लिम्बू भाषाका गीत गाएर लोकप्रियताको शिखर चुम्न सफल गायक ब्रबिम शेर्मा (भिडियो)

लिम्बू भाषाका गीत गाएर लोकप्रियताको शिखर चुम्न सफल गायक ब्रबिम शेर्मा (भिडियो)

A+ A A-

२०४१ सालमा पूर्वी नेपालको पाँचथर माङजाबुङमा जन्मिएका ब्रबिम शेर्माको बाल्यकाल लिम्बू समुदायमै बित्यो । तत्कालीन समयमा लिम्बू समुदायका अधिकांश मानिस नेपाली भाषा न बोल्थे, न त राम्री बुझ्थे नै ।

आजभन्दा चार दशकअघि माङजाबुङ गाउँ भाषाकै कारण अन्य समुदायबाट एक्लिएको थियो । त्यति मात्र होइन, तत्कालीन राज्यव्यवस्थाबाट समेत हेपिएको थियो ।

ब्रबिमका बुबा नरबहादुर शेर्मा त्यसबेला गाउँको उपप्रधानपञ्च थिए । त्यसैले पनि उनलाई अक्षरको ज्ञानको ताकतबारे अनुमान हुनै नै भयो । त्यही भएर हुनुपर्छ, पूर्वी नेपालको अत्यन्तै दुर्गम गाउँका उनमा सन्तानलाई शिक्षित बनाउनुपर्छ भन्ने सोच आएको । ब्रबिमले बाल्यावस्थामै अक्षर चिन्न पाए । विद्यालयमै हो उनले गाउँभन्दा बाहिरका साथीहरूसँग पहिलोपल्ट भेटेको, कुरा गरेको ।

स्कुलमा निरौला, खतिवडा, खड्कालगायत बाहुन र क्षेत्री समुदायका साथीहरूको संगतले नेपाल बुझ्न र बोल्न उनलाई धेरै समय लागेन । त्यो बेला गाउँका एकाध घरमा मात्र रेडियो हुन्थ्यो । ब्रबिमका बुबाले पनि रेडियो किनेर घरमा ल्याएका थिए । घरमा हुँदा ब्रबिम रेडियोमा बज्ने स्व. नारायण गोपाल, स्व. भक्तराज आचार्यका गीत सुनेर खुबै रमाउँथे । नारायण गोपालका 'अल्झेछ क्यारे पछ्यौरी, ए कान्छा ठट्टैकासँगै'लगायतका गीत सुन्दा उनी निकै प्रभावित हुन्थे । उनीहरूका गीत गुनगुनाउँथे । ५/६ कक्षामा पुग्दानपुग्दै उनलाई गीतसंगीतले बलियोसँग मोहित बनायो ।

२०५४ सालतिरको कुरा हो । एफएमहरूको सुरुवात भरखर भएको थियो । स्कुल बिदा हुने भएकाले प्रत्येक शनिबार ब्रबिम गाईवस्तु चराउन जंगल जान्थे । जंगलको ठूलो रुखमा रेडियो झुन्ड्याउँथे र एन्टिना तन्काएर एफएम घन्काउँथे । अनि दिनभर एफएम बज्ने गीत सुन्थे ।

‘त्यो समयको घटना मेरो जीवनको स्वर्णिम समय थियो, जुन समय आजसम्म पनि मेरो मन र मस्तिष्कमा छाप बनेर बसेको छ,’ ब्रबिम सझिन्छन् ।

त्यतिबेला भरखरै उदाएका गायक स्वरूपराज, रामकृष्ण ढकाल, राजेशपायल राई तथा यम बराललगायतका गीत सुन्दा आफैँ पनि गाउन प्रेरित हुन्थे । अनि आफू पनि त्यस्तै गायक बन्ने सपना देख्थे । साथीभाइलाई गीत गाएर सुनाउँथे । साथीहरूले उनको गीत सुनेर प्रशंसा गर्दा उत्साहित हुन्थे ।

०००

त्यसबेला माङजाबुङ र वरिपरिका अन्य लिम्बू समुदायमा भगत सुब्बा (लाजेसा याक्थुम्बा) का लिम्बू गीतले बलियो प्रभाव जमाएको थियो । भगतका गीतमा सिङ्गो लिम्बू समुदाय निकै प्रभावित थियो । त्यही प्रभाव ब्रबिममा पनि पर्न गयो ।

जतिबेला आदिवासी जनजाति आन्दोलनको जग बस्दै थियो । किराँत धर्मावलम्बीहरूको ‘यतलाधुङ सेमिसेवा’ पञ्च हवन होस् वा अन्य धार्मिक अनुष्ठान, सबै कार्यमा भगतकै लिम्बू गीत गुञ्जिन्थे । उनै गायक भगतबाट निकै प्रभावित बनेका ब्रबिमले त्यसैबेला हो उनीजस्तै चर्चित र लोकप्रिय लिम्बू गायक बन्ने सपना बुनेको ।

उसो त ब्रबिमका बुबाआमाले उनलाई इन्जिनियर बनाउन चाहन्थे । तर, उनले संगीतको लय यसरी समाते, जसले उनलाई अन्य क्षेत्रबारे सोच्नै दिएन । २०५८ सालमा धरानको चिनियाँ चोकमा झरेर ओमप्रकाश राईसँग शास्त्रीय संगीत सिक्न थाले । त्यसको एक वर्षपश्चात् इलामको माङसेबुङमा आयोजित ‘किराँत धर्म सांस्कृतिक मञ्च’मा दिएको प्रस्तुतिले उनलाई लिम्बू समुदायमाझ राम्ररी चिनायो । त्यहीँबाटै आफ्नो सांगीतिक करिअर सुरु भएको उनले सुनाए ।

२०६० सालमा ब्रबिमले आफ्नो पहिलो गीतिसंग्रह ‘चेसुङ’ सार्वजनिक गरे । ‘चेसुङ’ का ‘पान्थरे लुङासे’, ‘छ थरे लुङासे’ जस्ता गीतलाई स्रोताले रुचाए । बिस्तारै तेह्रथुम, पाँचथरका एफएमहरूमा पनि उनका गीत गुञ्जिन थाले । यसरी नै लिम्बू गीत गायकका रूपमा ब्रबिम स्थापित हुँदै गए । ‘चेसुङ’ ल्याएको दुई वर्षपश्चात् ‘इङ्घङ’ गीतिसंग्रह ल्याएपछि उनको झनै चर्चा चुलियो । त्यसपछिका प्रत्येक दुई वर्षमा नयाँ गीतिसंग्रह ल्याउने योजनाका साथ उनी अगाडि बढे ।

उनले २०६४ सालमा ल्याएको ‘मुन्धुम’ले त उनलाई मुन्धुम गायककै परिचय दियो । त्यति मात्र नभएर २०७६ सालको 'सेवारो नमस्ते'सम्म आइपुग्दा ब्रबिम ‘लिम्बू गीत’ लाई पनि व्यावसायिक बनाउन सकिन्छ भनेर गतिलो उदाहरण बन्न सफल बने । हालसम्म तीन दर्जनभन्दा बढी नेपाली, १ सयभन्दा बढी लिम्बू गीत रेकर्ड गराइसकेका उनले ५० भन्दा बढी लिम्बू गीतलाई संगीतबद्ध गरिसकेका छन् ।

लिम्बू समुदायको निमन्त्रणामा कोरिया, कतार, मलेसिया, बेलायत, इजरायल, सिङ्गापुर, हङकङलगायत थुप्रै मुलुकमा सांगीतिक प्रस्तुति दिइसकेका ब्रबिमका गीतबाट हिजोआज लिम्बूबाहेकका समुदाय पनि आकर्षित देखिन्छन् ।

किराँत लिम्बू भाषाका गीतहरू गाएर लोकप्रियताको शिखर चुम्न सफल गायक ब्रबिम शेर्मा समग्रमा माङसेबुङले जन्माएको ख्यातिप्राप्त संगीतकार तथा गायकका रूपमा स्थापित नाम बनेको छ ।