मानसरोवर घुमाउन वार्षिक सयौँ पर्यटक भित्र्याउने ‘योलो हाइक’ (भिडियो)

A+ A A-

नेपाल पर्यटकीय दृष्टिले विश्वकै उत्कृष्ट गन्तव्य सूचीभित्र पर्छ । यहाँको भौगोलिक, प्राकृतिक तथा सांस्कृतिक सम्पदाले घुमफिरका लागि नेपाललाई विश्वकै उत्कृष्ट गन्तव्यका रूपमा उभ्याएको हो ।

इतिहास, त्यसभित्र लुकेको आध्यात्मिक एवं दैवी रहस्य, भाषा संस्कृति र लोकसाहित्य तथा प्राकृतिक–सांस्कृतिक सम्पदाका कारण नेपाल धार्मिक तथा मनोरञ्जन–पर्यटनका दृष्टिले अद्वितीय भूमि हो ।

विश्वको अग्लो हिमशिखर सगरमाथा, उच्च हिमश्रृखंलाहरू, कलकल अबिरल बग्ने नदी तथा खोला र झरना अनि शीतल मौसम, स्वच्छ हावापानी, हरियो वनजंगल, पहाडका हजारौँ थुम्काहरू र भिर–पाखा, तराईको लहलह लाग्दा हरिया समथर फाँट अनि वनजंगलमा पाइने डाँफे, मयुरलगायत हजारौँ जीवजन्तुको अन्वेषणमा जो कोही लोभिन सक्छ । त्यसैले प्रस्ट पार्छ नेपालको पर्यटन बजारले बोकेको अथाह सम्भावनाबारे ।

यहाँको पर्यटन बजारमा र त जन्मिन्छन् अनिल भट्टजस्ता व्यवसायीहरू । सिङ्गो समुदाय नै पर्यटन व्यवसायसँगै जोडिएको पर्यटकीय गन्तव्य धादिङको गंगाजमुना गाँउपालिकामा जन्मिएका अनिलको व्यावसायिक यात्रा कसरी सुरु भयो ?

ब्याचलर इन इन्फर्मेसन टेक्नोलोजी पूरा गरेसँगै के गर्ने भन्ने अन्योलमा पुगे ।

त्यसबेला उनका अधिकांश साथीहरू विदेश जाने सोचले अंग्रेजी भाषा परीक्षा आईएलटीएसको तयारीमा लागे । अनिलले पनि साथीहरूको लहैलहैमा परीक्षा दिए । तर, पछि घरमा बुबाआमाले विदेश नजा भनेर सल्लाह दिए । उनको आफ्नै इच्छा पनि विदेश जाने भने थिएन । त्यसैले नेपालमै केही गर्नुपर्छ भन्ने सोच बनाए ।

त्यसपछि उनले आईटी ट्रेनिङ कम्पनी सुरु गरे । त्यसैबेला अनिललाई पर्यटन व्यवसाय गरिरहेका आफन्तले व्यवसायमा प्राविधिक सहयोग गर्न आग्रह गरेसँगै उनी सन् २०१० मा टर्च कैलाश ट्राभल कम्पनीसँग आबद्ध भए ।

टर्च कैलाशले मूलत: विदेशी पर्यटकलाई कैलाश मानसरोवर घुमाउने गर्थ्यो । अनिलले कम्पनीका बारे बुझ्न इमेललगायत अन्य माध्यमबाट जोडिने विदेशीलाई कम्पनीबारे बुझाउनेलगायत काम गर्थे ।

अनिलले त्यसअघि नै सुरु गरिसकेको आफ्नै आईटी ट्रेनिङ कम्पनीलाई समेत सँगै अगाडि बढाइरहेका थिए ।

०००

सन् २०१९ मा विश्व महामारीका रूपमा देखा परेको कोरोनाले पर्यटनसम्बद्ध अधिकांश व्यवसायको अस्तित्व समाप्त पार्ने दूरवस्था सिर्जना गर्‍यो । तर, त्यही दूरवस्थालाई अनिलले भने आफूलाई सफल व्यवसायीका रूपमा उभ्याउने अवसर बनाए । ठप्प बनेको पर्यटन बजारमा ट्रेकिङ एजेन्सी ‘योलो हाइक प्रा.लि.’ ल्याएर ।

मान्छे घरबाट निस्केर हिँड्न नपाउने त्रास र बाध्यता रहेको परिस्थितिमा कसैलाई घुमाइदिन्छु भनेर ठेक्का लिने कम्पनी योलो हाइक सुरु गर्नु कम्ति चुनौतीपूर्ण थिएन । तर, त्यही चुनौती स्वीकार गर्दा उनलाई आज वार्षिक सयौँ पर्यटक नेपाल भित्र्याएर करोडौँको कारोबार गर्ने अवस्थामा पुर्‍याएको छ ।

मुख्यतः धार्मिक पर्यटकलाई कैलास मानसरोवर घुमाउने योलो हाइकसँग मुख्यतः भारतीय, अमेरिकी, अस्ट्रेलियन, जर्मनलगायत मुलुकका ग्राहकहरू वेबसाइटका माध्यमले जोडिने गरेका छन् ।

कैलाश मानसरोवर घुम्न चाहने पर्यटकलाई योलो हाइकले ११ दिने प्याकेजको व्यवस्था गरेको अनिल बताउँछन् । उक्त प्याकेजको एक लाख सत्तरी हजार शुल्क लाग्छ । योलो हाइक मार्फत गत वर्ष मात्र करिब ५ सय पर्यटक आफूले नेपाल भित्र्याको अनिल सुनाउँछन् ।

पर्यटकबाट लिइने शुल्कको १० प्रतिशत भने योलो हाइकको कमिसन तथा कमाइ रहन्छ ।

ट्रेकिङ तथा हाइकिङ सिजनेबल व्यवसाय हो । हाल योलो हाइकमा अनिलले पूर्ण रूपमा आठ जना र सिजनका बेला ६० जनासम्मलाई रोजगारी दिइरहेका छन् ।

चिसो महिनामा हिमाली तथा उच्च पहाडी क्षेत्रमा अत्याधिक चिसोका कारण जान सम्भव हुँदैन । त्यसैले गर्मी सुरु भएसँगै चलमलाउने ट्रेकिङ तथा हाइकिङ व्यवसायले यतिखेर अनिलाई पनि व्यस्त बनाएको छ ।

पर्यटकलाई अगामी जेठमा यो सिजनको पहिलो कैलाश मानसरोवर यात्रा गराउने तयारीमा जुटेका अनिल भदौसम्म पर्यटकलाई टुर प्याकेज आयोजन गर्ने योजना रहेको सुनाउँछन् ।