ब्रेक्जिटको समय थप्न बेलायती प्रधानमन्त्रीको हस्ताक्षरविहीन पत्र

A+ A A-

निर्धारित मिति ३१ अक्टोबरमा ईयूबाट अलग हुन नसक्ने भएपछि बेलायती प्रधानमन्त्री बोरिस जोनसनले सम्झौताका लागि समय थप गर्न माग गर्दै ईयूलाई पत्र लेखेका छन् ।

मिति थप गर्न माग गरिएको सो पत्रमा उनले हस्ताक्षर भने गरेका छैनन् । कानुनी रूपमा बाध्य भएर पहिलो पत्र पठाएका जोनसनले लगत्तै हस्ताक्षर गरेको अर्को पत्र पठाएर समय थप गर्नु गल्ती हुने उल्लेख गरेका छन् ।

संसद्‍मा आफूले गरेको सहमतिविनाको अर्थात नो डिल ब्रेक्जिटको सम्भावना बारेको प्रस्ताव पारित नभएपछि ३१ अक्टोवरको समयसीमा थप्न आग्रह गर्न जोनसन बाध्य भएकाम हुन् ।

युरोपेली परिषदका अध्यक्ष डोनाल्ड टस्कले बेक्जिट सम्झौता बिलम्ब गर्न अनुरोधसहितको पत्र प्राप्त गरेको ट्विटमा जानकारी गराएका छन् ।

उनले अब कस्तो कदम चाल्ने भन्ने विषयमा समेत ईयू नेतासँग छलफल गर्ने बताएका छन् ।

संसदमा शनिबार भएको मतदानमा उनको प्रस्ताव विफल भएको थियो । त्यसको केही घन्टापछि नै उनले समय थप गर्न माग गर्दै पठाएका हुन् ।

यस्तो पत्र पठाउन सासंदहरूले उनलाई गत महिनानै बाध्य पारेका थिए। हस्ताक्षरसहितको दोस्रो पत्रमा भने उनले ब्रेक्जिटमा ढिलाइ गर्नु गल्ती हुने उल्लेख गरेका छन् ।

सो पत्रमा गत साता इयूका नेताहरूसँग भएको सहमतिअनुसार संशोधित ब्रेक्जिट सम्झौता पारित गर्न सरकारले जोड दिने र त्यो ३१ अक्टोवरसम्ममा गरिसक्नेमा प्रधानमन्त्री विश्वस्त रहेको उल्लेख छ।