फर्किंदैछ मुस्कानको ‘मुस्कान’

A+ A A-

कीर्तिपुर अस्पतालको बेड नम्बर ५ ।

वीरगञ्जकी १४ वर्षीषा बालिका मुस्कान खातुन सुतिरहेकी छिन् ।

छिनमै आँखा उर्घाछिन् । छिनमै बन्द । सिरानीमा डायरी र केही किताब छन् ।

अस्पतालकाे वेडमा खातुन

वरिपरि मुस्कुराइरहेका छन्र गुडियाहरू । उनी पनि त्यसैगरी मुस्कुराउन खोज्छिन् । तर सक्दिनन् ।

मुस्कुराउनु पनि कसरी ?

आधा अनुहार र हात एसिडले ‘रूग्ण’ बनेको छ ।

बेडको छेउमै बसेका छन् बुबा रसुल र आमा सहनाज । रसुल र सहनाज पनि विक्षिप्त देखिन्छन् ।

मुस्कानको ‘मुस्कन’ लुटिएको ४३ दिन बित्यो ।

छोरीको मुस्कान लुटिएपछि बाआमाको मन पनि जलेको छ । रसुल र सहनाज छोरीलाई हेर्दै ‘खुइया’ गर्छन् ।

छोरीको मुहारमा मुस्कान ल्याउन कुनै कसर बाँकी राखेका छैनन् ।

त्यो कालो दिन

भदौ २० शुक्रबारको दिन थियो । मुस्कान सदाझैं झिसमिसेमै उठिन् । केहीबेर नमाज पढिन् । त्यसपछि किताब कापी च्यापेर विद्यालय लागिन् । उनको बिहानी सत्रको कक्षा थियो ।

‘उषा’ काे किरण वीरगञ्मा फैलिसकेको थिएन । मुस्कानको ‘मुस्कान’ लुटिएको क्षणभरमै फैलियो ।

सहनाज विस्तारमै थिए । मोबाइलमा घण्टी बज्यो ।

मोबाइलमा कसैको आवाज आयो ‘मुस्कानमाथि एसिड आक्रमण भएको छ । नारायणी अञ्चल अस्पतालमा उपचार हुँदैछ । तत्काल आउनुहोस् । ’

आवाज सुन्नेबित्तिकै रसुल र सहनाज आत्तिए । हतारहतार अस्पताल पुगे ।

अस्पतालको बेडमा छोरीको ‘विलाप’ देख्नेबित्तिकै दुवै जना मुर्च्छित भए । छोरीको जलेको अनुहार र हात देख्नेबित्तिकै अवाक् भए ।

त्यहाँ उपचार सम्भव नभएपछि मुस्कानलाई काठमाडौं ल्याइयो । अहिले कीर्तिपुर अस्पतलामा उनको उपचार भइरहेको छ ।

डाक्टर बन्ने मुस्कानको सपना

त्रिभुवन हनुमान विद्यालयमा ९ कक्षामा अध्ययनरत मुस्कानको डाक्टर बन्ने सपना छ । बाहिरी कुरामा भन्दा मुस्कानको ध्यान पढाइमै जान्थ्यो ।

पढाइमा अब्बल मुस्कानलाई ‘आवारा’ केटाहरूले बाटोमा जिस्काउँथे । पाँच छ महिना भएको थियो मुस्कानलाई वीरगन्जकै मजिद मिया र सम्साद आलमले बाटो छेक्ने गरेको ।

आवारा केटाहरूले दुःख दिने गरेको मुस्कानले घरमा भनिन् । मुस्कानका बुबा रसुलले ती केटाहरूलाई सम्झाए पनि । मुस्कानलाई दुःख नदिन सुझाए । रसुललाई अब त आवारा केटाहरूले छोरीलाई दुःख नदेलान् भन्ने लागेको थियो । तर ठीक विपरीत ।

केही दिनपछि ती केटाहरूले गणेशमान चोकनजिकै मुस्कानलाई फेरि बाटो छेके ।

सुरूमा मुस्कानलाई उनीहरूले पानी पिउन आग्रह गरे । पानी भनेर एसिड पिउन लगाउने योजना उनीहरूको रहेछ । तर मुस्कानले पिउन अस्वीकार गरिन् । मुस्कानलाई फेरि बोलाए ।

फर्किएकी मात्र के थिइन् आवारा केटाले जगमा ल्याएको एसिड र ढुंगा प्रहार गरे । मुस्कानको दाहिने कान, अनुहार र छातीमा गहिरो चोट लाग्यो ।

भतभत पोल्न थाल्यो । आगोको भुंग्राेमा परेझैं भयो । मुस्कान बेहोस भइन् । नजिकै रहेकाले उद्धार गरेर अस्पताल पुर्‍याए । होस खुल्दा उनी अस्पतालको बेडमा थिइन् ।

स्वास्थ्यमा सुधार

कीर्तिपुर अस्पतालमा उपचाररत मुस्कानको स्वास्थ्यमा अहिले केही सुधार आएको छ । ‘पहिलाभन्दा अहिले राम्रो भएको छ,’ बुबा रसुलले भने, ‘तैपनि अझै दाहिने कान, अनुहार र छातीमा गहिरो चोट छ ।’

घाउ ठीक भएपछिमात्र उनको सर्जरी हुने चिकित्सकहरूले बताएका छन् । ‘तिघ्राको छाला काटेर अनुहार र हातमा राखिएको छ,’ उनले भने, ‘घाउ ठीक भएपछि सर्जरी गर्ने चिकित्सकले बताएका छन् ।’

छैन उपचार खर्च

मुस्कानको उपचारका लागि पैसाको अभाव रहेको बुबा रसुलले बताए । ‘दिनकै ५ देखि १० हजार रूपैयाँसम्म खर्च हुन्छ,’ उनले भने, ल्याएको पैसा सकियो, सबैको साथ सहयोगमा छोरीको उपचार भइरहेको छ ।’

उपचारका लागि काठमाडौं ल्याउने बेला पर्साका सांसद प्रदीप यादवले ५० हजार र वीरगञ्ज महानगरपालिकाका मेयर विजयकुमार सरावगीले १५ हजार सहयोग गरेका थिए । अहिले प्रदेश २ ले पाँच लाख दिने घोषणा गरेको छ ।

यो रकम सकिइसकेको छ । दैनिक १० हजार बढी खर्च भइरहेको छ । त्यसैलै थप उपचार कसरी गर्ने भन्ने चिन्तामा छन् मुस्कानका बाआमा ।

भेट्न पुग्ने सबैलाई मुस्कानका बा आमा भनिरहन्छन्, ‘सक्नुहुन्छ भने सहयोग गरिदिनुस् ।’ मुस्कानको उपचारका लागि आर्थिक सहयोग गर्न चाहनेका लागि उनकै नाममा सिटिजन्स बैंकमा खाता समेत खोलिएको छ ।

मुस्कानका बाआमाका अनुसार सहयोग गर्न चाहनेले सो बैंकको कीर्तिपुर शाखाको खाता नम्बर ०२१०१०००००४९६०४१ मा सहयोग रकम जम्मा गर्न सक्नेछन् ।

घरमा ताला

वीरगन्जस्थित रसुलको घरमा अहिले ताला लागेको छ । ‘घरमा मुस्कान दिलाउने छोरी ठीक भएपछि मात्र घर फर्किन्छौं,’ ‘रसुलले भने, कति वर्ष लाग्ने हो ठीक हुन ठेगान छैन । प्रार्थना गरौं छिटो निको होस् ।’

रसुलको आल्मुनियम पसल छ । तीन छोरी र दुई छोरा छन् । आल्मुनिय पसलबाट नै उनले सन्तानलाई पढाउँदै आएका छन् । मुस्कान माइली छोरी हुन् । ‘छोरीलाई ठीक होस जे पढ्छु भन्छिन् त्यहीँ पढाउँछु,’ रसुल भक्कानिन्छन् ।

मुस्कानकाे स्वास्थ्यलाभको कामना

राष्ट्रिय तथा अन्तर्राष्ट्रिय ख्यातिप्राप्त व्यक्तिहरूले मुस्कानको मुहारमा मुस्कान ल्याउन कामना गरिरहेका छन् । हिजोआज दैनिकजसो ख्यातिप्राप्त व्यक्ति अस्पताल पुग्छन् ।

भारतीय अभिनेता र अभिनेतृले भिडियो सन्देशमार्फत मुस्कानलाई स्वास्थ्य लाभको कामनासँगै हौसला दिइरहेका छन् । अमिताभ बच्चनले मुस्कानलाई भिडियो सन्देश पठाए । त्यस्तै नायक वरूण धवन, अक्षय कुमार, नायिका कृति सेननलगायतले पनि मुस्कानलाई साथ दिएका छन् ।

त्यस्तै, नेपाली सुपरस्टार राजेश हमाल, चर्चित गायक राजु लामा, क्रिकेटर पारस खड्का, मिस नेपाल शृंखला खतिवडा, गायिका आनी छोइङलगायतले पनि अस्पताल पुगेर मुस्कानलाई हौसला दिएका छन् ।

यसका लागि अभियन्ता उज्ज्वल थापाले सहजीकरण गरेका छन् । त्यस्तै प्रदेश २ का मुख्यमन्त्री लालबाबु राउत, उद्योग, वाणिज्य तथा आपूर्तिमन्त्री मातृका यादव रौतहटका सांसद प्रभु साह पनि अस्पताल पुगेका छन् । ख्यातिप्राप्त व्यक्तिहरूको आशीर्वादले मुस्कानलाई थप हौसला मिलेको छ । उनको मुहारमा खुशीका रङहरू देखिन थालेका छन् ।

एसिड प्रहार गर्ने बालसुधार गृहमा

मुस्कानलाई एसिड प्रहार गर्ने मजिद मिया र सम्साद आलमलाई प्रहरीले पक्राउ गरेर बालसुधार गृहमा राखेको छ । १८ वर्ष नपुगेकाले उनीहरूलाई पर्सा जिल्ला अदालतले बालसुधार गृहमा राख्न आदेश दिएको हो । उनीहरूमाथि थप अनुसन्धान भइरहेको पर्सा प्रहरीले जनाएको छ ।

एसिड हान्नेलाई कस्तो कारबाही हुन्छ ?

मुलुकी फौजदारी संहिताको दफा १९३ मा तेजाब वा अन्य रासायनिक, जैविक वा विषालु पदार्थ प्रयोग गरी कुरूप पार्न नपाइने उल्लेख छ ।

‘कसैले कसैलाई तेजाब वा यस्तै प्रकारका अन्य रासायनिक, पदार्थले पोली, डामी, दली, घसी जिउमा पीडा गराउने वा अनुहार वा शरीरको कुनै अंग कुरूप पार्ने काम गर्नु गराउनु हुँदैन ।’

‘कसुर गर्ने व्यक्तिलाई कसुरको प्रकृति हेरी अनुहार कुरूप पारेमा ५ वर्षदेखि ८ वर्षसम्म कैद र १ लाख रूपैयाँदेखि ५ लाख रूपैयाँसम्म जरिवाना र शरीरको अन्य अंग कुरूप पारेमा वा शरीरमा पीडा पुर्‍याएमा ३ वर्षदेखि ५ वर्षसम्म कैद र ५० हजार रूपैयाँदेखि ३ लाख रूपैयाँसम्म जरिमाना हुनेछ ।’

हदैसम्म सजाय होस्

मुस्कानकी आमा सहनाजले एसिड प्रहार गर्नेलाई कडा कारबाही गर्न माग गरिन् । ‘मुस्कानले मात्र हाेइन अरू छोरीले पनि भोलि दुःख पाउँछन्,’ उनले भनिन्, ‘एसिड प्रहार गर्ने अपराधीलाई फाँसीको व्यवस्था हुनुपर्छ ।’

बा अामासँग खातुन

उनी आक्रोशित हुँदै प्रश्न गर्छिन्, ‘एसिड पीडितले मुख छोपेर हिँड्नुपर्ने, अपराधी चाहिँ छाती फुलाएर हिँड्न पाउने कस्तो कानुन हो ?’

छोरीलाई एसिड प्रहार गर्नेले उन्मुक्ति पाउने त हैन भन्ने चिन्ता पनि उत्तिकै छ । ‘छोरीको रेखदेखमा हामी काठमाडौंमा छौं, उता अपराधी छुट्ने त हैन ?,’ उनको आशंका छ ।

अस्पतालको शय्यामा अलिअलि मुस्कुराउन सक्ने भएकी मुस्कान भन्छिन्, ‘मलाई एसिड हान्ने अपराधीलाई फाँसी दिइयोस्, मजस्तै अरू मुस्कानको मुस्कान नलुटियोस् ।’