लुट्छन् देश नेताहरू

A+ A A-

चिल, गिद्ध घुम्न पनि त
लादी चाहिँदो रहेछ ।
माखा भुनभुनाउन पनि त
फोहोर चाहिने रहेछ
लादीमा गिद्ध
फोहोरमा माखा
लागेजसरी
लागिरहेछ मान्छे
आफ्नो स्वार्थ प्राप्तिका लागि
नेता लागिरहेछ
देशको ढुकुटी कुम्ल्याउनतर्फ
कर्मचारी लागिरहेछ
हिसाबकिताब मिलाउनतर्फ
यौनलम्पट पुरुष लागिरहेछ
सुन्दरी युवती पट्याउनतर्फ
व्यापारी लागिरहेछ
कर छल्न र मुनाफातर्फ
चोर लागिरहेछ पुलिस छल्न
पुलिस लागिरहेछन्
चोर समात्न
प्राइभेट स्कुल, कलेज लागिरहेछन्
फि बढाउनतर्फ
कहिले भन्छन्
यो वर्ष महँगी बढ्यो
त्यसैले फि बढेको
कहिले भन्छन्
भाडा बढ्यो
त्यसैले फि बढेको
कहिले भन्छन्
नियम छ वर्षको दश प्रतिशत
फि बढाउनुपर्छ
त्यसैले फि बढेको
तर, किसान
सबैको चपेटामा परिरहेछ ।
कहिले गाईभैँसी मर्छन्
महामारीले गर्दा
सिनो खान गिद्ध घेरिन्छन्
कहिले कामले गर्दा
सफा गर्न भ्याउँदैन घर
भुनभुनाउँछन्
घरभरि माखा
कहिले नेताका झुर आश्वासनमा
परेर भोट दिन्छन्
लुट्छन् देश नेताहरू
आफ्नो कामले बुढीबाट टाढा हुँदा
गाउँका यौनलम्पट झुम्मिन्छन्
हड्डीमा कुकुर झुमेजसरी
भौँतारिन्छ बिरालाले
दूधको कुडी खोजेजसरी
ऊ बिचरो न त राम्रोसँग
आफ्नो जीवन उकास्न सको न त
बुढीको प्यारो भयो
ऊ बिचरो किसान
सधैँ सबैको चपेटामा
परिरहेछ ।
न त उसको
मूल्य कसैलाई थाहा छ
न त उसको
कदर कसैलाई छ
त्यसैले त
ऊ आज फेरिएको छ
र,
बुझेको छ
केही नभई कोही आउँदैन
केही कमाउनका लागि
केही गर्नु पर्दैन बस्
गफ गर्न सिके हुन्छ
दुई जोर नयाँ कोट भए हुन्छ
दुई-चार पैसा गोजीमा भए हुन्छ
त्यसैले त ऊ सिकिरहेछ
गफ गर्न ऐनाअगाडि उभिएर
अब खोलिने नयाँ पार्टीको
गाउँपालिका अध्यक्ष उम्मेदवार
अब ढुक्कसँग भन्नेछ
नि:शुल्क शिक्षा
कृषिमा चामत्कारिकता
शून्य भ्रष्टाचार
यस्तैयस्तै
जित्नेछ चुनाव
झुक्याउनेछ
गाउँका सोझा मानिसलाई
जसरी झुक्याइरहेछन्
वर्षाैंवर्षबाट ती नेताहरू र
बन्नेछ ऊ पनि
आदर्श र निष्ठावान् नेता
बन्नेछ
सहनशील र अनुशासित नेता
यसरी नै बने कैयौँ
मान्छे ठूला
त्यसरी नै बने
कैयौँ मान्छे
त्यसरी नै बन्नेछ
ऊ पनि
ए अब ऊ होइन
नेताजी हो
नयाँ कोटमा सजिएर
ऐनामा हेर्दै मुस्कुराउँदै र
निस्किन्छ
गाउँतिर बन्न आदर्शवान् नेता ।