बैंकर भावना भन्छिन्– महिलाले म सक्छु–गर्छु भन्नुपर्छ, आफैँलाई कमजोर ठाने त सक्किगो नि !

बैंकर भावना भन्छिन्– महिलाले म सक्छु–गर्छु भन्नुपर्छ, आफैँलाई कमजोर ठाने त सक्किगो नि !

A+ A A-

भावना खड्काले आजभन्दा १४ वर्षअघि नबिल बैंकबाट बैकिङ करियर सुरु गरेकी हुन् । उसो त करिब ४ दशकअघि पूर्वी नेपालको इटहरीमा जन्मिएकी भावना स्कुलमा फ्लोरेन्स नाइटिङ्गेलको जीवनी पढ्दा र सुन्दा भविष्यमा फ्लोरेन्सजस्तै स्वास्थ्य स्वयंसेविका बन्ने सपना देख्थिन् । बाल्यावस्थादेखि नै आफ्ना भावना र विचार स्पष्ट राख्न सक्ने क्षमता देखेर परिवारले भने भावनालाई वकिल बनाउन चाहन्थ्यो । दाइहरूले भने उनलाई 'तिमीले व्यवस्थापन पढ्नुपर्छ' भन्थे ।

इटहरीकै एउटा विद्यालयबाट एसएलसी उत्तीर्ण गरेपछि भावनालाई तिमीले व्यवस्थापन पढ्नुपर्छ, व्यवस्थापन क्षेत्र तिम्रा लागि सबैभन्दा राम्रो हुन सक्छ भनेर धेरैले सुझाए । त्यसपछि इटहरीकै एउटा कलेजमा व्यवस्थापनमा भर्ना भएर अध्ययन गर्न थालिन् । बिस्तारै उनमा बैंकिङ जागिरप्रतिको आकर्षण बढ्दै गयो ।

व्यवस्थापन संकायअन्तर्गतकै स्नातकोत्तर पूरा गरेसँगै बैंकिङ क्षेत्रमा प्रवेश गर्ने सोच बनाइन् । जतिबेला नेपालमा २८ वटा वाणिज्य बैंकहरू सञ्चालनमा थिए । जसमध्ये बैंकिङ क्षेत्रमा भविष्य देख्नेहरूका लागि नबिल बैंक सपनाका रूपमा थियो । त्यसैले भावनाका लागि पनि नबिल बैंक सपनाको बैंक बन्यो ।

भावनाका अनुसार त्यसबेला नेपाली महिलाका लागि कमाउने काम गर्नु हुन्न भन्ने बन्देजबाट माथि त उठिसकेको तर आज जस्तो प्रतिस्पर्धामै चाहिँ महिला अगाडि आइनसकेको समय थियो । त्यसैले पनि त्यसबेला कुनै पनि क्षेत्रमा प्रवेश गरेका महिलालाई 'के यसले पुरुषसरह काम गर्न सक्छे र' भन्ने दृष्टिकोणले हेरिन्थ्यो ।

२०६६ सालमा नबिल बैंकमा म्यानेजमेन्ट ट्रेनीका लागि आवेदन खुल्यो । भावनाले पनि आवेदन दिइन् । लिखित, ग्रुप डिस्कसनहुँदै अन्तर्वार्तासम्मको चरण सकियो । उनको नाम दोस्रो नम्बरमा निस्कियो । अनि बैंकमा जागिर सुरु गरिन् । केही महिनापछि नै भावना नबिल बैंकको व्यवस्थापनले मुख्य कार्यालयअन्तर्गत पीआर म्यानेजरको जिम्मेवारी पाइन् । उनको जिम्मेवारी ग्राहकसँग साक्षात्कार गर्ने, सम्बन्ध बनाउने तथा उनीहरूको फाइल संरक्षण गर्नुपर्ने हुन्थ्यो । बैंकिङ करिअरमा प्रवेश गरेको त्यति छोटो समयमा नबिल बैंकमा पीआर म्यानेजरको जिम्मेवारी पाउने आफू पहिलो कर्मचारी भएको भावना बताउँछिन् ।

उक्त जिम्मेवारीमा ९ वर्षसम्म उनले काम गरिन् । त्यसपछि भावनाले नबिल बैंक सूर्यबिनायक शाखाका लागि म्यानेजरको भूमिका प्राप्त गरिन् । शाखामा कार्यरत दर्जनौँ कर्मचारी मात्र होइन, सयौँ ग्राहकलाई समेत सन्तुष्ट पार्नु पक्कै सहज थिएन । तर, भावनाले त्यो जिम्मेवारी चुनौतीका रूपमा नभएर अवसरका रूपमा लिइन् । आफूमातहतका कर्मचारीको पनि क्षमता अभिवृद्धि गराउँदै बैंकलाई पनि कसरी अधिकतम प्रतिफल दिने भन्ने विषयमा केन्द्रित भएर काम गरिन् । मिलेसम्म आफैँले कर्मचारीलाई अनौपचारिक अभिमुखीकरण तालिमदेखि उनीहरूको व्यवस्थापनमा जोड दिइन् । जुन प्रयासमा भावना सफल पनि भइन् । उनले त्यहाँ डेढ वर्ष काम गरिन् ।

कुलेश्वर शाखाका लागि अर्को डेढ वर्ष म्यानेजरकै भूमिकामा काम गरिसकेपश्चात् पुनः नबिल बैंकको मुख्य कार्यलयअन्तर्गत रिलेसन म्यानेजरको जिम्मेवारीमा फर्किन् । हाल उनी नबिलकाे सो भूमिकामा कार्यरत बैंकको सबैभन्दा पुरानो कर्मचारीसमेत हुन् । हाल वरिष्ठ सम्पर्क प्रबन्धक भूमिका निर्वाह गरिरहेकी छिन् ।

उनले हाल बुटवल र भैरहवाअन्तर्गतको कर्पोरेट २५ करोडमाथिको पोर्टफोलियो (लोनको) रिभ्यु तथा इनपुटको जिम्मेवारी पनि निभाइरहेकी छिन् ।

‘एउटा महिलामा सीमित स्रोत साधनका बीच पनि कुशलतापूर्वक र प्रभावकारी रूपमा उच्चतम नतिजा दिन सक्ने गरी काम गर्न सक्ने क्षमता हुन्छ,’ भावना भन्छिन् । महिलाले आफूले आफूलाई कहिल्यै पनि कमजोर सोच्न नहुने उनी बताउँछिन् । समस्या त हरेक मानिसमा आउँछन् । म सक्छु, म गर्छु भनेर ती समस्यासँग जुधेर अगाडि बढेको खण्डमा हरेक महिला सफल हुन सक्ने भावनाको भनाइ छ ।

प्रकाशित मिति: शुक्रबार, फागुन २५, २०८० १६:४६