'घण्टी कांग्रेस'काे आराेप खेपेका गगन रवि लामिछानेविरुद्ध एकाएक किन गर्जिए ?

A+ A A-

२०७९ सालको संघीय चुनावमा काठमाडाैं क्षेत्र नम्बर ४ मा राष्ट्रिय स्वतन्त्र पार्टी (रास्वपा)का उम्मेदवार थिएनन् । यस क्षेत्रबाट कांग्रेस महामन्त्री गगन थापा फेरि निर्वाचित भए । देशभर रास्वपाको लहर देखिँदा काठमाडाैं ४ मा भने रास्वपाले अरुण श्रेष्ठकाे उम्मेदवारी फिर्ता गराएको थियो ।

काठमाडाैंका १० वटा निर्वाचन क्षेत्रमध्ये चारवटामा रास्वपाका उम्मेदवार निर्वाचित भए । काठमाडाैं, २, ६, ७, ८ मा रास्वपाका सोबिता गौतम, शिशिर खनाल, गणेश पराजुली र विराजभक्त श्रेष्ठ निर्वाचित भए । तर काठमाडाैं ४ मा रास्वपा उम्मेदवार नहुँदा थापा लगायतका कांग्रेस नेताहरूलाई आरोप लाग्यो ‘घण्टी कांग्रेस’ ।

२६ पुस २०७९ मा शिलापत्रसँगको अन्तर्वार्तामा गगनलाई प्रश्न थियो– पार्टीभत्रैबाट तपाईंमाथि आरोप लागेको छ कि, राष्ट्रिय स्वतन्त्र पार्टीका सभापति रवि लामिछानेसँग निकटतामात्र होइन, चुनावी सहकार्यको मुद्दामा । पार्टीभत्रैबाट तपाईंलाई घण्टी कांग्रेस पनि भन्छन् नि ? जवाफमा महामन्त्री थापाले अनौपचारिक कुराको उत्तर किन दिनुपर्‍यो भनेर प्रतिप्रश्न गरेका थिए ।

महामन्त्री थापाले मतदाताको मनोविज्ञान बुझ्न नसकेको बताएका थिए । ‘यो प्रश्नको उत्तर त्यतिबेला दिने हो जतिबेला मैले थाहा पाउनुपर्‍यो कि आरोप कसले लगाएको हो ? सडकमा कसले के भन्छ त्यो कुरामा उत्तर दिँदै हिँड्ने कुरा भएन । अनौपचारिक भनेको कुरामा उत्तर किन दिनुपर्‍यो ?,’ उनले भनेका थिए, ‘काठमाडाैं महानगरको मेयरमा बालेन शाह जितिसकेपछि कांग्रेसका साथीहरूले कसरी मत ल्याएर जित्यो ? पक्कै पनि यहाँ मेरो नाम राखेर सहयोग गरे होलान् भन्थे । एउटा चरण याद गर्नुभयो भने त्यो अफवाह भयो । त्यो बेला भनेको थिएँ हामी समाजमाथिको परिवर्तन बुझिरहेका छैनौँ । मतदाताको मनोविज्ञान बुझिरहेका छैनौँ ।’

२२ माघ २०७९ मा रास्वपा सभापति रवि लामिछानेले तत्कालीन पार्टी मुख्यालय बसुन्धरामा पत्रकार सम्मेलन गरे । नेपाली नागरिकता नै नभएको व्यक्ति सांसद र गृहमन्त्री भएको विषय सर्वोच्च अदालतले नागरिकता प्रक्रिया पूरा गरेर लिनू भनेपछिको समसामयिक विषयमा कुरा राखे । व्यक्तिगत जीवनका बारेमा पनि उनले प्रस्टीकरण दिएका थिए । त्यति बेला उनले भनेका थिए, ‘मैले बहुविवाहको कुराबाट मुक्ति कहिले पाउँदिनँ र गगनले (गगन थापा)ले बाख्राबाट कहिल्यै मुक्ति पाउँदैन । सधैँ आइरहन्छ यो विषय ।’

उनले आफ्नो प्रसंग सान्दर्भिक बनाउन कांग्रेस महामन्त्री थापालाई लाग्ने आरोपको प्रसंग जोडेका हुन् । यी दुवै ५० वर्ष आसपासका छन् । थापा पूर्णकालीन राजनीतिमा विद्यार्थीकालदेखि छन् भने लामिछाने सञ्चारकर्म छाडेर भर्खरै राजनीतिमा होमिएका हुन् । आसलाग्दा अनुहारका नेताहरूमाथि लाग्ने आरोपको भाष्य पुष्टि गर्न लामिछानेले थापाको प्रसंग जोडेका थिए ।

अहिले राजनीतिक वातावरण फेरिएसँगै लामिछाने र थापाको सार्वजनिक टिप्पणी फेरिएको छ । तनहुँ १ को उपचुनाव अघिसम्म रास्वपा र कांग्रेस महामन्त्री थापाको सार्वजनिक टिप्पणी बाझिने खालको सुनिएकाे थिएन । कांग्रेसबाट रास्वपा छिरेका स्वर्णिम वाग्लेले तनहुँमा चुनाव जिते । जसमा कांग्रेसबाट चुनावी कमान्डर थिए थापा । त्यसपछि रास्वपा र थापाबिचमा सम्बन्ध पातलिँदै गएको बताइन्छ ।

रवि लामिछानेको राजनीतिमा प्रवेश गर्नुअघि गगन थापासँग राम्रो सम्बन्ध थियो । लामिछाने राजनीतिमा प्रवेश गरेपछि भने सम्बन्ध पनि व्यक्तिगत नभएर राजनीतिक बन्न पुग्यो । हुन त कुनै समय सञ्चारमाध्यममा थापाले पनि काम गरेका थिए । उनीहरू तत्कालीन केएटिएच एफ एम (हाल इमेज)मा फरक सिफ्टमा काम गर्थे । साँढे दुई वर्ष एकै ठाउँमा काम गरेका उनीहरूको सम्बन्धमा खटपट नभएको उनी निकट व्यक्तिहरू बताउँछन् ।

अहिले उपप्रधान तथा गृहमन्त्री भएपछि लामिछानेको आलोचना थापाबाट हुँदै आएको छ । कास्कीको सूर्यदर्शन सहकारीबाट कर्जा लिएर रकम अपचलन गरेको आरोप लामिछानेमाथि छ । यो प्रकरणले थापा र लामिछानेलाई सार्वजनिक रूपमा अभिव्यक्तिको भिडन्तमा उतारेको छ । नक्कली खाता खोलेर सहकारी पीडितको रकम हिनामिना गर्नेलाई कानुनबमोजिम छानबिन हुनुपर्ने थापाले बोल्दै आएका छन् ।

थापाले लामिछाने सहकारी प्रकरणमा जोडिएको विषय गम्भीर ठगी भएको बताउँदै आएका छन् । ५ चैतको प्रतिनिधिसभामा थापाले नक्कली खाता खोलेर लामिछानेले एक करोड लिएको बताएका थिए । ‘सय जनाले नक्कली खाता खोलेर १ अर्ब ३५ करोड अपचलन गरेको रिपोर्ट छानबिन प्रतिवेदनको ७८ औँ पृष्ठमा उल्लेख छ । यसरी नक्कली खाता खोल्नेमध्ये एक नाम हो, रवि लामिछाने । माननीय रवि लामिछाने गृहमन्त्री हुनुहुन्छ । भोलि प्रधानमन्त्री बन्नुहोला, यो अलग विषय हो, शुभकामना छ,’ उनले भनेका थिए, ‘तर रवि लामिछाने सहकारीको सदस्य हुनुहुन्न । एक करोड लिनुभएको छ । हाम्रो कानुनको दफा ५० ले यो गैर कानुनी छ भन्छ ।’

थापाले लामिछानेको प्रस्टीकरण बारेमा पनि टिप्पणी गरे । ‘रविको स्पष्टीकरण सुनेँ । लगिएको छैन भनिएको छ । एक सुक्का पनि लिन पाइँदैन । सुप्रिमबाट एक करोड लगिएको छ । एक करोड लगिएको तमसुक कम्पनी रजिष्ट्रारको कार्यालयमा छ । प्रमाणको रूपमा आएको तमसुक गैरकानुनी छ,’ थापाले थपे, ‘यसरी करोड हो भइहाल्यो, ठूलो मान्छे हो, यसलाई छाड्दिऊँ भन्ने हो भने करोड होइन, अर्ब होइन, खर्ब रुपैयाँ छोड्नुपर्छ । सय जना मानिसकै रिपोर्ट पढेँ । यदि यस्तै मान्ने हो भने सय जना मानिसले एक अर्ब लगेको प्रकृति ठ्याक्कै यही हो ।’

त्यसलाई काउन्टर दिँदै लामिछानेले थापाको निर्वाचन क्षेत्रमा बहस गर्न चुनौती दिएका छन् । उनले सो बहस प्रत्यक्ष प्रसारण गर्न माग गरेका छन् । थापाको नाम नलिई निर्वाचन क्षेत्र तोकेर उनले बहस गर्न कहिले आऊँ भनेर सोधेका छन् ।

‘तपाईंहरूले भनेको दिन,स्थान र समयमा तपाईंहरू र म सार्वजनिक बहस गरौँ । त्यो बहस काठमाडाैं–४ मा भए राम्रो । म एक्लै आउँछु, तपाईं आफ्ना विज्ञ, पार्टीका सम्पूर्ण प्रभावशाली नेता र तपाईंले ममाथि लगाएका सारा आरोप पुष्टि गर्ने सम्पूर्ण प्रमाण बोकेर आउनुहोला । यो बहस लाइभ गरौँ ताकि सिङ्गाे देशले हेरोस्,’ लामिछानेले भनेका छन् ।

उनले बहसमा सहकारी ठग प्रमाणित गर्न चुनौती दिएका छन् । ‘तपाईं मलाई यत्ति मात्र भन्नुस्, म कहिले कहाँ तपाईंका आरोपहरूको जवाफ दिन आउँ ? हैन भने, छोडिदिनुस् यो बाल हठ,’ उनले भनेका छन् ।

मंगलबार लामिछानेको नाम नलिएर थापाले राजनीतिमा भगवान्हरू रहेको भन्दै व्यङ्ग्य कसेका छन् । ‘नेपालको लोकतान्त्रिक आन्दोलन र नवीन्द्रराज जोशी’ विषयक अन्तर्क्रिया कार्यक्रममा सांसदसमेत रहेका कांग्रेस महामन्त्री थापाले आजभोलि राजनीति गर्ने ठाउँमा भगवान्‌हरू रहेका बताएका हुन् ।

उनले राजनीतिमा छट्टुहरू हाबी हुन थालेको बताए । ‘राजनीतिमा छट्टुहरू हाबी हुन थाले । छट्टुहरू त आउँछ, लटरपटर पार्छ । झुक्याउँछ । यसो रङरोगन गर्छ, जान्छ । हामीलाई छट्टुहरू चाहिएको होइन, धैर्यता भएको, गति भएको मान्छे पनि चाहियो । गति र मति दुवै भएको मान्छे चाहियो । हामीले आफ्नो घरभित्रको फोहोर पनि ठीक गर्नुपर्नेछ । हाम्रो घरभित्र फोहोर छ, सफा गर्नुपर्नेछ । हाम्रो कतिपय ठाउँमा मति बिग्रेको छ । त्यसलाई ठीक गर्नैपर्छ,’ उनले भने ।

लामिछानेसँगको सम्बन्धको बारेमा भने थप टिप्पणी गर्न थापाले चाहेनन् । ‘अहिले मेरो टिप्पणी केही छैन,’ थापाले शिलापत्रसँग भने । उता रास्वापाका सांसदहरू पनि एकले अर्कालाई गाली गर्नुभन्दा पनि विधायिकाको भूमिका निर्वाह गर्नुपर्ने बताउँछन् । ‘जिम्मेवार नेताहरू एकले अर्कालाई गाली गरेर बस्नु राम्रो होइन । गाली गरेर खुट्टा तान्नेभन्दा पनि विधायिकाको जिम्मेवारी पूरा गर्न र जनताको काममा ध्यान केन्द्रित गर्दा राम्रो हुन्छ,’ रास्वपा सचेतक निशा डाँगीले शिलापत्रसँग भनिन् ।

प्रकाशित मिति: मंगलबार, चैत १३, २०८० २०:०२