कडा प्रतिपक्ष बनेको कांग्रेसको निशानामा रवि लामिछाने, राजीनामा बटमलाइन

कांग्रेसका सांसदकाे विराेध नियाल्दै गरेका गृहमन्त्री लामिछाने

A+ A A-

प्रमुख प्रतिपक्षी दल नेपाली कांग्रेसले उपप्रधान तथा गृहमन्त्री रवि लामिछानेलाई ‘मन्त्री मान्न नसकिने’ भन्दै संसद अवरोध गरेपछि शुक्रबारको संसद बैठक कार्यसूचीमा प्रवेश गर्न सकेन । संसदको कार्यसूचीमा प्रवेश गर्नुअघि कांग्रेसले प्रधानमन्त्री पुष्पकमल दाहाल प्रचण्डबाट गृहमन्त्री रवि लामिछानेबारे जवाफ माग गर्‍याे । सहकारी ठगी प्रकरणमा जाेडिएका व्यक्तिले गृहमन्त्री पदमा रहन नहुने भन्दै कांग्रेसले उनकाे राजीनामा माग गरेकाे छ ।

लामिछाने मन्त्री भएपछि रोस्टममा गएर कुनै पनि विधेयक पेस गर्न लागेको पहिलो अवसर थियो । तर, त्यो अवसर पहिलो पटकदेखि नै कठिन हुने देखिएकाे छ । कारण नरम प्रतिपक्ष मानिएको कांग्रेस गरम देखिएको छ । शुक्रबारको बैठकमा उपप्रधान तथा गृहमन्त्री लामिछानेले राजनीतिक दलसम्बन्धी ऐनको संशोधन विधेयकमाथि विचार गरियोस् भन्ने प्रस्ताव प्रस्तुत गर्ने कार्यसूची थियो । त्यस्तै, प्रतिनिधिसभामा सम्पत्ति शुद्धीकरण निवारण तथा व्यावसायिक वातावरण प्रवर्द्धनसम्बन्धी केही नेपाल ऐनलाई संशोधन गर्ने विधेयक सम्बन्धमा राष्ट्रियसभाबाट प्राप्त सन्देश प्रस्तुत गर्ने र शुक्रबार आगामी वर्षका लागि विनियोजन विधेयकका सिद्धान्त र प्राथमिकतासम्बन्धमा छलफल हुने कार्यसूची थियो ।

सदनको विशेष समय सकिएपछि सभामुख देवराज घिमिरेले नियमित कार्यसूचीमा लैजान बैठकअघि बढाए । उनले उपप्रधान तथा गृहमन्त्री लामिछानेलाई राजनीतिक दलसम्बन्धी ऐनको संशोधन विधेयकमाथि विचार गरियोस् भन्ने प्रस्ताव पेस गर्न अनुमति दिए । त्यसलगत्तै कांग्रेसका सांसदहरू जर्‍याकजुरुक उठे ।

सभामुख घिमिरेले उठेका सांसदहरूबाट एक जनालाई बोल्न समय दिए । कांग्रेस सांसद राजन केसीले बोले । उनले सहकारी ठगी प्रकरणमा गृहमन्त्री लामिछाने अनुसन्धानको घेरामा रहेको भन्दै आफूहरू यसबारेमा स्पष्ट हुन चाहेको बताए ।

‘गृहमन्त्री रवि लामिछाने जी सहकारीपीडक हुनुहुन्छ । पीडितहरू हजारौँ संख्यामा सडकमा रोइरहनुभएको छ । यस्तो अवस्थामा जबसम्म प्रधानमन्त्रीले हाउसमा आम नेपाली जनतालाई आश्वस्त पार्न सक्नुहुन्न । तबसम्म हाउस चल्न सक्दैन,’ उनले भने ।

लामिछानेविरुद्ध जिल्ला प्रहरी कार्यालय कास्कीमा सूर्य दर्शन सहकारीका पीडितहरूले उजुरी दिएका छन् । यस सम्बन्धमा जवाफ दिन प्रधानमन्त्रीलाई सभामुखले रुलिङ गर्नुपर्ने सांसद केसीले माग गरे । ४६ लाख बराबरको गाडी कर्जा सहकारीको सदस्य नभईकन लिएको बारेमा पनि केसीले प्रस्ट पार्न भने ।

त्यसपछि सभामुख घिमिरेले कार्यसूची अघि बढाउन आग्रह गरे । सदन चलाएपछि अरु विषयमा छलफल गर्ने बताए । त्यसपछि माओवादी प्रमुख सचेतक हितराज पाण्डेले नियमापत्ति जनाए । ‘प्रतिनिधिसभा नियमावलीको नियम २६ अन्तर्गत म नियमापत्ति गरिरहेको छु । हाम्रो नियमावलीको नियम २० को झ पालना भएन । चैत ६ गते प्रधानमन्त्रीसँग प्रश्नोत्तर कार्यक्रम छ । व्यवस्थित रूपमा सदन अगाडि बढाइरहेको अवस्थामा सदनको कामकारबाही अगाडि बढाउन नदिईकन जसरी रोक्न खोजिएको छ, यसमा नियमापत्ति छ,’ पाण्डेले भने ।

सत्तारुढ दलको मुख्य सचेतकले नै नियमापत्ति गरेपछि कांग्रेसका सांसदहरूले फेरि सभामुख घिमिरेसँग समय मागे । समय पाएपछि कांग्रेसका प्रमुख सचेतक रमेश लेखक बोले । उनले प्रतिपक्ष उभिएको बेला सदन अवरुद्ध मानिने कुरा स्मरण गराए । प्रतिपक्ष उभिएपछि भाषण हुने कुरा नौलो रहेको पनि लेखकले बताए । सदनको मर्यादा ख्याल राख्न सभामुख र सरकारको ध्यानाकर्षण गराए । काग्रेसले बजेटसम्बन्धी कुनै पनि विषयलाई अवरोध गर्न नचाहेको उनले बताए । मन्त्री अनुसन्धानको दायराभित्र परेपछि मन्त्री पदमा बसिराख्ने हक स्थापित नहुने उनले बताए ।

‘के प्रतिपक्षलाई वेलमै बोलाएको हो सत्तापक्षले ? जवाफ दिने हो कि प्रतिपक्षलाई वेलमै बोलाएको हो ? यदि वेलमा बोलाएको हो भने बाध्य नपारियोस् होइन भने प्रधानमन्त्रीको जवाफ नआउँदासम्म माननीय उपप्रधान एवं गृहमन्त्रीको जे कार्यसूची राखिएको छ । हामी त्यसमा प्रवेश गर्न सक्दैनौँ,’ लेखकले भने । बजेटका कुरालाई अवरोध नगर्ने उनले दोहोर्‍याए । कांग्रेस सांसदहरू उठिरहे ।

बैठक चल्न नसक्ने अवस्था देखेपछि सभामुख घिमिरेले १५ मिनेट बेठक स्थगित गरे । दोस्राे बैठक सुरु भयो । सभामुख घिमिरेले बैठकको कारबाही अघि बढाउनेबितिक्कै कांग्रेस सासदहरूले उठेर विरोध जनाए । सभामुखले उपप्रधान तथा गृहमन्त्री लामिछानेलाई राजनीतिक दलसम्बन्धी ऐनको संशोधन विधेयकमाथि विचार गरियोस् भन्ने प्रस्ताव पेस गर्न अनुमति दिए । त्यसलगत्तै कांग्रेस सांसदहरू वेल घेर्न पुगे । कांग्रेस सांसदहरू दौडिएर वेल घेर्न पुग्दा प्रमुख सचेतक रमेश लेखक अग्रपंत्तिमा थिए ।

कांग्रेस सांसदहरूले वेलमा भिड गरिरहँदा मन्त्री लामिछाने हातमा पत्र बोकेर उठिरहेका देखिन्थे । कांग्रेस सांसदहरूले नारा लगाए, ‘सहकारी पीडितलाई न्याय दे .., सहकारी ठगी मन्त्री राजीनामा दे ...।’

आफ्नो राजीनामा माग्दै वेल घेराउ भइरहँदा लामिछाने उभिएर कांग्रेसका सांसहरूको क्रियाकलाप हेरिरहेका थिए भने घरीघरी लाइभ क्यामरामा नजर डुलाउँथे । कांग्रेसको अवरोधपछि सभामुखले बाँकी कार्यसूची हटाएको र अर्को बैठक आइतबार बिहान ११ बजेका लागि राखिएको सूचना सुनाए ।

बैठक त स्थगित भयो तर कांग्रेसको राजीनामा बटमलाइन स्थगित भएको छैन । त्यसको रूप कांग्रेसले विशेष समयमा देखाएको थियो । विशेष समयमा बोलेका कांग्रेस सांसद केसीले लामिछानेले स्वर्णलक्ष्मी सहकारीबाट सदस्य नभई ४६ लाख ऋण लिएर गाडी खरिद गरेको बताए । ‘अनुसन्धान नहुन्जेल विश्राम लिनुहोला । ठीक भएको अवस्थामा आउनुहोला । होइन भने कुनै हालतमा गृहमन्त्री स्वीकार्न तयार छैनौँ,’ उनले भने ।

त्यस्तै, कांग्रेस सांसद तथा सहमहामन्त्री जीवन परियारले गृहमन्त्री लामिछानेविरुद्ध जिल्ला प्रशासन कार्यालय कास्कीमा सूर्यदर्शन सहकारीका पीडितहरूको उजुरी रहेको बताए । ‘जाहेरीमा उल्लेखित छानबिन नेपाल प्रहरी प्रशासनले निष्पक्ष गर्ला त भनेर आमजनताले प्रश्न गरेका छन्,’ परियारले भने । उनले प्रधानमन्त्रीको पनि ध्यानाकर्षण गराए ।

गृहमन्त्री लामिछानेले आफ्नो राजीनामा मागे पनि काम गरिरहने बताए । ‘कांग्रेसको नारा चर्को होला, राजीनामा दे भन्ने होला । म आफ्नो काम गरिरहन्छु, मलाई यो शक्ति नेपाली जनताले दिएका हुन् । मैले प्राप्त गरेको यो शक्ति नेपाली जनतालाई ब्याजसहित फिर्ता गर्नका लागि आएको हो,’ उनले संसद बैठकपछि भने ।

कति दिन मन्त्री बन्ने थाहा नभएको र काममा निरन्तर लागिरहने उनले बताए । ‘कति दिन हुन्छु मलाई थाहा छैन । जति दिन हुन्छु डटेर, नझुकीकन आफ्नो काममा निरन्तर लागिरहनेछु,’ उनले भने । समय पाएमा कांग्रेसलाई पढाउने उपप्रधान तथा गृहमन्त्री लामिछानेले बताए । ‘के विषय उठाएको छ, त्यसको मेरिट के हो, कहाँ उठेको छ, कस्तो उजुरी हो, कसले गराएको हो त्यत्ति कुराचाहिँ एक पटक सदनमा मौका पाएँ भने नेपाली कांग्रेसलाई पढाउने इच्छा छ,’ उनले भने ।

प्रकाशित मिति: शुक्रबार, चैत २, २०८० १९:३०