मस्कोमा १३७ जनाको हत्या गर्ने चार जना को हुन् ?

A+ A A-

गत शुक्रबार रुसको राजधानी मस्कोस्थित एक कन्सर्ट हलमा भएको आतंकवादी आक्रमणमा संलग्न भएको आरोपमा चार जना पक्राउ परेका छन् । उनीहरूलाई जहाँ आक्रमण भएको थियो त्यहाँबाट ४ सय किलोमिटर टाढा ब्रायंस्कबाट पक्राउ गरिएको रोयटर्सले जनाएको छ ।

पक्राउ परेका चारै जनालाई रुसको एक अदालतमा उपस्थित गराइएको छ । पक्राउ पर्ने चार जना डलेद्जोन मिरजोयेभ, सैदाक्रामी मुरोडाली राखबलिजोदा, शमसिदिन फरीदूनी र मुहम्मद फैजोव भएको बीबीसीले जनाएको छ । समाचार अनुसार अदालतमा पेस गरिँदा यी चार जनामध्ये एक जनालाई ह्वीलचियरमा लगिएको थियो । अरु तीन जनामाथि पनि सोधपुछका क्रममा निकै कुटपिट भएको अनुमान गरिएको छ । उनीहरूको अनुहारमा चोट लागेको स्पस्टै देखिएको थियो ।

शुक्रबार एक रक कन्सर्टमा ६ हजार मानिस जम्मा भएको स्थानमा यी चार जनाले मेसिन गनबाट अन्धाधुन्ध फायरिङ गरेका थिए । र पछि हलमा आगो लगाइदिएका थिए । जसमा १३७ जनाको मृत्यु भएको थियो भने १०० जना घाइते भएको रुसी अधिकारीहरूले जनाएका छन् । रुसले यो आक्रमणमा युक्रेनको संलग्नता रहेको दाबी गर्दै आएको छ । तर, युक्रेनले भने त्यसको खण्डन गरेको छ । रुसी अधिकारीहरूले किर्गिस्तानका यी चार जनालाई सीमा पार गराउन युक्रेनले भूमिका खेलेको दाबी गरेका छन् ।

उता अमेरिकाले भने केही दिन अगाडि नै रुसमा यस प्रकारको आक्रमण हुन सक्ने चेतावनी दिइएको बताएको छ । तर, रुसले अमेरिकाको सो चेतावनीलाई चुनावमा प्रभाव पार्ने षड्यन्त्रका रूपमा लिएको जनाइएको छ ।

अमेरिकाले यो आक्रमणमा युक्रेनको कुनै हात नरहेको बताउँदै आएको छ । त्यसो त यो आक्रमणको जिम्मेवारी स्लामिक स्टेट (आईएसआईएस) ले लिएको छ । आईएसआईएसले यसअघि पनि रुसमा र रुस बाहिर रुसी हितलाई लक्षित गरी आक्रमण गरेको छ ।