विदेशिने नेपाली युवाको नियति बोल्ने नाटक ‘आकाशको बाटो’ (भिडियो)

A+ A A-

पछिल्लो समय देशमा रोजगारको चरम अभाव छ । रोजगारको अवस्था नभएपछि एकातर्फ कमाइ छैन, अर्कातर्फ बढ्दो महँगीका कारण बजारभाउ आकाशिँदो छ ।

यस्तो अवस्थामा देशमै बसेर परिवार पाल्न त टाढाको कुरा, आफ्नै पेट पाल्नसमेत मुस्किल छ । जसका कारण हरेकजसो युवा विदेशिन बाध्य छन् । साँच्चै भन्ने हो भने देशमै रहेर केही गर्छु या गरिखान्छु भन्ने युवा भेट्नै मुस्किल छ । आकाशको बाटो रोजेर विदेशिनु हरेकजसो नेपाली युवाको नियति बनेको छ ।

नेपाली युवाको यही नियतिलाई आधार बनाएर रंगकर्मी प्रदीपकुमार चौधरीले नाटक ‘आकाशको बाटो’ ल्याउने भएका छन् । यतिखेर थापागाउँस्थित मण्डला नाटक घरमा नाटक 'आकाशको बाटो'को अभ्यास चलिरहेको छ ।

नाटकका लेखक तथा निर्देशक रहेका चौधरीका अनुसार, आकाशको बाटो भएर एउटा कसैको छोरो विदेश गइरहेको छ भने त्यहाँ ऊ मात्र गइरहेको हुँदैन । ऊसँगै बुबाआमाको माया, आशीर्वादसँगै आशा गइरहेको हुन्छ । एउटा युवा विदेश जाँदा उसको परिवारमा पर्ने असरको कथा नै ‘आकाशको बाटो’ हो ।

जसरी काठमाडौंमा दसैँको समयमा बाहिरका मान्छे आ–आफ्नो घर फर्किंदा काठमाडौं खाली हुन्छ, काठमाडौंमै बसेर पनि दसैँ मनाउन सकिन्थ्यो तर जसरी प्रथा या चलनकै रूपमा सबैजसो आफैँ गाउँघर जान्छन् । ठीक त्यसैगरी युवाहरू विदेश जाने क्रम पनि परम्पराकै रुपमा विकास भएको चौधरी सुनाउँछन् । यसको मुख्य कारण देशमा स्रोत, साधनको अभाव नभएर देशभित्रै रोजगारीको अवसर सिर्जना गर्न सक्ने नीति तर्जुमा हुन नसक्नु रहेको उनको बुझाइ छ ।

‘आकाशको बाटो’का कलाकार मनोज केसी भन्छन्– ‘यो एउटा नाटक मात्र नभएर पछिल्लो समयको नेपाली समाजको यथार्थ चित्रण पनि हो । यसले अलिकति हसाउँछ, अलिकति रुवाउँछ र नाटक भनेको के रहेछ भनेर बुझ्न चाहनेहरू लागि 'आकाशको बाटो' उदाहरण हो ।’

मण्डला नाटकघरले स्थापनाकालदेखि नै आफूले सिकेका जानेका सीपहरू तथा ज्ञानहरू अन्यमा पनि बाँड्नुपर्छ र नाट्य क्षेत्रमा आउने नयाँ पुस्तालाई सहयोग गर्नुपर्छ भन्ने सोचले थिएटर ल्याबको अवधारणामा समेत काम गर्दै आएको छ । उक्त अवधारणअनुरुप अहिले मण्डला ल्याब– १३ सम्म आइपुगेको छ । ल्याब– १३ मार्फत मण्डलाले २३ जना कलाकार उत्पादन गर्दै छ ।

नटक ‘आकाशको बाटो’ मा तिनै कलाकारको अभिनय रहेको छ । नाटक ‘आकाशको बाटो’ मण्डला नाटकघरस्थित ‘ल्याब स्टुडियो’मा चैत २ देखि १८ गतेसम्म मञ्चन हुने बताइएको छ ।

भिडियो:

प्रकाशित मिति: बुधबार, फागुन ३०, २०८० १९:१०