका छैनन् । कांग्रेसले अवरोध गरेपछि उनले सार्वजनिक मञ्च खोजेका थिए । लामिछानेले कांग्रेसलाई कहाँ कति बेला हो बहस गर्ने भनेर प्रश्न गर्दै आएका थिए भने कांग्रेसले भनेको स्थानमा बहस गर्न आफू तयार रहेको बताएका थिए ।

मन्त्री लामिछानेले खोजेकै ठाउँ संसदीय समिति पाए । कास्कीका प्रहरी प्रमुख (प्रहरी उपरीक्षक) मोहन थापा पनि संसदीय समितिमा थिए । मन्त्री लामिछानेले थापामार्फत सहकारीको विषयमा प्रस्ट होस् भन्ने चाहन्थे । तर, सभापति खतिवडाले समय दिएनन् ।

प्रहरी महानिरीक्षक वसन्त कुँवरले सहकारी प्रकरणमा गृहमन्त्री लामिछानेको संलग्नताको आधार र प्रमाण नरहेको बताए । उनले गृहमन्त्री लामिछानेको सम्बन्धमा ठाडो उजुरी आएको र अनुसन्धान गर्दा तथ्य प्रमाण नभेटिएको बताए । ‘सहकारीको विषयमा ठाडो उजुरी आयो । अनुसन्धान गर्दा तथ्य प्रमाण भेटिँदैन, रवि लामिछानेमा अहिलेसम्मको तथ्य, प्रमाणमा कुनै पनि आधार देखिँदैन,’ उनले भनेका थिए ।

प्रकाशित मिति: बिहीबार, चैत १५, २०८० १६:५३