३० वर्षदेखि रौतहटमा 'आलम त्रास'

A+ A A-

१२ वर्षअगाडि बम विस्फोटनमा घाइते भएका २२ जनालाई इँटाभट्टामा जलाएर मारेको अभियोगमा पूर्वमन्त्री मोहम्मद अफताव आलम अहिले प्रहरी हिरासतमा छन् ।

आलम रौतहट २ का सांसदसमेत हुन् । आलम २०५४ सालमै सहायक मन्त्री भएका थिए । २०५७ सालमा गिरिजाप्रसाद कोइरालाको नेतृत्वमा बनेको सरकारमा आलम वनमन्त्री थिए ।

२०५८ सालमा शेरबहादुर देउवा नेतृत्वको सरकारमा आलम भूमिसुधार मन्त्री थिए । त्यसपछि २०६६ सालमा माधवकुमार नेपाल नेतृत्वको सरकारमा आलम श्रममन्त्री थिए ।

बारम्बार मन्त्री पद पाएका आलम रौतहटमा ‘मन्त्रीजी’ का नामले परिचित छन् । आलमका हजुरबुबा (बाजे) शेख इद्रिसको साथ लागेर आलम राजनीतिमा आएका हुन् । २७ चैत २०६४ बम विस्फोट आलमका बाजे इद्रिसकै गोठमा भएको हो ।

इद्रिसलाई गत वर्ष गणतन्त्र दिवसका दिन मरणोपरान्त ‘महाउज्ज्वल राष्ट्रदीप’ले सम्मानित पनि गरिएको थियो ।

रौतहट टाइगर !

काकाको बिँडो थाम्दै राजनीतिमा उदाएका आलमलाई रौतहटमा ‘टाइगर’ नामले पनि चिनिन्छ । चार पटक सांसद भएका, राजनीतिक शक्ति र आर्थिक प्रलोभनले सबैलाई आफ्नो नियन्त्रणमा राख्न सक्ने आलम पक्राउ परेपछि रौतहटमा नयाँ त्रास सिर्जना भएको छ ।

राजापुरमा प्रवेश निषेध

आलमको विषयमा रौतहटमा धेरै मान्छे कुरा गर्न चाहँदैनन् । जति जना कुरा गर्छन् उनीहरूको एउटै बोली हुन्छ, ‘मन्त्रीजीलाई फसाइएको हो ।’ आलमलाई फसाएको दाबी गर्नेहरू बताउन सक्दैनन् कसले र किन फसायो भनेर । आलमका समर्थक आलम पक्राउ हुनुलाई ‘षडयन्त्र’ भन्छन् ।

आलमको गाउँ राजपुर नगरपालिकामा त नयाँ मान्छेलाई प्रवेश निषेध नै छ । प्रहरीसमेत आलमको गाउँमा छिर्न डराउँछ । २०६५ मा मानवअधिकारकर्मीको टोली घटनास्थल अवलोकन गर्न जाँदा अधिकारकर्मीमाथि राजपुरवासीले हातपात नै गरेका थिए ।

आलमको गाउँमा छिर्न नसकेकै कारण प्रहरीले आलमलाई चन्द्रपुर–गौर सडकखण्डमा पर्ने इद्रिस गेटबाट पक्राउ गरेको थियो ।

भारतीय सीमाबाट ८ किलोमिटर उत्तरमा रहेको राजपुर नगरपालिकाका प्रमुख प्रशासकीय अधिकृतलाई गत जेठमा कुटपिटसमेत गरिएको थियो । आलम पक्राउ परेपछि आलमका कार्यकर्ता आन्दोलित भएका छन् । उनीहरूले रौतहटका विभिन्न स्थानमा आन्दोलन गरिसकेका छन् ।

रौतहटमा भेटिएका एक अनुसन्धान अधिकारीका अनुसार ‘छठ’सम्म आलम प्रकरणको टुंगो नलागे रौतहटमा आन्दोलन चर्किन सक्छ ।

तरुण दलले जन्मायो

नेपाली कांग्रेस रौतहटका सभापति रहिसकेका आलम कांग्रेसको भ्रातृ संगठन तरुण दल हुँदै राजनीतिमा उदाएका हुन् । नेपाली कांग्रेसका सभापति शेरबहादुर देउवाले आलमलाई राजनीतिक प्रतिसोध साँध्न फसाइएको भाषण गरेपछि आलमका समर्थक झन् उत्तेजित छन् ।

नेपाली कांग्रेस रौतहटका सभापति कृष्ण यादवले पनि रौतहटमा आलमको पक्षमा उत्तेजनापूर्ण अभिव्यक्ति दिइरहेका छन् । तरुण दल रौतहटका अध्यक्ष मोहम्मद नौसाद आलम त झन् स्थानीय पत्रकार र कार्यकर्तालाई फोन÷म्यासेज गरेर ‘अब एकजुट होनेका बख्त आगया है’ भन्दै हिँडिरहेका छन् ।

हिरासत बाहिर भेट्नेको लस्कर

हिरासतमा आलमलाई भेट्न आलमका समर्थक जिल्ला प्रहरी कार्यालय रौतहटबाहिर लाइन लागेर उभिएका हुन्छन् ।

पीडित परिवार श्रीनारयाण र समसुल मियाँको घरमा प्रहरीले निरन्तर पहरा दिइरहेको छ । पीडित परिवार पनि डराएका छन् । पीडितका परिवारलाई आलम रिहा भएमा आफूलाई पनि मार्छ भन्ने डर छ । पत्रकारलाई आलमका कार्यकता र गाउँलेले राजपुर छिर्न दिएका छैनन् ।

पत्रकार पनि त्रासमा

स्थानीय पत्रकार समाचार लेख्न पनि डराइरहेका छन् । भोलि आलम रिहा भएमा समाचार लेखेकै कारण आफूमाथि प्रहार होला भनेर पत्रकार डराएका हुन् । आलमको विषयमा बोलेमा आलमका मान्छेले मार्छन् भन्दै रौतहटवासी आलमका बारेमा बोल्नै चाहँदैनन् ।

स्थानीय भन्छन्ः हरेक निर्वाचनमा आलमले मान्छे मारे

२७ चैत २०६४ को घटनापछि रौतहटमा आलमको आतंक झन् बढेर गयो । शिलापत्रसँगको कुराकानीमा एक स्थानीयवासीले आलमले हरेक निर्वाचनमा बुथ क्याप्चर गर्न र मतदाता त्रसित बनाउन मान्छे मार्ने गरेको दाबी गरेका छन् ।

स्थानीयवासीका अनुसार निर्वाचनको समयमा उनको क्षेत्रमा निर्वाचनमा कर्मचारी नै जाँदैनन् । आलमको गाउँ राजपुरमै रहेको स्कुललाई मतदान केन्द्र तोकिन्छ ।

‘आलमका मान्छेले आलमलाई ‘एकछापे मत’ हाल्छन् । अनि मतपेटिका प्याक गरेर बुझाउँछन्,’ स्थानीयवासीको दाबी छ ।

मुस्ताक आलम मृत्यु पनि रहस्यमय

आलमको विपक्षमा २०७० सालमा निर्वाचन लडेका राजाबाबु भनिने मुस्ताक आलमको मृत्यु अहिले पनि रहस्यमयी नै मानिन्छ ।

कतिपयले उनको मृत्यु हृदयाघातले भएको पनि बताउने गर्छन् । यिनै राजाबाबुको इँटाभट्टाको आगोमा २७ चैत २०६४ को राति २२ जनालाई हालिएको थियो ।

आफ्नो क्षेत्रमा ‘हुकुमी’ शासन चलाउने आलमले संविधान निर्माणमा योगदान पुर्याएको भन्दै संविधानसभा पदक पनि पाए ।

संविधानसभा निर्वाचनको अघिल्लो दिन नै उनको नेतृत्वमा बम विस्फोट भएको थियो । विस्फोटनमा घाइते भएका र मृतकलाई उनले इँटाभट्टाको आगोमा हालेर मारेको अभियोग छ ।

आलमले रौतहटको एक अनलाइन समाचार संस्थालाई गतवर्ष दिएको अन्तर्वार्ताअनुसार कृष्णप्रसाद भट्टराई नेपाली कांग्रेसको सभापति हुँदा उनले कार्यवाहक सभापतिको पदसमेत पाएका थिए ।

पीडितलार्ई आथिृक प्रलोभन

करिब ३० वर्षदेखि राजनीतिमा सक्रिय आलमले विस्फोटनमा मारिएका त्रिलोक प्रताप सिं र मोहम्मद रोसी अख्तरका परिवारलाई आर्थिक लोभ पनि देखाएका थिए । मृतक परिवारका सदस्यलाई भेटेर उनले ‘जे भयो भइहाल्यो, अब कुरा मिलाउनुपर्छ’ भन्दै आर्थिक प्रलोभन देखाएका थिए ।

आर्थिक प्रलोभन दिँदा नमानेपछि आलमका मान्छेले ओसी अख्तरकी आमा रोक्सना खातुनको पनि हत्या गरे । खातुनको हत्यापछि विस्फोटनको घटनाका जानकार पनि बोल्न सकेनन् ।

प्रहरी स्रोतका अनुसार विस्फोटनमा आलमकै गाउँका मान्छे पनि परेका छन् । आलमको गाउँ राजपुर फरदहवाका मान्छेको पनि मृत्यु भएको छ । तर, उनीहरूमध्ये कतिपय आलमको डरले बोल्न सक्दैनन् ।

कतिपयलाई आलमले पैसा दिएर नबोल्न भनेका छन् । विस्फोटनमा भारतीय नागरिक पनि परेको बताइन्छ । तर, भारत बिहारका सांसदसँग पनि आलमको विशेष सम्बन्ध छ । यही सम्बन्ध प्रयोग गरेर उनले भारतीय नागरिकको पनि बोली बन्द गरेको बताउँछन् एक स्थानीय ।

स्थानीयको यो भनाइ पुष्टि गर्ने केही आधार पनि छन् : गत शुक्रबार (३० असोज) साँझ रौतहट प्रहरी कार्यालयमा आलमलाई भेट्न भारत बिहारका एक विधायक आएका थिए । आलमलाई भेट्न, जनता दल युनाइटेडका विधायक मोहम्मद सर्फुद्दीनले भेटेका थिए ।

भारतीय विधायक सर्फुद्दीन आलमका सम्धी हुन् । आलमको छोरा डा. फिर्दोश आलमसँग सर्फुद्दीनकी छोरीको बिहे भएको छ ।

गुणगानका भोका आलम

आलमका छोरा फिर्दोश चिकित्सक हुन् । उनी प्रहरीका डाक्टर हुन् । २०७३ सालमा प्रहरी निरीक्षकमा नियुक्त भएका फिर्दोशले प्रहरीसँग गरेको कुराकानी उद्धृत गर्दै प्रहरी स्रोत भन्छ, ‘आलम आफ्नो गुणगान मात्र सुन्न सक्छन् । आफ्नो विरोधमा वा नराम्रो कुरा गरेमा उनी आक्रोशित भइहाल्छन् ।’

रौतटहमा आलम प्रक्राउको विषयलाई ‘मधेश–पहाड’को इस्यू पनि बनाइएको छ । प्रधानमन्त्री केपी शर्मा ओलीप्रति मधेश त्यसै पनि रूष्ट छ । विपक्षी दलका नेता, त्यसमाथि मधेशको प्रतिनिधित्व गर्ने आलमलाई पक्राउ गरेपछि कतिपय युवाले यसलाई ओलीले मधेससँग निहुँ खोजेको रूपमा पनि अर्थ्याएका छन् ।

प्रहरी स्रोतका अनुसार घटनामा घाइते भएका भागेर ज्यान जोगाएका एक जना मान्छे भेटिएका छन् । उनीसँग प्रहरीले बयान पनि लिइसकेको छ । प्रहरीको सम्पर्कमा आएका विस्फोटनका घाइते तथा प्रत्यक्षदर्शी आलमका विश्वासपात्र नै हुन् । घाइते भएपछि आलमले नै उपाचारमा सहयोग गरेका थिए ।

उनको बयानले घटना भएको पुष्टि गर्छ । ती प्रत्यक्षदर्शीले पनि घटनामा कति मान्छे मरे, कति घाइते भए र कतिलाई इटाँभट्टामा हालेर मारियो भन्न सकेका छैनन् ।

एक अनुसन्धान अधिकारीका अनुसार आलम आफ्ना विरोधीप्रति सधैं हिंसात्मक रवैया अपनाउँथे । आफ्नै गाउँमा पनि उनले आफ्ना विरोधीलाई अहिले नजरबन्दजस्तो अवस्थामा राखेका छन् ।

कतिपय स्थानीयवासीका अनुसार विस्फोटनमा मारिएका ओसी र त्रिलोक तत्कालीन माओवादी पार्टीमा आवद्ध थिए । तर, उनीहरू आलमको निर्वाचन क्षेत्रका भने होइनन् । त्रिलोक र ओसीको घर रौतहट क्षेत्र नं १ मा पर्छ भने आलम क्षेत्र नं २ का हुन् ।