मुख्यमन्त्री केजरीवाललाई पक्राउ गरिएपछि के छ विपक्षीको रणनीति ?

A+ A A-

आगमी अप्रिल–मेमा हुने आमचुनावअघि विपक्षी गठबन्धनका एक प्रमुख नेता दिल्लीका मुख्यमन्त्री अरविन्द केजरीवाल पक्राउ परेपछि अब विपक्षीले कसरी चुनावी रणनीति बनाउँछ भन्ने चासोको विषय बनेको छ ।

विपक्षीलाई कमजोर बनाएर प्रधानमन्त्री नरेन्द्र मोदी लगातार तेस्रो कार्यकालमा जितका लागि चुनावी मैदानमा उत्रिएको भारतका विपक्षीहरूले आरोप लगाउने गरेका छन् । हुन पनि चुनाव हुनुभन्दा एक, दुई महिना पहिला दुई दुई जना मुख्यमन्त्री पक्राउ परेका छन् भने सबैभन्दा ठूलो विपक्षी पार्टी अल इन्डिया कांग्रेसको बैंक खाता रोक्का गरिएको छ । यसले आफूलाई सबैभन्दा ठूलो लोकतन्त्र मान्ने भारतको साखमा प्रश्न उठेको छ ।

भारतीय निर्वाचन आयोगका पूर्व प्रमुख आयुक्त एसवाई कुरेशीले बैंक खाता रोक्काको विषयमा निर्वाचन आयोग बोल्नुपर्ने बताउँछन् । बीबीसी हिन्दीसँगको कुराकानीमा उनले चुनावअघि यसरी बैंक खाता बन्द हुनुले चुनावमा सबै दललाई समान अवसर उपयोग गर्ने मौकाबाट वञ्चित गरिनु रहेको बताए । उनले यो विषयमा निर्वाचन आयोगले निर्देशन दिनसक्ने बताए ।

विपक्षी दलहरू एकपछि अर्को गर्दै केन्द्रीय जाँच एजेन्सीको निशानामा परेपछि उनीहरूले निर्वाचन आयोग गुहारेका छन् । तर, आइतबारसम्म निर्वाचन आयोगले कुनै धारणा सार्वजनिक गरेको छैन । दिल्लीका मुख्यमन्त्री तथा आम आद्मी पार्टीका अध्यइा केजरीवाल पक्राउ परेको भोलिपल्ट उनीहरू निर्वाचन आयोग पुगेका थिए । केजरीवाल पक्राउ पर्नुअघि झारखण्डका निर्वतमान मुख्यमन्त्री तथा झारखण्ड मुक्ति मोर्चाका नेता हेमन्त सोरेन पक्राउ परेका थिए । आफू पक्राउ पर्ने निश्चित भएपछि उनले मुख्यमन्त्रीबाट राजीनामा दिएका थिए । र राजीनामा दिएकै दिन पक्राउ परेका थिए ।

यसरी विपक्षीहरूमाथि केन्द्र सरकार र भाजपा आक्रामक बनेपछि विपक्षी गठबन्धनले दिल्लीमा सभा गर्ने तयारी गरेको छ । भारतीय समाचार एजेन्सी पीटीआईका अनुसार विपक्षी गठबन्धनले आगामी आइतबार ३१ मार्चमा विरोधसभा गर्ने तयारी गरेको छ । गठबन्धनका नेताहरूले आइतबार विरोधसभाबारे जानकारी दिएका छन् । केजरीवाल पक्राउको विरोधमा यो सभा हुन लागेको हो ।

यसैबीच मुख्यमन्त्री केजरीवालले ईडीको हिरासतबाटै मुख्यमन्त्रीका हैसियतमा आदेश जारी गरेको विषयले भारतीय राजनीति गर्माएको छ । आम आद्मीकी नेतृ आतिशीले एक पत्र सार्वजनिक गर्दै थुनामा रहेर पनि मुख्यमन्त्रीले जनताको बारेमा चिन्ता व्यक्त गरेको बताएकी थिइन् । तर, यो विषयमा भाजपाले आपत्ति जनाएको छ । हिरासतबाट कसरी मुख्यमन्त्रीले आदेश जारी गरे भन्दै सो पत्र नै जाली रहेको बताएको छ । भाजपाले हिरासतमा मुख्यमन्त्री कार्यालय नरहेको भन्दै आपत्तिसमेत जनाएको छ । मुख्यमन्त्री कार्यालयबाट हुनुपर्ने काम कसरी हिरासतबाट भयो भन्दै यसको पनि जाँच हुनुपर्ने बताएको छ ।

उता केजरीवाल पक्राउ परेपछि आम आद्मीको आइतबार बैठक बसेको छ । बैठकमा कार्यकर्ताहरूलाई उच्च मनोबलका साथ चुनावको तयारीमा लाग्न निर्देशन दिइएको भारतीय सञ्चार माध्यमहरूले जनाएका छन् । आम आद्मी पार्टीका महामन्त्री सन्दीप पाठकले भारतीय सञ्चार माध्यमसँग कुरा गर्दै केजरीवाललाई पक्राउ गरेर प्रधानमन्त्री नरेन्द्र मोदीले आफ्नै खुट्टामा बञ्चरो प्रहार गरेको टिप्पणी गरेका छन् । उनले केजरीवाल पक्राउ परेर झन बलियो बनेको बताएका छन् । उनले भनेका छन्, ‘मुख्यमन्त्री थुनामा रहे पनि बाहिर प्रचार मोदीले गरिरहनुभएको छ । मोदीले हाम्रो काम झन सजिलो बनाउनुभयो ।’

प्रकाशित मिति: आइतबार, चैत ११, २०८० २०:२०