पोखरा रंगशाला निर्माणको काम तीव्र, ६० प्रतिशत पूरा

A+ A A-

१३औं दक्षिण एसियाली खेलकुद (साग) को मिति नजिकिएसँगै पोखरा रंगशालाको भौतिक पूर्वाधार निर्माणको काम द्रुत गतिमा अगाडि बढाइएको छ । पोखरा रंगशालाभित्र निर्माणाधीन अन्तर्राष्ट्रिय मापदण्डको फुटबल मैदानलगायत आवश्यक पूर्वाधार निर्माणको काम ६० प्रतिशत सम्पन्न भएको छ ।

राष्ट्रिय खेलकुद परिषद् (राखेप)ले १५ कात्तिकभित्र मैदान तयार गर्न निर्माण कम्पनीलाई निर्देशन दिएसँगै निर्माण कार्यले तीव्रता पाएको हो ।

सागलाई लक्षित गरी पोखरा रंगशालामा निर्माणधीन पूर्वाधार निर्माणलाई तीव्रता दिइएको निर्माण कम्पनीका प्रोजेक्ट म्यानेजर दीपक बरालले बताए । ‘पूर्वाधारको काम करिब ६० प्रतिशत पूरा भएको छ,’ उनले भने ।आगामी १ डिसेम्बरदेखि १० तारिखसम्म सञ्चालन हुने १३औं संस्करणको प्रतियोगिताका लागि आवश्यक फुटबल मैदान निर्माण गरीसक्ने उनले बताए ।

मैदान बनाउन अहिले डेढ सय मजदुरले काम गरिरहेका छन् । तोकिएको मितिमा ८ देखि १० हजार सिट क्षमताको प्यारापिटसहितको फुटबल मैदान तयार हुने बरालको भनाइ छ ।

पोखरा रंगशालाको फुटबल मैदानमा तिहारसम्म भारतको कोलकाताबाट ल्याइएको दुबो रोपी सक्ने तयारी छ ।

अहिले निर्माणधीन रंगशालाको फुटबल मैदानमा करिब महिना दिन अघिदेखि कोलकाताको बर्माडा ग्रास (दुवो) रोप्ने काम धमाधम भइरहेको छ । रंगशालाको फुटबल मैदानमा ९० हजार बर्गफिट बर्माडा ग्रास (दुवो) कोलकाताबाट ल्याउनको लागि अग्रिम बुकिङ गरिएको इ.बरालले बताए ।

फुटबल मैदान निर्माणको अन्तिम चरणमा आर्टिफिसियलबाट नेचुरल देखिने फुटबल मैदान निर्माण गर्ने निर्देशन भएपछि आफूहरुले पोखराको वातावरण अनुकुल हुने गरी दुवो ल्याउने योजना बनाएको उनले बताए ।

उनका अनुसार १७ वटा शौचालयमध्य हालसम्म ११ वटा शौचालयको भवन फिनिसिङको चरणमा रहेका छन् ।

१३औं सागमा महिला फुटबल खेल खेलाइने भएपछि फुटबल मैदानको निर्माण कार्य तीव्र बनाइएको राष्ट्रिय खेलकूद परिषद् (राखेप) सदस्य राजेशकुमार गुरुङले बताए ।निर्माण कम्पनीले सागको खेल सञ्चालन हुने समयभित्र रंगशाला नबनाए कारबाही गर्ने राखेप सदस्य गुरुङले बताए ।

खेलकुद मन्त्रालय, राखेप तथा क्षेत्र र जिल्ला खेलकुद समितिले समेत निर्माण कार्यप्रति निरन्तर चासो राख्दै आएका छन् ।

सागअन्तर्रगत पोखरामा महिला क्रिकेटसहित ९ वटा खेलको आयोजना गरिने छ । क्रिकेट खेल २ डिसेम्बरदेखि ९ डिसेम्बरसम्म सञ्चालन हुने छ ।

यस्तै, महिला फुटबल २८ नोभेम्बरदेखि ९ डिसेम्बरसम्म, ह्याण्डबल २८ नोभेम्बरदेखि ४ डिसेम्बरसम्म, प्याराग्लाइडिङ २९ नोभेम्बरदेखि ८ डिसेम्बरसम्म सञ्चालन हुने राखेपले जनाएको छ । महिला तथा पुरुष ह्याण्डबल, भारत्तोलन, बिच भलिबल, महिला फुटबल, ब्याड मिन्टन, ट्राएथ्लन र आर्चरी खेलसमेत सञ्चालन हुने छ ।

वि.सं. २०३९ मा निर्माण गरिएको पोखरा रंगशालाको विशिष्ट कक्षमा २०७२ सालकोे भूकम्पबाट क्षति पुगेको थियो ।गत आर्थिक वर्षको असार मसान्तसम्ममा निर्माण सक्ने गरी निर्माण थालिए पनि रंगशाला लामो समयसम्म डिजाइनमै अल्झेको थियो । पछि एमए कन्स्ट्रक्सन तथा भारतीय ग्रेट स्पोर्टस् इन्फ्रा (जेभी)ले पक्रिया पूरा गरी निर्माण कार्य अगाडि बढाएका हुन् ।

सरकार र कम्पनीबीच निर्माण सम्झौतामा साधारण, भीआईपी, भीभीआईपी गरी १६ हजार ५ सय दर्शक क्षमताको प्याराफिट बन्ने उल्लेख भए पनि पछि दुई हजार थप्ने तयारी गरिएकाले लागत एक अर्ब ३० करोडसम्म पुग्ने अनुमान गरिएको छ ।

प्रकाशित मिति: शनिबार, कात्तिक २, २०७६ १२:३९